‘Mu Ye Cwale Mu Lute Macaba, Mu Ba Kolobeze’

“Mu ye cwale, mu lute macaba kaufela, mu ba kolobeze. . . . Mu ba lute ku mamela ze ni mi laezi kaufela.” —MATEU 28:19, 20.

1. Ki katulo mañi ye ne si ezize sicaba sa Isilaele kwatas’a Lilundu la Sinai?

LILIMO ze bata iba ze 3,500 kwamulaho k’o, sicaba mutumbi ne si ezize buitamo ni Mulimu. Ha ne ba kubukani kwatas’a Lilundu la Sinai, Maisilaele ba bulela fa nyangela kuli: ‘Z’a bulezi kaufela Muñ’a Bupilo lu ka li eza.’ Ku zwa ka yona nako yeo, Isilaele a ba sicaba se si ineezi ku Mulimu, bona “buswa” bwa hae. (Exoda 19:5, 8; 24:3) Ne ba libelezi ku silelezwa ki Mulimu ni ku pila mwa naha ye “buba mabasi ni linosi” mwahal’a masika ni masika.—Livitike 20:24.

2. Ki silikani mañi seo batu ba kona ku ba ni sona ni Mulimu kacenu?

² Kono sina mwa na bulelezi Asafi muñoli wa samu, Maisilaele ne ‘ba si ka mamela bulikani bwa Mulimu, mi ne ba hanile ku ya ka milao ya hae.’ (Samu 78:10) Ne ba palezwi ku buluka buitamo bo ne ba itamile bokukw’a bona ni Jehova. Mi kwa nalule-lule, sicaba sa Isilaele sa luza silikani sa sona se si ipitezi ni Mulimu. (Muekelesia 5:4; Mateu 23:37, 38) Kacwalo Mulimu a ‘isa mamelelo ku bamacaba ni ku nga ku bona sicaba sa libizo la hae.’ (Likezo 15:14, NW) Mi mwa mazazi a maungulo a, u sweli ku kubukanya “buñata bo butuna bwa batu, ku si na ya kona ku ba bala; ba zwa mwa macaba kaufela, ni mwa mishobo, ni mwa masika, ni mwa lipuo kaufela,” ba ba shaela ka tabo kuli: “Ku pilisa ki kwa Mulimu wa luna ya inzi mwa Lubona, ni kwa Ngunyana!”—Sinulo 7:9, 10.

3. Ki mihato mañi ya swanela ku nga mutu kuli a be ni silikani sa ka butu ni Mulimu?

³ Kuli a be mwahal’a ba ba ikola sona silikani se si nde seo ni Mulimu, mutu u swanela ku ineela ku Jehova mi u swanela ku bonisa bona buineelo bo fa nyangela ka ku nweliswa mwa  mezi. Mutu ha ineela ni ku kolobezwa u ipeya ku utwa manzwi a Jesu a n’a bulelezi balutiwa ba hae, a li: “Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela.” (Mateu 28:19, 20) Maisilaele ne ba teelelize kwa manzwi a n’a ba balela Mushe ku zwelela mwa “buka ya bulikani.” (Exoda 24:3, 7, 8) Mi kona kuli, ne ba zibile kuli buikalabelo bwa bona ku Jehova ne li bufi. Ka ku swana kacenu, mutu a si ka nga kale muhato wa ku kolobezwa u tokwa ku ba ni zibo ye nepahezi ya tato ya Mulimu sina mo i inezi mwa linzwi la Mulimu, yona Bibele.

4. Ki lika mañi za swanela ku eza mutu kuli a fite ku ze konisa za kolobezo? (Mu bone kakwenda ka ka fahalimu.)

⁴ Kwa iponahaza hande kuli Jesu n’a bata kuli balutiwa ba hae ba be ni tumelo ye tomile fa mutomo o tiile pili ba si ka kolobezwa kale. N’a si ka laela fela balateleli ba hae kuli ba ye ba yo eza balutiwa kono hape ni ku yo ba luta ‘ku mamela za n’a ba laezi kaufela.’ (Mateu 7:24, 25; Maefese 3:17-19) Kacwalo hañata ba ba fita ku ze konisa za kolobezo ki batu ba ba itutile Bibele ka likweli kamba nihaiba silimo kamba lilimo ze peli, ili ku bona teñi kuli katulo ya bona hasi ya kayeye kamba ya ku mata-mata fela. Ka nako ya kolobezo, linumwana za kolobezo li alabanga ee kwa lipuzo ze peli za butokwa hahulu. Bakeñisa kuli Jesu n’a bulezi kuli ‘ee ya luna i be ee, awa, i be awa,’ lu ka tusiwa hahulu ha lu ka nyakisisa ka butungi butokwa bwa lipuzo ze peli zeo za kolobezo.—Mateu 5:37.

