Mwa ku Ngela ‘Lipiza ze Fokola’

MUAPOSITOLA Pitrosi n’a ñozi kuli: “Ni mina banna, mu pilisane [ni basali ba mina] ka kutwisiso, kakuli musali ki piza ye fokola ku fita mina; mu ba kuteke.” (1 Pitrosi 3:7) Kana liñolo le li nyinyafaza basali ha li ba biza kuli ki ‘lipiza ze fokola’? Ha lu nyakisiseñi za na talusa muñoli wa liñolo leo le ne li ñozwi ka moya wa Mulimu.

Linzwi la Sigerike le li tolokilwe ku ‘kuteka’ li talusa “teko, butokwa, . . . likute.” Kacwalo munna wa Mukreste u swanela ku pilisana ka musa ni musal’a hae, ku mu babalela sina piza ye bunolo, ye butokwa. K’o hasi ku nyinyafaza musali. Sina ka mutala, ha mu nyakisise mufuta wa lampi ye ne pangilwe ki munna wa libizo la Tiffany. Lampi ye nde-ndende yeo, ye mu iponela fa likepe le, i pwaceha fela. Kana ku pwaceha-pwaceha kwa yona kwa i nyinyafaza? Kutokwa ni hanyinyani! Ka silimo sa 1997, yona lampi ya pili ye ne pangilwe ki Tiffany ka sibili ne i lekisizwe madola a eza 2.8 milioni! Ku pwaceha-pwaceha kwa yona ne ku pahamisize teko ya yona isiñi ku i cipisa.

Ku cwalo ni kwa basali, ku ba kuteka kabakala kuli ki lipiza ze fokola ha ku ba nyinyafazi. Ku ‘pilisana ni musali ka kutwisiso’ ku talusa kuli munna u tokwa ku beya mwa munahano buikoneli ni bufokoli bwa musal’a hae, za tabela ni za sa tabeli, mubonelo wa hae ni mwa ikutwela. Munna ya babalela musali wa lemuha ni ku utwisisa mo bu shutanela butu bwa hae ni bwa musal’a hae. U babalela musal’a hae ‘kuli milapelo ya hae isike ya paleliswa ki se siñwi.’ (1 Pitrosi 3:7) Munna ya palelwa ku kuteka ni ku beya butu bwa musal’a hae mwa munahano u sinya silikani sa hae ni Mulimu. Kwa lemuseha hande kuli Linzwi la Mulimu ha li nyinyafazi basali. Kono la ba kuteka.

[Manzwi a bañi ba siswaniso fa likepe 32]

© Christie’s Images Limited 1997