Ha Mu Etelela Ba Bañwi, Mu Likanyise Kreste

LILIMONYANA kwamulaho, patisiso ye ne ezizwe ka za mikwa ya batu ne i labutuzi litaba ze tabisa. Ba ne ba itusisizwe mwa patisiso yeo ne ba aluzwi mwa likwata ze peli. Sikwata se siñwi ne si ketilwe ku ba mapolisa mi ne si filwe m’ata a ku libelela sikwata sa bubeli, se ne si ketilwe ku ba mapantiti. Ki lika mañi ze ne ezahezi?

Kwa bihiwa kuli: “Mwa mazazi a sikai fela, buñata bwa [mapolisa] ba kala ku nyefaula, ku nataka, ni ku tosangisa mapantiti ka ku swalelela, kono haili mapantiti bona ba lamba ni ku kokobezwa.” Bocaziba ba ne ba eza patisiso yeo ba fita fa ku ungula kuli: Ibata iba mañi ni mañi wa kona ku swasiwa ki mukwa wa ku sebelisa maswe m’ata a hae.

Ku Sebelisa Hande M’ata ni Ku Itusisa Ona Maswe

Kaniti luli ku sebelisa hande m’ata kwa kona ku tusa. Ku eza cwalo ku kona ku lu libisa mwa nzila ye swanela mi hape ku kona ku tahisa kuli lu tusiwe kwa mubili, mwa maikuto, ni kwa moya. (Liproverbia 1:5; Isaya 48:17, 18) Kono sina fela mo i boniseza patisiso ye bulezwi fahalimu, kamita ku na ni kozi ye bandamezi ya ku sebelisa ka ku tula tikanyo m’ata a na ni ona mutu. Bibele ha i bulela za yona kozi ye, i li: “Ha ku busa ya maswe sicaba sa tonga.”—Liproverbia 29:2; Muekelesia 8:9.

Ku sebelisa maswe m’ata a luna kwa holofaza, nihaiba lu eza cwalo ka mulelo o munde. Ka mutala, cwanoñu fa, keleke ye ñwi ya kwa Ireland ne i kupile swalelo fa nyangela bakeñisa kuli baluti ba bañwi ne ba sebelisize maswe m’ata a bona ka ku nyandisa banana ba ne ba babalela. Niti kikuli buñata bwa baluti bao ne ba na ni milelo ye minde ha ne ba eza cwalo, kono mikwa ye ne ba itusisa ba bañwi ki yona ye ne i holofaza luli. Mutende o muñwi ne u bihile kuli “banana ba bañata [ne ba] sitaniswa mwa minahano ki mifilifili ye ne fitelezi ni mabifi a baluti ba bañwi.” (The Irish Times) Kono cwale he, mu kona cwañi ku sebelisa m’ata a mina ka nzila ye ka tusa ba bañwi ku fita ku ba tunula kamba ku ba holofaza ka manzwi kamba ka likezo?—Liproverbia 12:18.

Jesu Kreste U Filwe “M’ata Kaufela”

Mu nahane mutala wa Jesu Kreste. Nakonyana pili a si ka kambamela kale kwa lihalimu, Jesu n’a bulelezi balutiwa ba hae kuli: ‘M’ata kaufela a filwe na mwa lihalimu ni fa lifasi-mubu.’ (Mateu 28:18, NW) Kana pulelo yeo ne i konile ku sabisa balutiwa? Kana balutiwa ne  ba ikutwile kuli Jesu cwale na ka bonisa moya o swana ni wa bo Sesare ba Roma, ba ne ba zibahala ka ku itusisa m’ata a bona kwa ku ota ba ne ba tahisanga bukwenuheli mwa puso ya bona?

Litaba za mwa Bibele li bonisa kuli ne ba si ka ikutwa cwalo! Jesu Kreste u sebelisa m’ata a hae ka ku swana ni Ndat’ahe. Nihaike Jehova ki yena luli Muambakani ya Pahami ya m’ata kaufela, u lakaza kuli batu ba hae ba mu sebeleze ka ku itatela ku zwelela kwa lipilu za bona, isi ka ku sa nahana, ka ku saba, kamba ka butanga. (Mateu 22:37) Jehova ni kamuta ha sebelisangi maswe m’ata a hae. Pono ye lemuseha hande ya na filwe mupolofita Ezekiele i paka hande yona taba ye.

