Mwa Kona ku Ba ni Tabo ya ku Utwisisa Bibele

MWA Bibele ku na ni litaba za niti ze zwa ku Mulimu. I lu taluseza mulelo wa bupilo, ze tahisa manyando a batu, ni za nako ya bona ya kwapili. I lu luta mwa ku bela ni tabo, mwa ku fumanela balikani, ni mwa ku tatululela hande matata. Mi sa butokwa ni ku fita, lu ituta ka za Mubupi ni Ndat’a luna wa kwa lihalimu, yena Jehova. Zibo ye cwalo ya lu tabisa mi i lu fa bupilo bo bunde.

Mwa Bibele, ku ba ni zibo ya Mulimu ku swaniselizwe kwa ku ca. Jesu n’a ize: “Mutu h’a na ku pila buhobe fela, kono u ka pila ni ona manzwi kaufela a’ zwa mwa mulomo wa Mulimu.” (Mateu 4:4; Maheberu 5:12-14) Sina fela ha lu tokwa ku ca lico ze tiisa mubili ka zazi kuli lu zwelepili ku pila, lu tokwa hape ku balanga Linzwi la Mulimu kamita kuli lu kone ku fumana bupilo bo bu sa feli bwa sepisize Mulimu.

Lwa ikolanga ku ca bakeñisa kuli Jehova u lu bupile kuli lu ikolange lico ni kuli ku ca lico kwa lu kulisanga. Kono lu na ni butokwi bo buñwi bo lu lukela ku taleleza haiba lu bata ku ba ni tabo. Jesu n’a ize: “Tabo ki ya ba ba lemuha butokwi bwa bona bwa kwa moya.” (Mateu 5:3, NW) Lwa kona ku ba ni tabo ha lu utwisisa Linzwi la Mulimu.

Kiniti kuli ba bañwi ku ba belanga t’ata ku utwisisa Bibele. Ka mutala, mu kana mwa tokwa ku tusiwa kuli mu utwisise mañolo a’ bulela ka za lizo ze mu sa zibi kamba a itusisa liswanisezo. Mi hape ku na ni bupolofita bo bu ñozwi ka puo ya swanisezo ye kona fela ku utwisiswa ka ku bala mañolo a mañwi mwa Bibele a bulela za taba ye swana.  (Daniele 7:1-7; Sinulo 13:1, 2) Nihakulicwalo, mwa kona luli ku fita fa ku utwisisa Bibele. Mu kona cwañi ku ba ni buikolwiso bo bu cwalo?

Batu Kaufela Ba Kona ku Utwisisa Bibele

Bibele ki Linzwi la Mulimu. Mwa Bibele Mulimu u lu taluseza mulelo wa hae. Kana Mulimu n’a ka fa batu buka ye sa utwisisehi kamba ye kona fela ku utwisiswa ki batu ba ba itutile hahulu? Batili, Jehova n’a si ke a ba ni lunya lo lu cwalo. Kreste Jesu n’a ize: ‘Ndat’ahe mutu ki ufi ku mina, ya ka fa mwan’a hae noha h’a kupile tapi? Kamba h’a kupa lii, a ka mu fa kabanze? Mbali mina ba ba na ni lunya, mu ziba ku fa bana ba mina lika ze nde, Ndate ya kwa lihalimu u ka mi fita hahulu mwa ku fa Moya o Kenile ku ba ba u kupa ku yena.’ (Luka 11:11-13) Kacwalo mwa kona ku ba ni buikolwiso bwa kuli mwa kona ku utwisisa Bibele, ni kuli haiba mu kupa Mulimu ka pilu i liñwi, u ka mi fa tuso ye mu tokwa kuli mu utwisise Linzwi la hae. Esi mane nihaiba banana ba banyinyani ba kona ku utwisisa lituto za makalelo za Bibele!—2 Timotea 3:15.

Nihaike kuli lu tokwa ku ikataza kuli lu utwisise Bibele, ku eza cwalo ku kona ku lu tiisa ni ku lu susueza. Jesu a man’o zusiwa kwa bafu, n’a bonahezi kwa balutiwa ba hae ba babeli mi a ba bulelela ka za bupolofita bwa mwa Bibele. Taba ya Luka i bala kuli: “A kala ka Mushe, a isa kwa bapolofita kaufela, inz’a ba taluseza mwa mañolo kaufela z’a bulezwi ka zona.” Ki lifi ze ne zwile mwa puhisano yeo? Manzibwana ao ha ne ba nze ba nahana ze ne ba itutile, balutiwa ba bulelelana ba li: “Ha lu li, lipilu za luna ne li tuka mwa lifuba za luna, ha n’a lu bulelisa mwa nzila, a lu taluseza Mañolo?” (Luka 24:13-32) Ku utwisisa Linzwi la Mulimu ne ku tabisize balutiwa ba babeli bao kakuli ne ku tiisize tumelo ya bona mwa lisepiso za Mulimu mi ne ku ba file sepo ye tiile ya nako ya kwapili.

Ku fita ku ba nto ye katalisa, ku utwisisa Linzwi la Mulimu kwa tabisa mi kwa tusa, ku tabisa sina ku ca lico ze tabusa. Mu lukela ku ezañi kuli mu kone ku utwisisa Linzwi la Mulimu? Taba ye tatama i bonisa mo mu kona ku bela ni tabo ka ku ba ni zibo ya “ku ziba za Mulimu.”—Liproverbia 2:1-5.

[Siswaniso se si fa likepe 4]

Sina ndate ya lilato, Jehova u lu fa moya o kenile kuli u lu tuse ku utwisisa Bibele