Ku Fita ku Ze Konisa za Kolobezo ya Sikreste

“Kiñi se si ka ni hanisa ku kolobezwa?”—LIKEZO 8:36.

1, 2. Filipi n’a kalisize cwañi puhisano ni nduna wa Muetopia, mi ki nto mañi ye bonisa kuli nduna yo na tabela bulapeli bwa niti?

H AMULAHO wa silimo kamba lilimo ze peli ku zwa fa lifu la Jesu, nduna wa muuso n’a li mwa lieto la ku zwa kwa Jerusalema ni ku liba kwa mboela kwa Gaza. Na tateka ku zamaya ka koloi musipili o mutelele wo katalisa. Munna ya saba Mulimu yo n’a zamaile musipilituna wo ku zwa kwa Etopia ku ya kwa Jerusalema ku yo lapela Jehova. Mi ha na menuha ku kuta habo, bakeñisa butelele bwa musipili a kala ku bala Linzwi la Mulimu, mi muhato wo u bonisa kuli ne li munna wa tumelo ye tuna. Jehova n’a boni tumelo ya yena munna yo, mi ka ku itusisa lingeloi, a luma mulutiwa Filipi kuli a yo kutaza ku yena.—Likezo 8:26-28.

² Filipi n’a konile ku kalisa puhisano ka bunolo bakeñisa kuli nduna wa Muetopia yo n’a bala ka ku tiisa, ka ku ya ka mukwa wa mwa miteñi yeo. Kacwalo, Filipi na konile ku utwa kuli nduna yo n’a bala muputo wa Isaya. Puzo ye bunolo ya n’a buzize Filipi ne i konile ku hoha mamelelo ya nduna yo. Filipi n’a buzize kuli: “Kana u utwisisa s’o bala?” Seo sa tisa kuli ba buhisane Isaya 53:7, 8. Mi hamulaho wa ku buhisana liñolo la Isaya, Filipi ‘a mu bulelela za Jesu.’—Likezo 8:29-35.

3, 4. (a) Ki kabakalañi Filipi ha n’a kolobelize Muetopia ka bubebe? (b) Ki lipuzo mañi ze lu tuha lu nyakisisa?

³ Ha se ku fitile nakonyana, Muetopia yo a utwisisa kalulo ya peta Jesu mwa lisepiso za Mulimu, mi a utwisisa ni butokwa bwa ku ba mulutiwa wa Kreste ya kolobelizwe. Mi ha ba fita fo ku na ni mezi, nduna a buza Filipi, a li: “Kiñi se si ka  ni hanisa ku kolobezwa?” Wo luli ne li muinelo o ipitezi. Kakuli nduna yo ya na ni tumelo na kalile kale ku lapela Mulimu inge a li muproselite wa Mujuda. Mi mwendi ne ku ka mu ngela nako ye telele hape kuli a be ni kolo ya ku kolobezwa. Mi mane taba ye tuna kikuli, yena munna yo na utwisisize za n’a tokwa Mulimu ku yena, mi na bata ku li eza. Filipi ka tabo a lumela kupo ya hae, mi ha sa kolobelizwe, yena Muetopia yo “a zwelapili mwa nzila ya hae, a tabile.” Mi ha ku na kakanyo ya kuli na izo ba mukutazi ya mafulofulo wa taba ye nde mwa naha ya habo.—Likezo 8:36-39.

⁴ Nihaike mihato ya buineelo ni kolobezo ha i swaneli ku ngiwa nako i si ka fita kale kamba ka ku sa nahanisisa hande, mutala wa nduna wa Muetopia u bonisa kuli ka linako ze ñwi batu ba bañwi ne ba kolobelizwe ka bubebe hasamulaho fela wa ku utwa Linzwi la Mulimu.  *Kacwalo kwa swanela ku nyakisisa lipuzo ze latelela: Ki lika mañi za swanela ku eza mutu pili a si ka kolobezwa kale? Ki mwa miinelo ye cwañi mo buhulu bu kona ku nyakisiswa mwa taba ya ku kolobezwa? Ki zwelopili ya kwa moya ye kuma kai ya swanela ku bonisa mutu pili a si ka kolobezwa kale? Mi puzo ya butokwa ki ya kuli: Ki kabakalañi Jehova ha tokwa kuli batanga ba hae ba kolobezwe?

Tumelelano Ya Butokwa

5, 6. (a) Batu ba Mulimu mwa miteñi ya kwamulaho ne ba ezizeñi ka za lilato la na ba bonisize Jehova? (b) Ha lu kolobezwa lu ka ba ni silikani se si cwañi ni Mulimu?