Mwa pono yeo, Ezekiele na boni libupiwa za mangeloi z’e ne ze ne yemela bubusi bwa Mulimu. Se siñwi ni se siñwi sa libupiwa zeo ne si na ni lipata z’e ne. Ezekiele u ñola kuli: “Ka za ku swana kwa lipata za zona, ne li na ni pata ya mutu; kwa neku la bulyo, mwa bune bwa zona, ne li na ni pata ya tau; hape, mwa bune bwa zona, kwa neku la nzohoto, ne li na ni pata ya pulu; mi hape, mwa bune bwa zona, ne li na ni pata ya mbande.” (Ezekiele 1:10) Lipata z’e ne zeo li yemela tulemeno kamba mikwa ye mine ye mituna ya Mulimu. Tulemeno to, tu talusizwe mwa Linzwi la Mulimu sina: lilato, le li swaniselizwe ki pata ya mutu; katulo ye lukile, ye swaniselizwe ki pata ya tau, ni butali, bo bu swaniselizwe ki pata ya mbande. Yona mikwa ye milalu yeo i sebelisana hamoho ni wa bune—ona wa m’ata, a yemelwa ki pata ya pulu. Pono ye i talusañi? I bonisa kuli Jehova ha itusisangi m’ata a hae a’ si na maciñekelo a sa bonisi tulemeno to tuñwi twa hae to tu tuna.

Jesu Kreste ka ku likanyisa Ndat’ahe, na itusisize m’ata a hae ka mukwa o n’o bonisa hande lilato, butali, ni katulo ye lukile. Balutiwa ba Jesu ne ba fumanezi mioya ya bona pumulo ye  tuna ka ku sebeza mwatas’a ketelelo ya hae. (Mateu 11:28-30) Haiba ku na ni mukwa o muñwi o bonisa mwa inezi Jehova Mulimu ni Jesu Kreste, u zibe i lukela ku ba lilato, isi m’ata kamba tamaiso!—1 Makorinte 13:13; 1 Joani 4:8.

Mu Etelelanga Cwañi Ba Bañwi?

Haiba mu na ni m’ata, mu etelelanga cwañi ba bañwi? Ka mutala, mwa lubasi, kana mu zamaisanga lika ka ku bonisa buima bwa m’ata a mina ku si na taba kuli ku eza cwalo ku ka bonisa kuli mu iyakatwa fela za mina beñi? Kana ba bañwi mwa lubasi lwa mina ba latelelanga fela likatulo ze mu ezanga bakeñisa kuli ba mi saba kamba ba ezanga cwalo ka libaka la kuli ba mi lata? Kana ba mwa lubasi lwa mina ba mi utwa fela ka libaka la m’ata e mu na ni ona? Zeo ki lipuzo ze ba swanela ku nyakisisa litoho za mabasi ka mulelo wa ku bata ku latelela z’a bulela Mañolo ka za tukiso ya lubasi.—1 Makorinte 11:3.

Mi ku cwañi haiba mu na ni buikalabelo mwa puteho ya Sikreste? Kuli mu lemuhe haiba mu sebelisa buikalabelo bwa mina ka nzila ye swanela, mu ipeye fa sikala ka likuka ze latelela ze tahile ka moya wa Jehova Mulimu ni ze ne bonisizwe ki Jesu Kreste.

“Mutanga wa Mulena h’a lukeli ku lwana; kono u lukela ku ba ya na ni musa kwa batu kaufela, . . . ya na ni pilu. A sikulule ka musa ba ba hanyeza.”—2 Timotea 2:24, 25.

Batu ba bañwi mwa puteho ya Sikreste ya kwa makalelo ne ba na ni m’ata a matuna. Ka mutala, Timotea, mane na kona ku ‘laela ba bañwi kuli ba si ke ba luta tuto i sili.’ (1 Timotea 1:3, NW) Kono lu na ni buikolwiso bwa kuli Timotea na likanyisize mikwa ya Mulimu ha na ezize cwalo, kakuli na sebelisize m’ata a hae ka ku lumelelana ni kelezo ya Paulusi ya ku luta ka “musa” ni ku ba “ni musa kwa batu kaufela” ha na nze a okamela puteho ya Sikreste. Bakeñisa kuli ne li yena mwanana kwa maeluda kaufela ka nako yeo, na na ni ku bonisa likute ku ba bahulu ni ku babalela hande batangana ba bañwi. (1 Timotea 5:1, 2) Bakeñisa ku boniswa lilato le li cwalo, puteho ni yona i fita fa ku ba lubasi lo lu swalisani ni ku bonisana lilato, isi sina kopano ya lipisinisi ye situhu.—1 Makorinte 4:14; 1 Matesalonika 2:7, 8.

“Malena a macaba ba a busa ka tata, ni kuli ba batuna ba a limba. Ku si ke kwa ba cwalo ku mina; kono ya lata ku ba yo mutuna ku mina, ibe yena mutang’a mina.”—Mateu 20:25, 26.

