“U Lu Bulelele Ze Ñata!”

MWA muleneñi wa Nezlobnaya, mwa Russia, sitopa se si ituta za libuka fa sikolo se si pahami ne si sweli ku ituta libuka za n’a ñozi Mikhail Bulgakov. Kwa libuka zeo ne ku na ni buka ye ne talusa Jesu Kreste ka lishwau, kono cwale ne i bonisa kuli Satani ki ndume. Sitopa seo ha se si buhisani, bo muluti ba fa baituti tatubo ya ku ñola litaba za mwa buka yeo. Kono Andrey yo muñwi wa baituti bao ya n’a li Paki ya Jehova wa lilimo ze 16, ka likute a ikupela kuli a si ke a ñola tatubo yeo kakuli lizwalo la hae ne li sa mu lumelezi ku ituta buka ye cwalo. Kono a ikupela ku ñola likande le li ka bonisa mwa n’a ngela Jesu. Bo muluti ba lumela.

Mwa likande la hae, Andrey n’a talusize kuli, nihaike n’a kuteka maikuto a ba bañwi, n’a fumani kuli nzila ye nde ka ku fitisisa ya ku ituta za Jesu ki ku bala ye ñwi ya libuka ze ne za Evangeli. Andrey n’a ize ka ku eza cwalo, “mu ka ituta za bupilo ni lituto za Jesu ze tomile fa litaba ze ne ñozwi ki batu ba ne ba iponezi zona luli.” Mi n’a ekelize kuli: “Taba ye ñwi ye bilaeza ki mwa taluselizwe Satani. Batu ba bañwi ba kana ba tabela ku bala buka ye bulela kuli Satani ki ndume, kono isike na.” N’a talusize kuli Satani ki sibupiwa luli se si maswe sa kwa moya se si m’ata se ne si fetuhezi Mulimu, ku tahisa bumaswe, ni manyando kwa batu. Andrey n’a felize likande la hae ka ku ñola kuli: “Ha ni lumeli kuli ku bala buka ye kwa kona ku ni tusa. Seo ha si talusi kuli ni toile Bulgakov yena muñoli wa yona. Kono na, ni ka tabela ku bala fela Bibele kuli ni itute litaba za kwa ikale za niti ze bulela ka za Jesu Kreste.”

Bo muluti ba Andrey ne ba tabisizwe hahulu ki taba ya hae mane ba mu mema kuli a itukiseze ku to balela baituti ba bañwi likande la Jesu Kreste. Andrey a lumela. Ha se ba kena lwa bubeli mwa sitopa sa bona sa ku ituta za libuka, Andrey a balela sitopa kaufela likande la hae. A talusa libaka ha n’a ikutwile kuli Jesu ki mutu yo mutuna ka ku fitisisa ya kile a pila fa lifasi-mubu. Cwale a bala kauhanyo ye bulela za lifu la Jesu mwa buka ya mwa Bibele ya Mateu. Bakeñisa kuli nako ya n’a filwe ya ku bala likande la hae ne se i fela, Andrey a bata ku ciñekela ona f’o, kono ba mwa sitopa sa hae ba mu susueza, ba li: “U lu bulelele ze ñata! Ku tuha f’o ki sikamañi se ne si ezahezi?” Kacwalo a zwelapili ku bala taba ya Mateu ya za zuho ya Jesu.

Andrey ha sa felize, ba n’a kena ni bona mwa sitopa ba mu buza lipuzo ze ñata ka za Jesu ni Jehova. Andrey u li: “Ne ni lapezi ku Jehova kuli a ni fe butali, mi a alaba tapelo ya ka. Kakuli ne ni kona ku alaba lipuzo za bona kaufela!” Tuto ha se i felile, Andrey a fa bo muluti ba hae buka ya Mutu Yo Mutuna ka ku Fitisisa ya Kile a Pila fa Lifasi-Mubu, * mi ba i amuhela ka tabo. Andrey n’a ize: “Bo muluti ba ni fa linepo ze ñata ka za likande la ka mi ba ni lumba bakeñisa tumelo ya ka ni ka ku sa i swabela. Mi hape ne ba bulezi kuli ba lumelelana ni ze ñwi za tumelo ya ka.”

Andrey u tabile kuli n’a ketile ku latelela lizwalo la hae le li lutilwe ka Bibele ka ku sa bala litaba ze shwaula Jehova ni Mwan’a hae, Jesu Kreste. Katulo ye tiile yeo ne i mu silelelize kwa mibonelo ye si ya ka mañolo mi hape ne i mu file tohonolo ye tuna ya ku taluseza ba bañwi litaba za butokwa hahulu za Bibele.

[Litaluso za kwatasi]