⁵ Hamulaho wa ku lukulula Maisilaele mwa Egepita, Jehova n’a iketezi ku ba amuhela sina ‘buswa bwa hae tota,’ ku ba lata ni ku ba sileleza ni ku ba eza “sicaba se si kenile.” Kono kuli Maisilaele ba ikole zona limbuyoti zeo, ne ba na ni ku bonisa ka likezo kuli ne ba lata Mulimu. Ne ba ezize cwalo ka ku lumela kuli ne ba ka eza ‘za bulezi kaufela Jehova.’ (Exoda 19:4-9) Mwa miteñi ya baapositola, Jesu na laezi balateleli ba hae kuli ba lute batu ba macaba kaufela, mi ba ne ba amuhezi lituto za hae ne ba kolobelizwe. Kuli ba be ni silikani se si nde ni Mulimu, ne ba na ni ku ba ni tumelo ku Jesu Kreste mi hamulaho ni ku kolobezwa.—Mateu 28:19, 20; Likezo 2:38, 41.

⁶ Litaba za mwa Mañolo ze li bonisa kuli Jehova u fuyolanga ba ba eza ni ku buluka buineelo bwa butokwa bwa ku mu sebeleza. Kuli Jehova a ba fuyole, Bakreste ba tokwa ku ineela ni ku kolobezwa. Lu ikatulezi ku pila ka likuka za Mulimu ni ku bata ketelelo ya hae. (Samu 48:14) Mi ha lu eza cwalo ku swana inge kuli Jehova u lu swala kwa lizoho ni ku lu etelela mwa nzila ye lu swanela ku zamaya ku yona.—Samu 73:23; Isaya 30:21; 41:10, 13.

7. Ki kabakalañi buineelo ni kolobezo ha li swanela ku ba liketo za ka butu?

⁷ Lilato la ku lata Jehova ni takazo ya ku mu sebeleza kona ze swanela ku lu susueza ku ineela ni ku kolobezwa. Ha ku na mutu ya swanela ku kolobezwa fela ka libaka la kuli mutu yo muñwi u mu taluseza kuli sa itutile ka nako ye telele kamba bakeñisa kuli balikani ba hae ba kolobezwa. Hañata bashemi ni Bakreste ba bañwi ba ba hulile ba kona ku susueza mutu kuli a kone ku singanyeka za ku ineela ni ku kolobezwa. Muapositola Pitrosi na susuelize bateelezi ba hae fa Pentekonta kuli ba “kolobezwe.” (Likezo 2:38) Kono ki luna beñi ka sibili ba ba swanela ku eza buineelo, mi ki ko ku lenga ni mutu ya swanela ku lu ezeza bona. Mi ki luna beñi ka sibili ba ba swanela ku ikatulela ku eza tato ya Mulimu.—Samu 40:8.

Ku Itukiseza Hande Kolobezo

8, 9. (a) Ki kabakalañi kolobezo ya limbumbu ha i si ya ka Mañolo? (b) Ba si ka kolobezwa kale ki zwelopili ye kuma kai ye ba swanela ku eza ba banca?

⁸ Kana banana ba kona ku eza buineelo hasamulaho wa ku ba ni zibo ye tokwahala? Mañolo ha bonisi lilimo ze tokwahala kuli mutu a kone ku kolobezwa. Nihakulicwalo, limbumbu ha li koni ku ba balumeli, ku bonisa tumelo, kamba ku eza buineelo ku Mulimu. (Likezo 8:12) Ha n’a ñola ka za Bakreste ba mwa miteñi  ya baapositola, caziba wa litaba za kale, Augustus Neander mwa buka ya hae ya General History of the Christian Religion and Church na ize: “Kwa makalelo ki ba bahulu fela ba ne ba kolobezwanga, bakeñisa kuli ki bona ba ne ba utwisisanga kuli kolobezo ni tumelo ne li zamaelela hahulu.”

⁹ Mi ha ku taha ku ba banca, ba bañwi ba kalanga ku utwisisa lituto za matatekelo ni ku li sebelisa ba sa li ba banyinyani, kono haili ba bañwi bona ba fitanga fa ku li utwisisa ha se ba hulile. Kono, ka ku swana ni ba bahulu, yo munca a si ka kolobezwa kale u swanela ku ba ni silikani se si nde ni Jehova, u lukela ku ba ya utwisisa hande lituto za matatekelo za mwa Mañolo, mi u swanela ku utwisisa hande ze amiwa mutu ha eza buineelo.

