Mu Si Ke mwa Saba—Jehova U Inzi ni Mina!

LILIMO ze fitelela 50 kwamulaho, hamulahonyana fela wa ku tunya kwa limbomba za pili za nyukilia, wa sayansi ya na winile mupuzo wa Nobel, Harold C. Urey na bulezi cwana ka za nako ya kwapili: “Lu ka ca ka sabo, ku lobala ka sabo, ku pila mwa sabo ni ku shwa ka sabo.” Kaniti, kacenu le, lifasi la luna li tezi sabo, mi ha ku komokisi! Ka zazi ni zazi, mitende i biha litaba ze sabisa za businyi, mifilifili ya bukebenga, ni matuku a komokisa.

Ka ku ba Bakreste, lwa ziba se i talusa miinelo ye cwalo. I bonisa kuli lu pila mwa “mazazi a maungulelo” a muinelo wo o maswe, ao Bibele ne i bulezi cimo kuli a ka zibahala ka “linako ze t’ata.” (2 Timotea 3:1) Kacwalo sepo ya luna ya tiiswa kakuli Jehova Mulimu u tuha a tahisa lifasi le linca mo ku ka yaha ku luka. (2 Pitrosi 3:13) Nihakulicwalo, kana f’o kikuli ha lu sabi ze ezahala cwale?

Ka Mo Batanga ba Mulimu Ba Ngela Sabo

Bo Jakobo, Davida, ni Elia ne li ba bañwi ba batanga ba Jehova ba ne ba ikutwile ku ba ni sabo ka nzila ye ñwi ha ne ba ipumani mwa miinelo ye ne kona ku tahisa kozi. (Genese 32:6, 7; 1 Samuele 21:11, 12; 1 Malena 19:2, 3) Banna bao ne ba na ni tumelo. Mane ne ba bonisize kuli ba itingile ku Jehova ka ku tiya. Nihakulicwalo, bo Jakobo, Davida, ni Elia ne li batu; kacwalo, ne ba kenelwanga ki sabo. Mulutiwa Jakobo n’a ñozi kuli: “Elia neli mutu wa butu bu li buñwi ni bwa luna.”—Jakobo 5:17.

Ni luna lu kana lwa ikalelwa ha lu nze lu nahanisisa ka za butata bo lu talimani ni bona cwale kamba bo lu kana lwa kopana ni bona kwapili. Ku ba ni sabo ye cwalo kwa swanela. Esi mane Bibele i bulela kuli Satani Diabulosi u ikatulezi ka ku tiya ku “lwanisa” ba ba “buluka milao ya Mulimu, ni ba ba sweli bupaki bwa Jesu.” (Sinulo 12:17) Nihaike kuli manzwi ao a ama sihulu Bakreste ba ba tozizwe, Paulusi n’a ñozi kuli: ‘Batu kaufela ba ba lata ku pila ka bulumeli bo bu li teñi ku Jesu Kreste, ba ka nyandiswa.’ (2 Timotea 3:12) Niteñi, sabo ha i swaneli ku lu feza m’ata muta lu kopana ni matata. Kabakalañi?

‘Mulimu ya Lamulela’

Davida muñoli wa lisamu n’a ñozi kuli: “Ku luna Mulimu ki Mulimu ya lu lamulela.” (Samu 68:20) Jehova u bonisize ka ku kuta-kutela m’ata a hae a ku lamulela batu ba hae, ibe ka ku ba yangwela kwa miinelo ye lubeta kamba ka ku ba fa m’ata a ku itiisa. (Samu 34:17; Daniele 6:22; 1 Makorinte 10:13) Ku zwelela ku ze mu itutile mwa tuto ya mina ya Bibele, ki mitala mañi ye mu hupula ye bonisa ‘ku lamulela’ ko ku cwalo?

Ka ku itusisa Watch Tower Publications Index, * mwa kona ku eza patisiso ya ze ne ezahezi luli mwa bupilo, ze cwale ka Munda o ne u ambalakani lifasi kaufela mwa miteñi ya Nuwe, ku puluswa kwa Lota ni bana ba hae ba basizana mwa Sodoma ni Gomora, ku zwa kwa Maisilaele mwa Egepita ni ku sila Liwate Le Li Fubelu, kamba mulelo wa Hamani o ne u tibezwi wa ku yundisa Majuda. Ku bala ni ku yeya litaba ze ze tabisa ku ka tiisa tumelo ya mina ya kuli Jehova ki Mulimu ya lamulela. Hape ku ka mi tusa ku tiyela miliko ya tumelo ya mina ka bundume.