Ku Baka ni Buineelo

5. Ki mihato mañi ya butokwa ye mibeli ye koñomekwa ki puzo ya pili ya kolobezo?

⁵ Puzo ya pili ya kolobezo i buza numwana wa kolobezo ka za haiba u bakezi mupilelo wa hae wa kale ni ku ineela bupilo bwa hae ku Jehova kuli a eze tato ya hae. Puzo ye i koñomeka mihato ye mibeli ya butokwa ya swanela ku nga mutu pili a si ka kolobezwa kale, yona ya ku baka ni buineelo.

6, 7. (a) Ki kabakalañi linumwana kaufela za kolobezo ha li swanela ku baka? (b) Ki licinceho mañi za swanela ku eza mutu ha sa bakile?

⁶ Ki kabakalañi mutu ha swanela ku baka pili a si ka kolobezwa kale? Muapositola Paulusi u talusa kuli: “Ni luna kaufela ne lu li ba ku bona pili, lu nze lu ya ka litakazo za nama ya luna.” (Maefese 2:3) Pili lu si ka ba kale ni zibo ye nepahezi ya tato ya Mulimu, ne lu pila ka ku ya ka mikwa ni likuka za lifasi. Mupilelo wa luna ne u kukuezwa ki mulimu wa lifasi le, yena Satani. (2 Makorinte 4:4) Kono ha se lu zibile tato ya Mulimu, lu ikatulela ku pila ‘i si ke ka ku ya litakazo za batu, kono ka se si latwa ki Mulimu.’—1 Pitrosi 4:2.

⁷ Mupilelo o munca wo u tisa limbuyoti ze ñata. Mi sa butokwa ni ku fita kikuli mupilelo o cwalo u kwalula nzila ya ku ba ni silikani se sinde ni Jehova. Davida n’a swaniselize ona mupilelo o cwalo kwa pizo ya ku kena mwa “Tabernakele”  ni ‘lilundu le li kenile’ la Mulimu—ili tohonolo ye tuna luli. (Samu 15:1) Kaniti Jehova h’a na ku biza mañi ni mañi, kono u ka biza fela ba ba na ni ‘mizamao ye lukile, ba ba eza ka ku sepahala, ni ba ba bulela niti mo i li teñi mwa lipilu za bona.’ (Samu 15:2) Bakeñisa kuli pili lu si ka ituta kale niti ne lu na ni miinelo ye shutana-shutana, kuli lu pile ka ku lumelelana ni Mañolo, lu kana lwa tokwa ku eza licinceho ze ñwi cwalo—mwa muzamao ni mwa butu bwa luna. (1 Makorinte 6:9-11; Makolose 3:5-10) Ze tisanga kuli lu eze licinceho ze cwalo ki ku baka—kona ku inyaza hahulu bakeñisa mupilelo wa luna wa kale ni ku ba ni takazo ye tuna ya ku tabisa Jehova. Seo si tahisanga kuli lu fetuhe ka ku tala—ku yubeka mupilelo wa silifasi wa buitati, ni ku ndongwama mupilelo o tabisa Mulimu.—Likezo 3:19.

8. Lu ineelanga cwañi ku Mulimu, mi buineelo bu zamaelela cwañi ni kolobezo?

⁸ Kalulo ya bubeli ya puzo ya pili ya kolobezo i buzanga linumwana ka za haiba li ineezi ku Jehova kuli li eze tato ya hae. Buineelo ki muhato wa butokwa hahulu o tokwa ku ngiwa pili mutu a si ka kolobezwa kale. Lu ineelanga ku Jehova ka tapelo, mi mwa tapelo yeo lu talusanga takazo ya luna ya ku ifana ku Jehova ka Kreste. (Maroma 14:7, 8; 2 Makorinte 5:15) Ha lu eza buineelo, Jehova u fitanga fa ku ba Mulen’a luna ni Muñ’a luna, mi sina Jesu lu tabelanga ku eza tato ya Mulimu. (Samu 40:8; Maefese 6:6) Yona sepiso ya butokwa yeo ku Jehova i eziwanga fela hañwi. Bakeñisa kuli lu ineelanga ku Jehova kwa mukunda, kacwalo ka nako ya kolobezo ha lu paka ka mulomo fa nyangela, lu zibisanga bote kuli lu ezize buineelo bwa butokwa ku Ndat’a luna wa kwa lihalimu.—Maroma 10:10.

