Ku Fita kwa Pilu ya Mwanana

KANA mu kile mwa ikutwa bumaswe ha ne mu boni mwanana ya bapala lipapali za mifilifili? Lipapali ze cwalo se li atile hahulu nihaiba kwa banana ba banyinyani hahulu, bakeñisa kuli mifilifili ki kale i ata hahulu mwa lipapali. Mu kona ku tusa cwañi mwanana kuli a bapalange lipapali ze nde ku fita ku bapalanga lipapali za mifilifili? Bo Waltraud, Lipaki za Jehova ba se ba bile balumiwa ka nako ye telele mwa Africa, ne ba fumani nzila ya ku tusa ka yona mwanana yo muñwi kuli a bapalange lipapali ze nde.

Bakeñisa ndwa ye ne kolota mwa naha ya bona, bo Waltraud ne ba na ni ku tunuha mwateñi ni ku ya kwa naha i sili ya mwa Africa. Teñi k’o ba yo kalisa ku ituta Bibele ni bomahe mwanana wa mushimani wa lilimo ze ketalizoho. Ha ne ba potelanga bomahe, mwanana yo n’a bapalisanga katobolo, ka ne ka li kona fela kabapaliso ka hae. Bo Waltraud ne ba si ka bona kale mwanana yo inge a supisa katobolo kao kwa nto ye ñwi, kono kamita n’a ka kwalaulanga ni ku ka kwala, inge mutu ya longa mwateñi malumo cwalo.

Bo Waltraud ba buza mwanana yo ba li: “Werner, kuli wa ziba libaka ha ni pila mwa naha mo? Ni pila mwa naha mo bakeñisa ndwa—ne ni na ni ku baleha mwa naha ya hesu ka ku saba batu ba ba maswe ba ne ba kunupanga batu ka ku itusisa litobolo ze swana ni katobolo ka hao. Kana u nahana kuli ku kunupa batu cwalo ki ko kunde?”

Werner a alaba ka ku swaba a li: “Batili, ku maswe.”

Bo Waltraud ba li: “U nepile.” Kihona cwale ba mu buza kuli: “Kana wa ziba libaka ha ni to potelanga bomaho ni wena sunda ni sunda? Ki bakeñisa kuli Lipaki za Jehova ba bata ku tusa batu kuli ba pile ka kozo ni Mulimu ni batu ba bañwi.” Bo Waltraud ha se ba utwani ni bomahe mwanana yo, ba mu bulelela kuli: “Ha u ka ni fa katobolo ka hao, ni ka ka yumba, mi ni ku sepisa ku ku fa kamota ka ku bapalisa ka lori ka mawili a mane.”

Werner a ba fa katobolo ka hae ka na bapalisanga. Kwa fita lisunda ze ne inge a libelela kamota kao, mi ba mu tiseza kamota ka hae ka kanca. Neli kamota ka ku bapalisa ka ka betilwe fa kota, mi n’a tabile hahulu ha na ka amuhezi.

Kana mwa banga ni nako ya ku ambolisana ni bana ba mina, ku lika ku fita kwa lipilu za bona ilikuli mu ba susueze ku yumba libapaliso za ndwa? Haiba mu ezanga cwalo, u zibe mu ba lutanga tuto ye ka ba tusa mwa bupilo bwa bona kaufela.