Ki Nto Mañi Ye Ka Mi Tusa ku Utwisisa Bibele?

‘LITABA ze, u li patezi ba ba butali ni ba ba talifile, mi u li patululezi banana ba banyinyani.’ (Luka 10:21) Manzwi ao a n’a bulezi Jesu ku Ndat’ahe wa kwa lihalimu a bonisa kuli haiba lu bata ku utwisisa Bibele, lu lukela ku ba ni mubonelo o munde. Butali bwa Jehova bu patuluzwi ka ku fa batu buka ye kona ku utwisiswa fela ki ba ba ikokobeza ni ba ba tabela ku lutiwa.

Buñata bwa luna ku lu belanga t’ata ku ba ni buikokobezo. Kaufel’a luna lu hozize mukwa wa ku ikuhumusa. Mi hape lu pila mwa “mazazi a maungulelo,” mwahal’a batu ba “baitati, . . . matanya, ni ba ba inuneka.” (2 Timotea 3:1-4) Yeo ki mikwa ye kona ku lu palelwisa ku utwisisa Linzwi la Mulimu. Ka bumai, fokuñwi kaufel’a luna lu kukuezwanga ki ku inuneka kwa batu be lu pila ni bona. Kacwalohe, mu kona cwañi ku ba ni mubonelo o tokwahala kuli mu utwisise Bibele?

Ku Lukisa Pilu ni Munahano

Ezira ya n’a li mueteleli wa kwaikale wa batu ba Mulimu “n’a isize [lukisize, NW] pilu ya hae kwa ku bata mulao wa [Muñ’a] Bupilo.” (Ezira 7:10) Kana ku na ni linzila za mo lu kona ku lukiseza pilu ya luna? Eni. Lwa kona ku kalisa ku lukisa pilu ya luna ka ku ba ni mubonelo o munde wa Mañolo. Muapositola Paulusi n’a ñolezi Bakreste ka yena kuli: “Nako ye mu amuhezi Linzwi la Mulimu le mu utwile ku luna, mu li amuhezi isi sina linzwi la mutu, kono sina Linzwi la Mulimu.” (1 Matesalonika 2:13) Nihaike kuli n’a itusisize batu kwa ku ñola Mañolo, ze ne ba ñozi ne li zwa ku Jehova. Ku lemuha ona taba ya butokwa yeo ku ka lu konisa ku lumela ze lu bala.—2 Timotea 3:16.

Tapelo ki nzila ye ñwi ye lu kona ku lukisa ka yona pilu ya luna. Bakeñisa kuli Bibele i tahile ka moya o kenile, lu ka utwisisa lushango lwa yona ka tuso ya moya. Lu lukela ku lapela ku Mulimu kuli a lu tuse ka moya o kenile. Mu lemuhe walisamu mwa n’a iyakatwela taba yeo ha n’a ñozi kuli: “Ni fe kutwisiso, mi ni ka mamela mulao wa hao; e, ni ka u tokomela ka pilu ya ka kaufela.” (Samu 119:34) Lu tokwa ku lapelela isi fela buikoneli bwa ku utwisisa ze ñozwi kono hape ni kuli lu be ni pilu ye ka lu konisa ku lumela ze i bulela Bibele. Kuli lu utwisise Bibele, lu tokwa ku lumela litaba za niti.

Ha mu nze mu yeya kuli mu be ni mubonelo o munde, mu nyakisise mo mu kona ku tusezwa ki ku ituta Bibele. Lu na ni mabaka mañata a utwahala ha lu tokwa ku bala Linzwi la Mulimu, kono libaka la butokwa ni ku fita ki la kuli Bibele i lu tusa ku sutelela ku Mulimu. (Jakobo 4:8) Ha lu bala ka mo Jehova a ezeza batu ba ba  mwa miinelo ye shutana-shutana, ka mwa itebuhela batu ba ba mu lata, ni ka mwa ezeza batu ba ba mu fulalela, lu fita fa ku lemuha mwa inezi. Kamita mulelo wa luna o mutuna wa ku bala Bibele u swanela ku ba wa ku ziba hande Mulimu ni ku tiisa silikani sa luna ni yena.