10. Ki mihato mañi ya swanela ku nga mutu pili a si ka eza kale buineelo ni ku kolobezwa?

¹⁰ Jesu n’a taluselize balutiwa ba hae ku luta ba banca lika kaufela za na ba laezi. (Mateu 28:20) Sa pili kikuli, ba banca ba lukela ku ba ni zibo ye nepahezi ya niti, ye ka ba konisa ku bonisa tumelo ku Jehova ni Linzwi la hae. (Maroma 10:17; 1 Timotea 2:4; Maheberu 11:6) Mi ku zwa fo, niti ya Mañolo ha se i fitile kwa pilu ya mutu, i ka mu susueza ku baka ni ku sikuluha ku zwa kwa mupilelo wa hae wa kale. (Likezo 3:19) Mi sa mafelelezo kikuli, mutu yo cwale u ka fita fa ku ba ni takazo ya ku ineela bupilo bwa hae ku Jehova ni ku kolobezwa, sina mwa na laelezi Jesu.

11. Ki kabakalañi ha lu swanela ku yanga kamita mwa musebezi wa ku kutaza pili lu si ka kolobezwa kale?

¹¹ Muhato o muñwi wa butokwa wa swanela ku nga mutu kuli a fite fa ku kolobezwa ki wa ku kutaza taba ye nde ya Mubuso. Musebezi wa ku kutaza ki ona musebezi wa butokwa wa file Jehova batu ba hae mwa mazazi a maungulo a. (Mateu 24:14) Kacwalo bahasanyi ba ba si ka kolobezwa ba kona ku ba ni tabo ya ku bulela za tumelo ya bona ku ba bañwi. Ku eza ona musebezi wo hape ku ba kalula kuli muta ba kolobezwa ite ba kutaze kamita ni ka mafulofulo mwa bukombwa bwa mwa simu.—Maroma 10:9, 10, 14, 15.

Kana Ku Na ni Se Si Mi Palelwisa ku Kolobezwa?

12. Ki lika mañi ze kona ku zina-zinisa ba bañwi kuli ba si ke ba kolobezwa?

¹² Batu ba bañwi ba kana ba zina-zina ku kolobezwa bakeñisa kuli ha ba lati ku amuhela misebezi ye taha hamulaho wa kolobezo. Ba lemuha kuli, kuli ba pile ka ku lumelelana ni likuka za Jehova ba ka tokwa ku eza licinceho ze tuna mwa bupilo bwa bona. Kamba mwendi ba kana ba saba kuli ku ka ba bela t’ata ku pila ka ku ya ka za tokwa Mulimu ku mutu ya kolobelizwe. Ba bañwi mane ba kana ba fa libaka la kuli: “Mwendi nako ye ñwi kwapili ni ka eza mulatu mi ni ka zusiwa mwa puteho.”

13. Mwa miteñi ya Jesu, ki lika mañi ze ne palelwisize batu ba bañwi ku ba balateleli ba Jesu?

¹³ Mwa miteñi ya Jesu, ba bañwi ne ba tuhelezi lika za ka butu ni mabasi ku ba palelwisa ku ba balutiwa ba hae. Muñoli yo muñwi n’a bulezi kuli u ka latelela Jesu kwa ka ya kaufela. Kono Jesu a bulela kuli hañata na si na mane ni fa ku samela toho ya hae ka nako ya busihu. Jesu ha n’a memile mutu yo muñwi ya na mu teeleza kuli a be mulutiwa wa hae, munna yo a talusa kuli na tokwa ku yo “pumbeka” bondat’ahe pili. Ku bonahala kuli munna yo n’a tabela ku ina fa ndu ku litela fo ba ta shwela bondat’ahe ku fita ku latelela pili Jesu ni kuli muta ba ta shwa bondat’ahe kona a na ta yo ba pumbeka. Mi kwa mafelelezo, mutu yo muñwi a talusa kuli pili a si ka latelela kale Jesu, n’a na ni ku yo “laezana” ni  ba ndu ya hae. Jesu na talusize kuli ona moya wa ku itiyehisa-tiyehisa cwalo u swana inge ku ‘itemuna ka ku talima lika za kwamulaho.’ Kacwalo ku bonahala kuli ba ba lika ku itiyehisa ka bomu, kamita ba ka fumananga mabaka fa ku hanela misebezi ya Sikreste.—Luka 9:57-62.

14. (a) Bo Pitrosi, Andreasi, Jakobo, ni Joani ne ba alabile cwañi pizo ya Jesu ya kuli ba yambe batu? (b) Ki kabakalañi ha lu sa swaneli ku zina-zina ku amuhela coko ya Jesu?