Mitala ya mwa Lizazi la Cwale

Kana mwa kona ku nahana mitala ya buitiiso  ya mwa lizazi la cwale mwa silalanda sa mina? I kana ya ba ya mutu yo muñwi ya n’a tamezwi tumelo. Mwendi mu ziba ka za Mukreste wa musupali ya sebeleza Jehova ku si na taba ni mapongo. Kamba mu nahane za mikulwani ba ba zwelapili ku ikambusa kwa lifasi ku si na taba ni sineneketo ye tuna ye zwa ku ba ba kena ni bona sikolo. Hape ku na ni bashemi ba makwasha, ba ba uta bana ku si na sinyalana ni bona, kamba makwasha ba ba sebeleza Jehova ku si na taba ni maikuto a buinosi. Mu itutañi kwa batu ba ba cwalo? Ku nahana busepahali bwa bona kwa kona ku mi tusa ku itiisa ni ku zwelapili ku ba ni bundume ku si na taba ni miliko kaufela ye mu kana mwa talimana ni yona.

Bundume ha bu tokwahali fela ha lu talimana ni twaniso ni nyandiso kono hape bu tokwahala ni ha lu kala ku honona ka za haiba Jehova wa lu lata. Lu tokwa ku sepa kuli tiululo ya Kreste ya lu ama ni luna ka butu. (Magalata 2:20) Kacwalo lwa kona ku atumela Jehova lu si na sabo ye sa swaneli. Haiba lu ikutwa kuli ha lu swanelwi ki lilato la Jehova, lwa kona ku nahanisisa manzwi a na bulezi Jesu kwa balateleli ba hae a li: ‘Ha ni li, litaha ze peli li lekanga penny i liñwi? Kanti ha ku na taha, niheba i liñwi, ye wela fafasi Ndat’a mina a sa [lemuhi, NW]. Mane ni milili ya litoho za mina i balilwe kamukana. Cwale mu si ke mwa saba; mu fita litaha ze ñata.’—Mateu 10:29-31.

Limagazini za Tora ya ku Libelela ni Awake! hañata li bonisanga ze ne ezahezi kwa Lipaki za Jehova ba mwa miteñi ye ba ne ba talimani ni miinelo ye t’ata ka bundume. Fo ha ku talusi kuli ne ba sa bilaezwi ki matata a bona. Kono ne ba si ka tuhelela maikuto a cwalo ku ba palelwisa ku sebeleza Jehova. Litaba za bona ze hatisizwe za kona ku mi tusa ni mina ku itiisa ka bundume. Mu nyakisise mitala ye mibeli.

Kolofalo Ne i Cincize Bupilo bwa Hae

Mwa Awake! ya April 22, 2003, ne ku na ni taba ye li “How an Injury Changed My Life.” Mwa taba yeo, bo Stanley Ombeva, ba bañwi ba Lipaki za Jehova mwa Kenya, ba talusa mapongo a n’a ba kenezi bakeñisa ku natiwa ki mota ye ne mata hahulu. Buikangulo bwa bona ha ne bu nze bu totobela, ba luza musebezi wa bona ni lituwelo kaufela ze ne ba swanela ku fiwa. Muzwale Ombeva u itumelela mwa taba ya hae kuli: “Ha se ni lemuhile kuli muinelo wa ka u pongana hahulu, n’a felelwa ki sepo, n’a kenelwa ki buitati ni kacimacima. Fokuñwi, ne ni halifanga ni ku ba ni ñole.” Ku si na taba ni butata-tuna bwa bona, banna bao ba Sikreste ne ba zwezipili ku ba ni bundume. Ne ba si ka tuhelela lipilaelo ku ba zwafisa ni ku ba palelwisa. Kono, ne ba itingile ku Jehova. Muzwale Ombeva u li: “Jehova n’a zwezipili ku ni tusa hahulu mwa matata a ka kuli mane fokuñwi ne ni ikutwanga ku swaba. Ne ni ikatulezi ka ku tiya ku no balanga ni ku yeyanga mañolo a ne ni ziba kuli ne a ni omba-omba mwa muinelo wa ka.”

Maikuto a buniti a Muzwale ombeva n’a konisize ba bañwi ba bañata ku tiyela miliko ka bundume. Kaizeli yo muñwi wa Sikreste n’a ñozi kuli: “Ne ni lilile ha ne ni balile taba ye, ne ni ikutwile kuli ka yona taba ye Jehova n’a bonisa silikani ni pabalelo ye lilato ni ku ni omba-omba.” Paki yo muñwi n’a ñozi kuli: “Litaba ze cwana li susueza hahulu ba bañwi ku luna ba ba mwa miinelo ye swana ni yeo ni ba ba nyanda inze ba bilaelela mwa pilu.”

