Lipuzo Ze Zwa kwa Babali

Lu kona ku itutañi kwa taelo ye kwa Exoda 23:19 ye li: “U si ke wa apea pulinyana ka muzilili wa m’a yona”?

Taelo ye ya Mulao wa Mushe, ye fumaneha halalu mwa Bibele, i kona ku lu tusa ku utwisisa maikuto a Jehova a swanela, mukekecima wa hae, ni lilato la hae. Hape i koñomeka mw’a toyezi bulapeli bwa buhata.—Exoda 34:26; Deuteronoma 14:21.

Ku apea pulinyana kamba folofolo ye ñwi ka muzilili wa m’a yona ne ku ka ba ku lwanisa tukiso ya Jehova ka za libupiwa za hae. Mulimu n’a lukisize kuli muzilili wa puli ya mushemi u fepe pulinyana kuli i hule. Ka ku ya ka za na bulezi caziba yo muñwi, ku apea pulinyana mwa muzilili wa m’a yona ki ku “shwaulisa silikani sa mwahal’a mushemi ni mwana sa tomile Mulimu ni ku si kenisa.”

Hape, ba bañwi ba akaleza kuli ku apea pulinyana mwa muzilili wa m’a yona mwendi ne li sizo sa sihedeni se ne si eziwanga kuli pula i nele. Haiba ki cwalo, taelo yeo neikana i silelelize Maisilaele kwa likezo za bulapeli za butoto ni ze situhu za macaba a ne ba pila ni ona. Mulao wa Mushe sihulu ne u hanisa Maisilaele ku ya ka mikwa ya macaba.—Livitike 20:23.

Mi ku zwa fo, mulao wo luli u lu bonisa mufelañeke wa Jehova. Mane Mulao ne u na ni litaelo li sikai ze swana ze ne nyaza ku nyandisa lifolofolo ni milao ye ne i hanisa ku eza lika ka ku sa lumelelana ni mo li inezi libupiwa. Ka mutala, mwa Mulao ne ku na ni litaelo ze ne hanisa ku eza folofolo sitabelo konji haiba se i inzi ni m’a yona ka mazazi a bat’o likana a supile. Mi litaelo zeo hape ne li hanisa ku bulaya folofolo ni mwan’a yona mwa lizazi li li liñwi, ni ze ne hanisa ku ungelela nyunywani ya mushemi ni mai kamba bana ba yona fa siyaleto.—Livitike 22:27, 28; Deuteronoma 22:6, 7

Kaniti, Mulao ne u si fela sikutu sa litaelo ni likaniso ze tatezani. Tuso ye ñwi ye lu fumana mwa Mulao ki ya kuli, likuka za ona li lu suña maikuto a bonisa luli tulemeno twa Jehova to tu komokisa.—Samu 19:7-11.

[Manzwi a bañi ba siswaniso fa likepe 31]

©Timothy O’Keefe/Index Stock Photography