9, 10. (a) Ku eza tato ya Mulimu ku kopanyelezañi? (b) Makwambuyu ba Nazi ne ba bonisise cwañi kuli mane nihaiba bona ne ba ziba buineelo bwa luna?

⁹ Ku latelela mutala wa Jesu wa ku eza tato ya Mulimu ku kopanyelezañi? Jesu n’a bulelezi balutiwa ba hae kuli: “Mutu h’a lata ku ni latelela, u na ni ku itoboha, a lwale [kota ya hae ya linyando, NW,] mi a ni siyale mwamulaho.” (Mateu 16:24) Jesu mwa liñolo le n’a pundile lika ze talu ze lu swanela ku eza. Sa pili, lwa “itoboha.” Fo ku talusa kuli lu lukela ku hanela litakazo za ku sa petahala kwa luna za buitati, kono lu swanela ku utwa likelezo ni ku latelela ketelelo ya Mulimu. Sa bubeli, lu ‘lwala kota ya luna ya linyando.’ Mwa miteñi ya Jesu kota ya linyando ne i swaniseza tompololo ni ku sukuluka. Ka ku ba Bakreste, lwa ziba kuli ka linako ze ñwi lu ka nyanda kabakala taba ye nde. (2 Timotea 1:8) Nihaike kuli lifasi li kana la lu sheununa ni ku lu nyaza, ni luna ka ku swana Kreste, ‘ha lu tokomeli lishwau’ leo, lu tabile ka ku ziba kuli lu eza ze tabisa Mulimu. (Maheberu 12:2) Mi sa mafelelezo, lu latelela Jesu ka ku mu ‘siyala mwamulaho.’—Samu 73:26; 119:44; 145:2.

¹⁰ Kwa tabisa luli kuli mane nihaiba balwanisi ba bañwi ba ziba butokwa bwa buineelo bo ba ezize Lipaki za Jehova bwa ku sebeleza fela Mulimu yena a nosi. Ka mutala, mwa munganda wa tukufazo wa ba Nazi mwa Germany wa Buchenwald, Lipaki ba ne ba hanile ku latula tumelo ya bona ne ba tokwa ku nyatela pampili ye ne na ni manzwi a latelela: “Ni sa li Muituti wa Bibele mi ha ni na ku sinya buitamo bwa ka bo ne ni itamile ku Jehova.” Kaniti luli ona manzwi ao a bonisa hande mayemo a batanga ba Mulimu kaufela ba ba sepahala ni ba ba ineezi!—Likezo 5:32.

 Ku Zibahala Sina Yo Muñwi wa Lipaki za Jehova

11. Ki tohonolo ye cwañi ya banga ni yona mutu ya kolobezwa?

¹¹ Puzo ya bubeli ya kolobezo pili i buza numwana ka za haiba wa utwisisa kuli kolobezo ya hae i ka mu zibahaza sina yo muñwi wa Lipaki za Jehova. Mutu ha sa nwelisizwe, u fitanga fa ku ba sikombwa se si sumekezwi se si bizwa ka libizo la Jehova. Kolobezo ki tohonolo ye tuna mi ki buikalabelo bo bu buima. Mi hape mutu ya kolobezwa u fita fa ku ba ni sepo ya bupilo bwa kamita, ibile fela a zwelapili ku sepahala ku Jehova.—Mateu 24:13.

12. Ki buikalabelo mañi bo bu tisiwanga ki tohonolo ya ku bizwa ka libizo la Jehova?

¹² Kaniti ku bizwa ka libizo la Mulimu ya m’ata, yena Jehova, ki tohonolo ye tuna hahulu. Mupolofita Mika n’a ize: “Macaba a zamaya, se siñwi ni se siñwi, ka libizo la mulimu wa sona; haili luna, lu ka zamaya ka Libizo la [Muñ’a] Bupilo Mulimu wa luna, kamita ni ku ya ku ile.” (Mika 4:5) Kono tohonolo yeo i tisanga buikalabelo. Lu swanela ku lika ka t’ata ku pila bupilo bo bu tisa tumbo kwa libizo la Jehova, lona le lu bizwa ka lona. Sina fela muapositola Paulusi ha n’a hupulisize Bakreste ba kwa Roma, haiba mutu a pila ka nzila ye sa kuteki Mulimu, libizo la Mulimu la “nyefulwa,” kamba ku tompololwa.—Maroma 2:21-24.