Ze Palelwisa ku Ba ni Mubonelo O Munde

Ki lifi ze kona ku lu palelwisa ku utwisisa Linzwi la Mulimu. Nto ye ñwi ye kona ku lu palelwisa ki ku kumalela kwa litumelo za batu be lu sepile. Ka mutala, mu kana mwa kumalela kwa litumelo ni mibonelo ya batu ba bañwi be mu kuteka. Kono ne mu ka eza cwañi haiba batu bao luli ha ba mameli Linzwi la Mulimu kamba ku li nga ku ba la butokwa? Mwa miinelo ye cwalo, ku utwisisa ze i luta luli Bibele ku kona ku ba t’ata. Kona libaka Bibele ha i lu susueza ku tatuba ka tokomelo ze lu lutilwe.—1 Matesalonika 5:21.

Maria mahe Jesu n’a bile ni butata bo bu swana. N’a utilwe ka ku ya ka sizo sa Sijuda. N’a mamelanga Mulao wa Mushe ka tokomelo mi ku si na ku kakanya n’a yanga kwa sinagoge. Kono hasamulaho mwa bupilo bwa hae a lemuha kuli bulapeli bo ne ba mu lutile bashemi ba hae ne bu fitile fa ku sa amuhelwa ki Mulimu. Ka lona libaka leo, Maria a amuhela lituto za Jesu mi a ba yo muñwi wa batu ba pili mwa puteho ya Sikreste. (Likezo 1:13, 14) Ku eza cwalo ne ku sa talusi kuli Maria n’a sa kuteki bashemi ba hae kamba lizo za bona; kono ku eza cwalo ne ku bonisa kuli n’a lata Mulimu. Kuli lu tusiwe ki Bibele, ni luna ka ku swana sina Maria lu lukela ku sepahala hahulu ku Mulimu ku fita mo ne lu ka sepahalela ku mutu ufi kamba ufi.

Ka bumai, batu ba bañata ha ba isi hahulu pilu kwa niti ye mwa Bibele. Ba bañwi ba tabela ku latelela lizo za bulapeli za buhata. Ba bañwi bona ba bonisa ku sa tabela niti ka mubulelelo ni mupilelo wa bona. Kaniti, ku amuhela niti ya Bibele ku tokwa buitomboli: Ku kana kwa mi fapahanya ni balikani ba mina, be mu pila ni bona, be mu beleka ni bona, mane nihaiba ku mi fapahanya ni ba lubasi lwa mina. (Joani 17:14) Kono munna ya butali Salumoni n’a ñozi kuli: “Itekele niti, mi u si ke wa i lekisa.” (Liproverbia 23:23) Haiba mu nga niti ku ba ya butokwa, Jehova u ka mi tusa ku utwisisa Bibele.

Nto ye ñwi hape ye kona ku lu palelwisa ku utwisisa lushango lwa Bibele ki ku sa tabela ku mamela ze i bulela. Jesu n’a bulelezi balutiwa ba hae kuli: “Mina mu filwe ku ziba likunutu za mubuso wa kwa lihalimu; kono bona ha ba si ka fiwa. Kakuli lipilu za ba sicaba se, li nunile, lizebe za bona li utwa ka tata.” (Mateu 13:11, 15) Buñata bwa batu ba n’a kutazanga ku bona Jesu ne li ba muñañatoho, ba ne ba sa lati ku cinca. Ne ba shutanela kwahule ni mulekisi ya n’a bulezi Jesu mwa swanisezo! Mulekisi y’o ha n’a fumani pelela ya teko ye tuna, a ya, a lekisa za hae kamukana kuli a i leke. Ku utwisisa niti ya Bibele ku swanela ku ba kwa butokwa hahulu ni ku luna.—Mateu 13:45, 46.

