Mizwale Ba Banca ba mwa Sitopa Se Si Etelela

LA Bulalu kakusasana, August 24, 2005, ba fa Betele ya United States ni Canada ne ba ikutwezi zibiso ye tabisa hahulu. Ne ku zibisizwe kuli ku kala ka September 1, 2005, bo Geoffrey W. Jackson ni bo Anthony Morris III, ne ba ka ba mwa Sitopa Se Si Etelela sa Lipaki za Jehova.

Muzwale Jackson n’a kalile bupaina ka February 1971 mwa Tasmania, sooli sa kwa Australia. Ka June 1974, a nyala bo Jeanette (Jenny). Hamulahonyana wa f’o, ba ketiwa ku ba mapaina ba ba ipitezi. Ku zwa ka 1979 ku ya ka 2003, ne ba li balumiwa mwa lioli za mwa liwate la South Pacific za Tuvalu, Samoa, ni Fiji. Mwa lioli zeo, Muzwale ni Kaizeli Jackson ne ba tusize hahulu kwa ku toloka lihatiso ze tomile fa Bibele. Ku kala ka 1992, Muzwale Jackson a ba mwa Ketengo ka Mutai ka Samoa, mi ku kala ka 1996, a ba mwa Katengo ka Mutai ka Fiji. Ka April 2003, Muzwale Jackson ni musal’a hae Jenny ba ba mwa lubasi lwa Betele lwa United States mi ba kala ku sebeleza mwa liluko le li talima za toloko la Translation Services. Ku si ka fita nako, Muzwale Jackson a ba mutusi kwa Katengo ka Tuto ka Sitopa Se Si Etelela.

Muzwale Morris n’a kalile bupaina ka 1971 mwa United States. Mwa December silimo se si swana seo, a nyala bo Susan, mi ba zwelapili ku eza bupaina ku fitela ba ba ni mwan’a bona wa pili Jesse. Hamulaho, ba ba ni mwana wa bubeli wa libizo la Paul. Muzwale Morris a kala sinca bupaina ka 1979. Musal’a hae ni yena a ba paina banana ha ba kala sikolo. Lubasi kaufela lwa yo sebeleza ko ku na ni butokwi kwa Rhode Island ni kwa North Carolina, ili kwa United States. Kwa North Carolina, Muzwale Morris a ba muokameli wa mupotoloho wa ku tusa, mi bana ba kalisa bupaina bwa kamita. Bo Jesse ni Paul ne ba memilwe ku yo sebeleza kwa mutai wa United States ha ne ba kwanisize lilimo za buhulu ze 19. Ka nako yeo, Muzwale Morris a ba muokameli wa mupotoloho. Mi ka 2002 yena ni musal’a hae Susan ba memiwa ku ya kwa Betele, mi ba kala sebelezo ya bona la August 1. Muzwale Morris n’a sebelize mwa liluko le li talima za simu la Service Department kwa Patterson mi hamulaho a ba mutusi kwa Katengo ka Sebelezo ka Sitopa Se Si Etelela.

Kwand’a ba banca ba babeli bao, mwa Sitopa Se Si Etelela ku na ni hape bo C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ni D. Sydlik. Kaufela ba ba mwa Sitopa Se Si Etelela ki Bakreste ba ba tozizwe.