Mulelo wa Mulimu kwa Neku la Lifasi Ki Ufi?

KI KABAKALAÑI ha mu ikolanga ku zamaya mwa mushitu kamba mwa simu mo ku na ni munko o munde wa lipalisa? Kiñi ha mu tabanga mu sa bona fela lisa le linde kamba malundu a matelele-telele a’ felezi mwahalimu? Kiñi ha mu yemanga ku teeleza kwa linyunywani ha li nze li cobila lipina za tabo kwa linjongonjongo za likota? Mi ki kabakalañi ha ku tabisa hahulu ku buha lizwii le li kateleha ha li nze li tulaka kamba mutapi wa lingu ha u nze u fula bucwañi?

Kalabo kwa lipuzo zeo kaufela ki i liñwi. Ne lu bupilwe kuli lu pile mwa Paradaisi! Ki mona mo ne ba kalezi bupilo bwa bona bashemi ba luna ba pili bo Adama ni Eva. Takazo ya ku pila mwa Paradaisi ne lu i hozize ku bona, mi bona ne ba i filwe ki Mubupi wa bona, Jehova Mulimu. Jehova n’a ziba kuli luna batu ne lu ka tabela ku ba mwa Paradaisi bakeñisa kuli n’a lu bupile ni tulemeno to ne tu tokwahala kuli lu ikole ku pila fa lifasi le li tabisa leo.

Ki kabakalañi Jehova ha n’a bupile lifasi? N’a ‘li bupile kuli li yahiwe’ ki batu. (Isaya 45:18) ‘Muezi wa lifasi’ n’a file bo Adama ni Eva lihae le li buheha la Paradaisi, yona simu ya Edeni. (Jeremia 10:12; Genese 2:7-9, 15, 21, 22) Bo Adama ni Eva ba lukela kuli ne ba tabiswa ki linuka za yona, mapalisa a yona, ni likota za yona! Linyunywani ze kateleha ne li bonwa mwa mbyumbyulu, ni lifolofolo za mifuta-futa ne li yambaela mwa naha, ko ku tokwa nihaiba i liñwi ya zona ye ne holofaza batu. Litapi ni libupiwa ze ñwi ne li pila mwa mezi a kenile a fa lifasi. Nto ya butokwa hahulu kikuli bo Adama ni Eva ne ba li hamoho. Ne ba kona ku pepa bana ni ku yandulula lihae la bona la Paradaisi inze ba swalisani ka tabo ni lubasi lwa bona lo ne lu nze lu ekezeha.

Nihaike lifasi ha li si ka ba kale Paradaisi, la kona ku swanisezwa kwa lihae le linde la lubasi lo lu tabile. Lifasi la lu file Mulimu kuli lu pile mwateñi li na ni ze lu tokwa ze cwale ka liseli, mufutumala, mezi, ni lico. Haki mo lu itebuhela liseli la lizazi ni mufutumala wa  lona ni liseli la kweli le li itikanelezi! (Genese 1:14-18) Mwa lifasi ku na ni lika ze kona ku tuka, ze cwale ka mashala ni mafula ili ze lu kona ku itusisa kwa ku cisisa lika. Lu na ni mezi bakeñisa mupotoloho wa mezi ni linuka, masa ni mawate. Mi lifasi li kwahezwi ki bucwañi bo butala.

Sina fela lico ha li konwa ku bulukiwa mwa mandu, ni mwa lifasi ku na ni lico ze ñata cwalo. Jehova ‘u lu fanga linako za ku kutula lico mi u tazanga tabo mwa lipilu za luna’ ka lico ni miselo ya mwa masimu. (Likezo 14:16, 17) Bakeñisa kuli lifasi ki le linde kale cwalo, mu nahane mo li ka bela muta “Mulimu Ya lumbekwa,” yena Jehova ha ka li bisa paradaisi!—1 Timotea 1:11.