13. Ki kabakalañi batanga ba Jehova ba ba ineezi ha ba na ni buikalabelo bwa ku kutaza za Mulimu wa bona?

¹³ Mutu ha fita fa ku ba yo muñwi wa Lipaki za Jehova, hape u amuhelanga musebezi wa ku kutaza za Mulimu. Jehova n’a memile sicaba sa Isilaele se ne si ineezi ku yena kuli si be lipaki za hae ilikuli si zibahaze bumulimu bwa hae bwa kamita. (Isaya 43:10-12, 21) Kono sicaba seo sa palelwa ku peta musebezi wa sona, mi kwa mafelelezo Jehova a si yubeka. Kacenu, Bakreste ba niti ba nyakalaliswa ki tohonolo ya ku kutaza za Jehova. Lu kutazanga za Mulimu bakeñisa kuli lwa mu lata mi lu nyolelwa ku keniswa kwa libizo la hae. Lu kona cwañi ku kuza inge lu ziba niti ka za Ndat’a luna wa kwa lihalimu ni milelo ya hae? Lu ikutwa sina mwa n’a ikutwezi muapositola Paulusi ha n’a ñozi kuli: “Swanelo i ni tamile; mi ku maiba ku inzi ku na, ha ni sa buleli Evangeli.”—1 Makorinte 9:16.

14, 15. (a) Kopano ya Jehova i lu tusa cwañi ku hula kwa moya? (b) Ki litukiso mañi ze li teñi ze lu tusa ku hula kwa moya?

¹⁴ Puzo ya bubeli ya kolobezo hape i hupulisanga numwana ka za buikalabelo bwa hae bwa ku sebelisana ni kopano ye etelelwa ki moya wa Jehova. Ha lu sebelezi Jehova lu nosi, mi lu tokwa tuso, ni susuezo ya “kopano kaufela ya mizwale.” (1 Pitrosi 2:17, NW; 1 Makorinte 12:12, 13) Kopano ya Mulimu i peta kalulo ya butokwa hahulu kwa ku lu tusa ku hula kwa moya. Kopano ya Mulimu i lu fa libuka za Bibele ze ñata ze lu tusa ku ekeza kwa zibo ye nepahezi, ku eza likatulo ze nde muta lu kopana ni matata, ni ku hulisa silikani se si nde ni Mulimu. Ka ku swana ni me ya bona teñi kuli mwan’a hae wa fepiwa ni ku babalelwa hande, “mutanga ya sepahala, ya na ni kutwisiso” ni yena u lu fa lico za kwa moya ze ñata ka nako ye lukela, ilikuli lu kone ku hulisa silikani sa luna ni Mulimu.—Mateu 24:45-47; 1 Matesalonika 2:7, 8.

¹⁵ Kwa mikopano ye ba banga ni yona ka sunda, batu ba Jehova ba lutiwanga tuto ye swanela mi ba susuezwanga kuli ba be Lipaki za Jehova ba ba sepahala. (Maheberu 10:24, 25) Sikolo sa Bukombwa sa Teokratiki si lu luta ku ba babuleli ba fa nyangela, mi Mukopano wa Sebelezo u lu bakanya kuli lu kone ku aba lushango  ka bunangu. Kwa mikopano ya luna ni ka tuto ya luna ya ka butu ya libuka za Bibele, lwa iponelanga ka mo moya wa Jehova u zamaiseza kopano ya hae. Ka ku itusisa zona litukiso za kamita zeo, Mulimu u lu lemusa likozi, u lu luta ku ba likombwa ze buanyu, mi u lu tusa ku zwelapili ku tona kwa moya.—Samu 19:7, 8, 11; 1 Matesalonika 5:6, 11; 1 Timotea 4:13.