¹⁴ Kono mitala ya bo Pitrosi, Andreasi, Jakobo, ni Joani yona ya shutana ni yeo. Jesu ha na ba memile kuli ba mu latelele ni ku ba ba ba yamba batu, Bibele i li: “Cwale ba pakisa ba tuhela tunyandi twa bona, ba mu latelela.” (Mateu 4:19-22) Bakeñisa ku eza yona katulo yeo ka bubebe, ne ba konile ku iponela taluso ya manzwi a na ba bulelezi Jesu hamulaho, ha na ize: “Mu itwese coko ya ka, mi mu itute ku na; kakuli ni na ni musa ni pilu ye bunolo, mi mu ka fumanela mioya ya mina pumulo. Kakuli coko ya ka i bubebe, mi mulwalo wa ka ha u na bukiti.” (Mateu 11:29, 30) Nihaike kuli kolobezo i tisa musebezi o swana sina coko, Jesu u lu kolwisa kuli coko yeo i ka ba ye bubebe ni ye lu kona ku lwala mi i ka fumanisa mioya ya luna pumulo ye tuna.

15. Mutala wa Mushe ni Jeremia u bonisa cwañi kuli lwa kona ku sepa kuli Mulimu u ka lu tusa ha lu ka tokwa tuso?

¹⁵ Ku lukile ku ikutwa kuli mwendi ha lu na ku kona ku peta musebezi wa mutu ya kolobelizwe. Mushe ni Jeremia ni bona kwa makalelo ne ba ikutwile kuli ne ba si ke ba kona ku peta misebezi ya na ba file Jehova. (Exoda 3:11; Jeremia 1:6) Mulimu na ba tiisize cwañi? Mulimu n’a ize ku Mushe: “Ni ka ba ni wena.” Mi hape na sepisize Jeremia kuli: “Ni inzi ni wena ku ku lamulela.” (Exoda 3:12; Jeremia 1:8) Ni luna lwa kona ku ba ni buikolwiso bwa kuli Mulimu u ka lu tusa. Ku lata Mulimu ni ku mu sepa ku ka lu tusa ku tula moya wa ku kakanya kuli mwendi ha lu na ku kona ku pila ka buineelo bwa luna. Muapositola Joani na ñozi kuli: “Ha ku na sabo mwa lilato, kono lilato le li petehile li leleka sabo.” (1 Joani 4:18) Mwanana yo munyinyani u kona ku ba ni sabo haiba a zamaya a li nosi, kono u ba nga ni bundume bondat’ahe ha ba zamaya ni yena inge ba mu swalelezi kwa lizoho. Ni luna, haiba lu sepa Jehova ka pilu ya luna kaufela, u sepisa ‘ku lu lukiseza linzila za luna’ ha lu nze lu zamaya ni yena.—Liproverbia 3:5, 6.

Kezahalo Ye Kutekeha

16. Ki kabakalañi mutu ya kolobezwa ha swanela ku nweliswa luli ngumbu mwa mezi?

¹⁶ Hañata pili kolobezo i si ka eziwa kale ku fiwanga ngambolo ya ka Mañolo ye talusanga butokwa bwa kolobezo ya Sikreste. Kwa mafelelezo a ngambolo, linumwana li kupiwanga kuli li kone ku bonisa tumelo ya zona fa nyangela ka ku alaba lipuzo za kolobezo ze peli. (Maroma 10:10; mu bone kakwenda ka ka fa likepe 22.) Mi cwale linumwana za nweliswanga mwa mezi, ka ku  latelela mwa na kolobelelizwe Jesu ka sibili. Bibele i bonisa kuli Jesu ha sa kolobelizwe, “a pakisa ku zwa mwa mezi” kamba ‘ku omboka mwa mezi.’ (Mateu 3:16; Mareka 1:10) Kwa bonahala hande kuli, Joani Mukolobezi na nwelisize Jesu mwa mezi. * Ku nweliswa luli ngumbu mwa mezi ki sisupo se si swanela sa cinceho ye se lu ezize mwa bupilo bwa luna—ku swana inge kuli lu shwa kwa neku la mupilelo wa luna wa kale ni ku kalisa bupilo bo bunca bwa ku sebeleza Mulimu.

17. Linumwana za kolobezo ni bashalimeli ba kona ku bonisa cwañi likute kwa butokwa bwa kolobezo?

¹⁷ Kolobezo ki kezahalo ya butokwa mi hape ki nako ya tabo. Bibele i bonisa kuli Jesu na lapela ka nako ya na kolobezwa ki Joani mwa nuka ya Jordani. (Luka 3:21, 22) Ka ku latelela mutala wa Jesu, kacenu linumwana za kolobezo li swanela ku bonisa likute le li lukela kezahalo yeo. Mi bakeñisa kuli Bibele i lu eleza ku apala ka ku itikanelela mwa miinelo kaufela ya bupilo, kacwalo sihulu ha lu kolobezwa lu lukela ku apala litino za ku kolobezwa ka zona ze itikanelezi. (1 Timotea 2:9) Bashalimeli ni bona ba kona ku bonisa likute le li swanela ka ku teeleza ka tokomelo kwa ngambolo ya kolobezo ni ka ku buha ka likute linumwana ha li nze li kolobezwa.—1 Makorinte 14:40.