Babusi ba lifasi ba “busa ka tata” ka ku imeza ba bañwi ka lika za buitati ni ka ku ñañelela kuli ba bañwi ba eze lika ka nzila ye ba tokwa, ni kuli haiba ba sa ezi cwalo ba ka otiwa. Kono Jesu Kreste yena na kanatezi fa ku sebeleza ba  bañwi isi fa ku beya ba bañwi mwa situkutuku. (Mateu 20:27, 28) Kamita na bonisa lilato kwa balutiwa ba hae ni ku ba babalela. Ha mu ka latelela mwa na ezezanga Jesu, seo si ka tisa kuli ba bañwi ku kone ku ba bela bunolo ku swalisana ni mina. (Maheberu 13:7, 17) Mi ha mu eza cwalo mu ka biseza ba bañwi bunolo mane bwa ‘ku zamaya limaili ze peli,’ ha ba eza ze mu ba laezi, mi ba ka eza cwalo ka ku itatela isi ka ku hapelezwa.—Mateu 5:41.

“Mu lise mutapi wa Mulimu o mwa pabalelo ya mina, isi . . . ka ku hapeleza bona ba ba li sanda sa Mulimu, kono ka ku ba mutala kwa mutapi.”—1 Pitrosi 5:2, 3.

Kacenu baokameli ba lemuha kuli ba ka ikalabela ku Mulimu ka za buiketo bwa kwa moya bwa batu kaufela ba ba mwa puteho. Ba nga buikalabelo bwa bona ka butuna. Ha ba nze ba lisa mutapi wa Mulimu, ba lika ka t’ata ku eza cwalo ka ku itatela, ka mafulofulo ni ka ku lata. Ka ku swana ni muapositola Paulusi, baokameli ba sebeza ka t’ata ku tiisa ni ku matafaza tumelo ya mizwale ba bona; ha ba ba kotopi inge ba ba busa tumelo ya bona.—2 Makorinte 1:24.

Maeluda ha ba fa kelezo ye swanela, ba ezanga cwalo ka musa kuli ba tuse mutu ya toza kwa moya kamba ku susueza Mukreste ka bona kuli a eze zwelopili ya kwa moya. Ba hupulanga kelezo ya muapositola Paulusi ye li: “Banabahesu, mutu h’a swelwi a eza mulatu, mina ba ba na ni Moya, mu mu kutise ka moya o musa; mi u tokomele, u ka suhana u likwa ni wena.”—Magalata 6:1; Maheberu 6:1, 9-12.

“Mu ezane hande, mi mutu h’a na ni s’a tongoka yo muñwi, mu swalelane . . . mu apale lilato, kakuli ki tamo ye lu fa bupetehi.”—Makolose 3:13, 14.

Mu ikutwanga cwañi haiba batu ba bañwi ba palelwa ku pila ka ku lumelelana luli ni likuka za Sikreste? Kana mwa hupulanga kuli batu bao ha ba si ka petahala, sina mwa ezeza Jehova ni Jesu Kreste. (Isaya 42:2-4) Kamba kana mu ñañelelanga kuli mwa taba ifi kamba ifi kaufela ba bañwi ba eze ka ku latelela luli mulao? (Samu 130:3) Mu hupule kuli kwa swanela ku bonisa musa mwa miinelo ye miñwi ni ku ba ya tiile haiba fela ku tokwahala ku ba cwalo. Ha mu bonisa lilato kwa batu be mu etelela, mu ka tisa kuli mu kone ku sepana hahulu ni bona.

Haiba mu filwe buikalabelo bo buñwi cwalo, mu like ka t’ata ku likanyisa Jehova Mulimu ni Jesu Kreste ha mu etelela ba bañwi. Mu hupule pono ye makaza ya na talusize walisamu ha na bonisize ka mo Jehova a etelelela batu ba hae. Davida n’a opezi kuli: “[Muñ’a] Bupilo ki mulisana wa ka; ha ni na ku tokwa se siñwi. U ni pumuliseza mwa mafulisezo a matala; u ni zamaisa fakaufi ni mezi a kuzize. U wetulula moya wa ka; u ni zamaisa mwa linzila za Ku Luka, kabakala Libizo la hae.” Ka ku swana, hape lu bala cwana ka za Jesu: “Ki na mulisana yo munde; ni ziba lingu za ka, mi ni zona ze li za ka, za ni ziba, sina Ndate h’a ni ziba, ni na, ni ziba Ndate; mi bupilo bwa ka, na bu fa lingu za ka.” Kaniti luli ha ku na mitala i sili ya ku etelela ba bañwi ka lilato ye fita mutala wa Jehova ni wa Jesu.—Samu 23:1-3; Joani 10:14, 15.

[Manzwi a fa likepe 18]

Jehova kamita u sebelisanga m’ata ka ku lumelelana luli ni tulemeno twa hae twa katulo ye lukile, butali, ni lilato

[Siswaniso se si fa likepe 18]

Ka linako ze ñwi, maeluda ba swanela ku fa kelezo ye lilato kwa lifosi

[Siswaniso se si fa likepe 19]

Paulusi na elelize Timotea kuli a pile sina mwana ya na ni likute ni ya babalela ba bañwi

[Siswaniso se si fa likepe 20]

Jesu Kreste u sebelisa m’ata a hae ka butali, ka ku luka ni ka lilato