 Ku Tiyela Masitapilu

Likande le liñwi le li shwisa makeke ki la bo Herbert Jennings, le li bulezwi mwa taba ye li “You Do Not Know What Your Life Will Be Tomorrow.” * Muzwale Jennings u kula butuku bwa bipolar disorder. Ha na nyakisisa mwa na kalezi ku kula, u li: “Ku fumaneha fela kwa mikopano ne ku li t’ata hahulu. Nihakulicwalo, ne ni ikolwisize hande ka za butokwa bwa swalisano ya kwa moya. Kuli ni tiyele butata bo, ne ni kenanga mwa Ndu ya Mubuso nyangela ha se i inzi ni ku zwanga pili i si ka nanuha kale kwa mafelezo a mikopano.”

Ku kutaza ni kona ne ku li t’ata. Muzwale Jennings u talusa kuli: “Fokuñwi, mane niha se ni fitile kwa ndu ya mutu, ne ni palelwanga ku lizanga mulangu wa kwa sikwalo, kono ne ni sa zwafi kakuli ne ni lemuhile kuli bukombwa bwa luna bu tahisa puluso ku luna ni kwa batu kaufela ba ba tabela. (1 Timotea 4:16) Ha se ku fitile nakonyana, ne ni banga ni m’ata a ku iswala, ku ya fa ndu ye tatama, ni ku lika hape. Ka ku zwelapili ku yanga mwa bukombwa, n’e ni zwezipili ku ba ni buikangulo bo bu nde bwa kwa moya, mi ne bu ni tiisize.”

Taba ya niti ya muzwale Jennings i tusize babali ba bañata ku talimana ni maziyezi a bona ka bundume bo bu swana. Ka mutala, kaizeli yo muñwi wa Sikreste n’a ñozi kuli: “Mwa lilimo ze 28 ze ni balile limagazini za Tora ya ku Libelela ni Awake! ha ni si ka susuezwa kale hahulu sina mo ni susuelelizwe ha ne ni balile taba ye. Ne ni tuhezi sebelezo ya ka nako kaufela mi ne ni ikutwile ku ba ni mulatu, kuli kambe ne ni na ni tumelo ye tiile ne ni ka be ni zwezipili. Ku bala ka mo muzwale Jennings n’a itombolezi ku si na taba ni ku kula kwa hae, ne ku ni tusize ku bona muinelo wa ka ka nzila ye itikanelezi. Kaniti taba yeo ne i alabile litapelo za ka!”

Hape, muzwale yo muñwi wa Sikreste n’a ñozi kuli: “Ha se ni sebelize sina eluda mwa puteho ka lilimo ze lishumi, ne ni na ni ku tuhela tohonolo ya ka bakeñisa ku kula butuku bwa munahano. Maikuto a ku palelwa ne a ni tomohisanga pilu hañata ha ni bala litaba ze ezahezi mwa bupilo, ili zeo hañata li bulela ze tuna ze ba petile batu ba Jehova. Kono buitiiso bwa muzwale Jennings ne bu ni tiisize. Ni balile taba ya hae hañata-ñata.”

Ku Zwelapili ka Sepo

Sina muzwale Ombeva ni Jennings, Lipaki za Jehova ba bañata ba zwelapili ku sebeleza Jehova Mulimu ka bundume ku si na taba ni mikwalelo ye sabisa. Haiba mu ba bañwi ba ku bona, mu eza hande. Mu kolwe kuli: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae, mwa sebelezo ya ku tusa balumeli, ili ye mu nze mu ba sebeleza ni ka nako ye.”—Maheberu 6:10.

Sina Jehova mwa n’a tuselize batanga ba hae ba ba sepahala ba kwaikale ku tula lila za bona, wa kona ku mi tusa ku tula mikwalelo kaufela ye mu kana mwa kopana ni yona. Kacwalo, mu mamele manzwi a na bulezi Jehova ka mupolofita Isaya kuli: “Si sabi kakuli ni na ni wena. Si bilaeli kakuli ki Na Mulimu wa hao. Ni ka ku fa mata, e, ni ka ku tusa; e, ni ka ku tiisa ka lizoho la ka la bulyo la niti ya ka.”—Isaya 41:10.

[Litaluso za kwatasi]

[Maswaniso a fa likepe 16]

Ba bañata ba sebeleza Jehova ka bundume sina bo Stanley Ombeva (fahalimu) ni bo Herbert Jennings (kwa bulyo)

[Manzwi a bañi ba siswaniso fa likepe 14]

Siswaniso sa ba USAF