Limbuyoti Ze Ba Ikola Balutiwa Ba Ba Kolobelizwe

18, 19. Ki matohonolo ni limbuyoti mañi ze tiswa ki kolobezo?

¹⁸ Ha se lu ineezi bupilo bwa luna ku Mulimu ni ku kolobezwa, lu ba kalulo ya lubasi lo lu ipitezi. Sapili kikuli, Jehova u ba Ndat’a luna ni Mulikan’a luna. Pili lu si ka kolobezwa kale ne lu kauhani ku Mulimu; kono cwale ha se lu kolobelizwe lu kutiselizwe ku Mulimu. (2 Makorinte 5:19; Makolose 1:20) Ka sitabelo sa tiululo sa Kreste, lu sutelezi ku Mulimu mi ni yena u sutelela ku luna. (Jakobo 4:8) Mupolofita Malaki u talusa kuli Jehova wa teelezanga ni ku utwa ba ba itusisa ni ku biza fa libizo la hae, mi u ñolanga mabizo a bona mwa buka ya hae ya kupulo. Mulimu u li: “Ba ka ba ba ka . . . mi ni ka ba shwela makeke sina mutu h’a shwela mwan’a hae makeke ya mu sebeleza.”—Malaki 3:16-18.

¹⁹ Kolobezo hape i lu konisa ku ba kalulo ya lubasi lwa mizwale lwa mwa lifasi kamukana. Muapositola Pitrosi ha na buzize ka za limbuyoti ze ba ka fiwa balutiwa ba Kreste bakeñisa buitomboli bo ba ezize, Jesu na alabile ka ku sepisa kuli: “Mutu kaufela ya tuhezi mandu, kamba bahabo, kamba likaizeli, nihaiba ndat’ahe kamba m’ahe, kamba bana; kamba masimu, kabakala Libizo la ka, u ka amuhela hahulu ku fita, mi u ka ca sanda sa bupilo bo bu sa feli.” (Mateu 19:29) Lilimo-limo hamulaho wa fo, Pitrosi n’a ñozi za “kopano kaufela ya mizwale, NW,” ya “mwa lifasi.” Pitrosi ka sibili na tusizwe mi na ikozi limbuyoti za kopano ya mizwale ye lilato, mi ku kona ku ba nto ye swana ni ku luna.—1 Pitrosi 2:17; 5:9.

20. Ki sepo mañi ye makaza ye tiswa ki kolobezo?

²⁰ Fahalimu a zeo, Jesu na bulezi kuli ba ba mu latelela ba ka “ca sanda sa bupilo bo bu sa feli.” Kaniti, buineelo ni kolobezo li lu fa sepo ya ku “amuhela bupilo bo bu sa feli”—bona bupilo bwa kamita mwa lifasi le linca la Mulimu. (1 Timotea 6:19) Wo luli ki mutomo o munde wa kwapili o lu kona ku itomela, luna hamohocwalo ni mabasi a luna? Yona sepo ye makaza yeo i ka lu tusa ku “zamaya ka Libizo la [Muñ’a] Bupilo Mulimu wa luna, kamita ni ku ya ku ile.”—Mika 4:5.

[Litaluso za kwatasi]

Kana Mwa Kona ku Talusa?

• Lu swanela ku ezañi ka za lilato la lu bonisize Jehova, mi ki kabakalañi?

• Ki zwelopili ya kwa moya ye kuma kai ya swanela ku bonisa mutu pili a si ka kolobezwa kale?

• Ki kabakalañi ha lu sa swaneli ku tuhelela sabo ya ku wa kamba ku zina-zina ku amuhela misebezi ku lu palelwisa ku kolobezwa?

• Ki limbuyoti mañi ze ipitezi ze ba kona ku ba ni zona balutiwa ba Jesu Kreste ba ba kolobelizwe?

[Lipuzo za Tuto]

[Siswaniso se si fa likepe 26]

“Kiñi se si ka ni hanisa ku kolobezwa?”

[Maswaniso a fa likepe 29]

Kolobezo ki kezahalo ya butokwa mi hape ki nako ya tabo