Butata bwa ku Sa Lata ku Lutiwa

Butata bo butuna bo bu kona ku palelwisa mutu ku utwisisa Bibele ki bwa ku sa lata ku lutiwa. Mutu ku kona ku mu bela t’ata ku amuhela mihupulo ya sa zibi ye zwelela ku mutu yo muñwi ya bonahala ku ba ya kwatasi. Kono baapositola ba Jesu Kreste ne li “ba ba si ka ituta, ili batu fela.” (Likezo 4:13) Paulusi n’a talusize libaka baapositola ba Jesu ha nesi batu ba ba itutile ha n’a ñozi kuli: “Mu lemuhe ku bizwa kwa mina, kakuli ku mina ba ba na ni butali ka mukwa wa batu, ha ba yo ba bañata; ba ba mata, ha ba yo ba bañata; ba lusika lwa bulena, ha ba yo ba bañata. Kono Mulimu u ketile linto za lifasi ze na ni butanya, kuli a swabise ze butali.” (1 Makorinte 1:26, 27) Haiba mu bona kuli ku mi bela t’ata ku ba ni buikokobezo ha mu lutiwa ki mutu ya kwatasi, mu hupule kuli mutu yo ni yena u itusiswa fela ki Mulimu kuli a mi lute. Ha ku na tohonolo ye fita ku lutiwa ki Jehova, yena ‘Muluti wa luna ya Pahami.’—Isaya 30:20, NW; 54:13.

Naamani mulauli wa masole wa kwa Siria ne  ku mu bezi t’ata ku amuhela taelo ya mutu ya kwatasi. Ka ku bata ku foliswa mbingwa ya hae, n’a iz’o bonana ni Elisha, mupolofita wa Jehova. Kono mutang’a Naamani ki yena ya n’a filwe litaelo za Mulimu ze ne talusa za na swanela ku eza Naamani kuli a fole. Lushango lwa n’a taluselizwe Naamani ni mo ne lu taluselizwe ne lu tisize kuli ku mu bele t’ata ku amuhela ka buikokobezo litaelo za n’a filwe, mi seo sa tisa kuli kwa makalelo a hane lushango lwa mupolofita wa Mulimu. Hasamulaho, Naamani a cinca mubonelo wa hae mi a foliswa. (2 Malena 5:9-14) Lu kopananga ni butata bo bu swana ha lu ituta Bibele. Lu kana lwa ituta kuli haiba lu bata ku foliswa kwa moya ni mwa muzamao, lu tokwa ku pila mupilelo o munca. Kana lu ka ba ni buikokobezo bwa ku lumeleza mutu yo muñwi ku lu luta ze lu tokwa ku eza? Ki batu ba ba tabela fela ku lutiwa ba ba kona ku utwisisa Bibele.

Mubonelo o munde u kile wa boniswa ki munna ya n’a li sikombwa se situna sa Kandasi, mulena wa musali wa Maetopia. Ha n’a kutela kwa Africa a li mwa koloi ya hae, mulutiwa Filipi a mu atumela. Filipi a buza munna y’o haiba n’a utwisisa za n’a bala. Sikombwa y’o n’a bile ni buikokobezo ka ku alaba kuli: “Ni ka utwisisa cwañi ku si na ya ni beya mwa nzila?” Munna y’o a man’o utwisisa Linzwi la Mulimu, a kolobezwa. Ha sa kolobelizwe, “a zwelapili mwa nzila ya hae, a tabile.”—Likezo 8:27-39.

Buñata bwa Lipaki za Jehova ki batu-tu fela. Sunda ni sunda ba zamaisanga lituto za Bibele mwa mandu a batu ba ba fitelela 6 milioni. Bakeñisa kuli Bibele i luta mupilelo o munde ka ku fitisisa, i talusa sepo ya niti ya batu, mi i lu bonisa mo lu kona ku zibela Mulimu, bolule-lule ba lemuhile kuli ku ituta Bibele ni ku utwisisa ze i bulela ku tisa tabo ye tuna. Ni mina mwa kona ku ba ni tabo ya ku utwisisa Bibele.

[Siswaniso se si fa likepe 7]

Naamani ne ku mu bezi t’ata ku amuhela litaelo ze ne zwa ku mutanga ya kwatasi

[Siswaniso se si fa likepe 7]

Ku utwisisa Bibele ku lu tiseza tabo