Ki Bomañi Ba Ba Mamela Lituto za Kreste Kacenu?

JESU KRESTE u zibahala hahulu ku ba yo muñwi wa batu ba batuna ka ku fitisisa ba ba kile ba pila. Ba bañata ba mu nga kuli ki mutu yo mutuna ka ku fitisisa. Lituto za hae li susuelize hahulu batu ka lilimo ze bato ba 2,000. Muñoli wa kwa England, Melvyn Bragg, n’a ñozi kuli lituto za Jesu li susuelize hahulu “batu ba ba sishemo ni ba ba musa mi li tahisize hahulu kuli batu ba eze buikatazo bo butuna bwa ku tusa ba bañwi.”

Batu Ba Nga Cwañi Bukreste?

Batu ba nga cwañi Bukreste? Bukreste bu ngiwa ku ba “ye ñwi ya lizwelopili za kwa moya ze ba ezize batu.” David Kelso wa fa sikolo sa Glasgow Caledonian University kwa Scotland n’a fitisize muhupulo wa hae. Na ñozi kuli: “Mwa lilimo ze 2,000 ze bu bile teñi Bukreste, se ku ezizwe lizwelopili ze si ka bonwa kale ka za bumanjinela, buyahi, filosofi, lipina ni mupilelo wa batu.”

Nihakulicwalo, ba bañwi bona ba na ni mibonelo isili ka za Bukreste. Ha ba lwanisi Bukreste, bona bulapeli bo bu tomile fa lituto za Jesu Kreste ni fa tumelo ya kuli ne li mwan’a Mulimu. Kono ba zwafiswa ki muzamao wa ba ba mwa likeleke ze ipapata kuli ki za Sikreste.

Sina ka mutala, mwa lilimo za ma-1800, Friedrich Nietzsche, mufilosofi wa kwa Germany, n’a nga Bukreste kuli ki “bulapeli bo bu fosahezi ku ya ku ile.” Na ñozi kuli: “Ki bona bo bu tahisize bumaswe bo butuna, ni buputeleli bo bu maswe ka ku fitisisa, . . . mi bu kona ku itusisa linzila ze maswe, ze lunya, za busholi, ili ze sa swalehi hande kuli bu pete milelo ya bona.” Kiniti kuli mibonelo ya Nietzsche ne li ye fosahezi, kono batu ba bañwi ba bande ni bona ba lumelelana ni yena. Libaka? Kakuli ku  zwa kwamulaho ku to fita cwale, muzamao wa ba ba ipapata ku ba Bakreste ha u si ka zibahala ka tulemeno twa Jesu Kreste, kono u zibahala kai ni kai “ka buitamaeli, bukebenga bo butuna ni bukwenuheli.”

Kana Kreste U mwa Bukreste?

Kacwalo kwa utwahala luli mutu ha n’a ka ipuza kuli: “Kana Kreste u mwa Bukreste?” Ba bañwi ba kana ba matukela ku alaba kuli “eni, u teñi mwateñi, esi mane n’a kile a sepisa balateleli ba hae kuli u ka ba ni bona ‘ku isa kwa mafelelezo a lifasi’!” (Mateu 28:20) Ki niti kuli Jesu n’a sepisize cwalo. Kono kana n’a talusa kuli u ka ba ni mutu kaufela ya ipapata ku ba mulateleli wa hae ku si na taba kuli muzamao wa hae u cwañi?

Mu hupule kuli baeteleli ba bañwi ba bulapeli ba mwa linako za Jesu ne ba ikutwile kuli Mulimu na li ni bona ku be cwañi kamba cwañi. Bakeñisa kuli Mulimu n’a bata ku itusisa Isilaele kwa ku peta musebezi o ipitezi, baeteleli ba bañwi ba bulapeli ne ba nahana kuli Mulimu n’a si ke a ba fulalela ku sina taba ni likezo za bona. (Mika 3:11) Kono kwa nalule-lule ne ba fitile fa ku hanyeza hahulu milao ni likuka za Mulimu. Kacwalo Jesu Kreste n’a ba bulelezi patalaza kuli: “A mu bone, ndu ya mina i siyala ku mina ili matota.” (Mateu 23:38) Bulapeli bo kaufela ne bu hanilwe ki Mulimu. N’a bu fulalezi mi n’a tuhelezi limpi za Siroma ku shandaula muleneñi wa ona wo mutuna wa Jerusalema ni tempele ya ona ka 70 C.E.

Kana nto ye swana ya kona ku ezahala kwa Bukreste? Ha lu nyakisiseñi ze ñwi za n’a bulezi Jesu ili ze ba swanela ku eza balateleli ba hae kuli a be ni bona “ku isa kwa mafelelezo a lifasi.”

 [Maswaniso a fa likepe 2, 3]

Lituto za Jesu Kreste li amile hahulu bupilo bwa batu ba bañata mwa lifasi kaufela