Ze Lu Susuezanga ku Kolobezwa

16. Ki nto mañi ye lu susuezanga ku ineela bupilo bwa luna ku Jehova?

¹⁶ Kacwalo lipuzo ze peli za kolobezo li hupulisanga linumwana ka za butokwa bwa kolobezo ya mwa mezi ni misebezi ye ba ka tokwa ku eza hamulaho. Kono, cwale ki nto mañi ye swanela ku ba susueza ku kolobezwa? Ha ku na mutu ya lu hapelezanga ku kolobezwa, kono ki Jehova ya lu ‘hohanga’ kuli lu be balutiwa ba ba kolobelizwe. (Joani 6:44) Bakeñisa kuli “Mulimu u lilato,” u busa pupo kaufela ka lilato, isi ka ku hapeleza. (1 Joani 4:8) Lu hohelwa ku Jehova bakeñisa sishemo ni ka mo a sebelisanela ni luna. Jehova n’a lu file Mwan’a hae wa libanda, mi u lu sepisa nako ye nde ya kwapili. (Joani 3:16) Mi ka ku lemuha zeo kaufela, ni luna lu susuezwa ku mu fa bupilo bwa luna ka ku ineela ku yena.—Liproverbia 3:9; 2 Makorinte 5:14, 15.

17. Ki kwa lika mañi ko lu si ka ineela bupilo bwa luna?

¹⁷ Ha lu ineelangi bupilo bwa luna kwa muhupulo wa batu kamba kwa musebezi o muñwi cwalo, kono lu ineelanga ku Jehova yena ka sibili. Musebezi wa file Jehova batu ba hae u ka cinca, kono buineelo bwa bona ku yena bona ha bu na ku cinca. Ka mutala, musebezi wa n’a file Jehova ku Abrahama u shutanela kwahule ni musebezi wa n’a file Jeremia. (Genese 13:17, 18; Jeremia 1:6, 7) Kono sibeli sa bona ne ba petile musebezi wa n’a ba file Mulimu kakuli ne ba lata Jehova mi ne ba tabela ku eza tato ya hae ka busepahali. Ka nako ye ya maungulo, balateleli ba Kreste kaufela ba ba kolobelizwe ba lika ka t’ata ku latelela taelo ya Kreste ya ku kutaza taba ye nde ya Mubuso ni ku eza balutiwa. (Mateu 24:14; 28:19, 20) Ha lu eza musebezi wo ka pilu kaufela lu bonisa hande kuli lwa lata Ndat’a luna wa kwa lihalimu mi lu bonisa kuli lu ineezi luli ku yena.—1 Joani 5:3.

18, 19. (a) Ha lu kolobezwa, ki taba mañi ye lu zibahaza fa nyangela? (b) Ku ka nyakisiswañi mwa taba ye tatama?

¹⁸ Kaniti, kolobezo i libisa kwa limbuyoti ze ñata, kono hasi muhato o lu swanela ku nga ka likesha. (Luka 14:26-33) Kolobezo ki muhato o swanela ku ngiwa ka butokwa ku fita musebezi ufi kamba ufi. (Luka 9:62) Ha lu kolobezwa, se lu eza luli ki ku zibahaza fa nyangela taba ye li: “Mulimu ya bulelwa mo, ki Yena Mulimu wa luna wa kamita ni ku ya ku ile; ki Yena ya ka lu zamaisa ku isa kwa lifu.”—Samu 48:14.

¹⁹ Taba ye tatama i ka nyakisisa lipuzo ze ñwi ze kona ku buziwa ka za kolobezo ya mwa mezi. Kana ku na ni mabaka a kona ku palelwisa mutu ku kolobezwa? Kana ku na ni buhulu bo bu tomilwe fa kona ku kolobelezwa mutu? Bote ba kona cwañi ku bonisa likute kwa kolobezo?

Kana Mwa Kona ku Talusa?

• Ki kabakalañi Mukreste kaufela ha lukela ku baka pili a si ka kolobezwa kale?

• Buineelo ku Mulimu bu kopanyelezañi?

• Ki buikalabelo mañi bo bu tisiwanga ki tohonolo ya ku bizwa ka libizo la Jehova?

• Ki nto mañi ye swanela ku lu susueza ku nga muhato wa ku kolobezwa?

[Lipuzo za Tuto]

[Mbokisi/Siswaniso se si fa likepe 22]

LIPUZO ZE PELI ZA KOLOBEZO

Fa mutomo wa sitabelo sa Jesu Kreste, kana se mu bakezi libi za mina ni ku ineela ku Jehova kuli mu eze tato ya hae?

Kana mwa utwisisa kuli buineelo ni kolobezo ya mina li mi zibahaza ku ba yo muñwi wa Lipaki za Jehova ka ku swalisana ni kopano ya Mulimu ye zamaiswa ka moya wa hae?

[Siswaniso se si fa likepe 23]

Buineelo ki sepiso ya butokwa ye lu eza ku Jehova ka tapelo

[Siswaniso se si fa likepe 25]

Musebezi wa luna wa ku kutaza u bonisa kuli lu ineezi ku Mulimu