‘Ndwa Ki ya Jehova’
“Ki Swanelo Kuli Lu Utwe Mulimu ku Fita Batu”
‘Ndwa Ki ya Jehova’
LIMPI ze peli ze itwanisa li ngangamani buse bo ni buse bwani bwa musindi. Ka mazazi a 40 banna ba Isilaele ba mwa sabo ye tuna mi ba tukufazwa ki Goliati, yena ikandulwa wa Mafilisita, ya zwelapili ku ba shubaula.—1 Samuele 17:1-4, 16.
Goliati u shubula Maisilaele ka ku huweleza kuli: “Mu ni ketele munna, a shetumukele kwanu, lu t’o lwana; mi h’a kona ku lwana ni na, a ni bulaya, lu ka ba batanga ba mina; kono ha ni ka mu kona, na mu bulaya, mina mu ka ba batanga ba luna, mi mu ka lu sebeleza. . . . Ni shubula mpi ya Isilaele; mu ni fe munna, lu lwane ni yena.”—1 Samuele 17:8-10.
Mwa linako za ikale, ne ku atile mukwa wa kuli ha ne ku na ni limpi ze peli ze itwanisa, ye ñwi ni ye ñwi ya limpi zeo ne i keta mulwani ya na ka yo i yemela. Bubeli bwa lindwalume zeo ne li itwanisa mwa bubeli bwa zona fela. Mi mpi ya munna ya bitile yo muñwi ki yona ye ne ngiwa kuli i winile ndwa yeo. Kono mutabani yo ya shubula Isilaele haki mutabani-tabani fela. Ki singangalume se si buhali se si sabisa. Kono Goliati ka ku nyefula mpi ya batu ba Jehova u ikenya fela mwa kazuma ka ka si na mwalo.
Ndwa ye ha i swani ni lindwa ze ñwi. Ki ndwa ye mwahal’a Jehova ni milimu ya Mafilisita. Mwa sibaka sa ku etelela mpi ya hae kuli i yo lwanisa lila za Mulimu, Saule, yena Mulena wa Isilaele u koza fela kabakala sabo.—1 Samuele 17:11.
Mutangana U Sepa Jehova
Zeo ha li nze li ezahala, mutangana yo muñwi ya sa ketilwe kale ku ba mulena wa Isilaele u potela bahulwani ba hae ba ba li masole mwa mpi ya Saule. Libizo la hae ki yena Davida. A man’o utwa manzwi a Goliati, u buza kuli: “Mufilisita yo, ya si ka kena mwa mupato, ki yena mañi kuli a shubule limpi za Mulimu Ya-Pila?” (1 Samuele 17:26) Ku Davida, Goliati u yemela Mafilisita ni milimu ya bona. Davida, ka ku yemela ku luka, wa halifa mi u ikatulela ku yemela Jehova ni Isilaele ni ku lwanisa muhedeni yo wa singangalume. Kono Mulena Saule u bulela kuli: “Ha u na ku kona ku lwana ni Mufilisita yo; kakuli wena u sa li mutangana fela.”—1 Samuele 17:33.
Mubonelo wa Saule u shutanela kwahule ni wa Davida! Saule ha talima Davida, u mu nga kuli ki mulisana-lisana fela ya bata ku lwanisa singangalume se si m’ata. Kono Davida, u bona kuli Goliati ki mutu-tu fela ya shwaula Jehova, Muambakani-ya-Pahami. Bundume bwa Davida bu tiswa ki ku kolwa kuli Mulimu ha na ku tuhelela libizo la Hae ni batu ba Hae ku shubaulwa a sa ezi se siñwi. Goliati kwa ikuhumuseza m’ata a hae, Davida yena u sepa Jehova, ili ku nga lika ka mwa li bonela Mulimu.
‘Ni Taha ku Wena ka Libizo la Jehova’
Tumelo ya Davida i tomile fa mutomo o tiile. U sa hupula kuli Mulimu na mu tusize ku yangwela lingu za hae kwa bere ni tau. Mulisani wa mutangana yo u na ni buikolwiso bwa kuli Jehova cwale u ka mu tusa ku lwanisa sila sa Mufilisita seo se si sabisa. (1 Samuele 17:34-37) Davida u lwala fela kafwililo ni macwe a ketalizoho a litelehile mi u katanyeza Goliati.
Mutangana Davida u iketela ku nga muhato o bonahala inge ha u konahali ka ku sepa m’ata a Jehova. Ka bundume u bulelela Mufilisita 1 Samuele 17:45-47.
yo kuli: “U tile ku na ka mukwale ni ka lilumo ni mukwazo; na, ni taha ku wena ka Libizo la [Muñ’a] Bupilo wa limpi, Mulimu wa limpi za Isilaele, z’o nyefula. Kacenu [Muñ’a] Bupilo u ka ku fa mwa mazoho a ka . . . kuli lifasi kaufela li zibe kuli Mulimu u teñi mwa Isilaele; kaufela ba ba kopani fa, ba ka ziba kuli [Muñ’a] Bupilo h’a lamuleli ka mukwale kamba ka lilumo; kakuli ndwa ki ya [Muñ’a] Bupilo.”—Kwa ezahalañi? Taba ye ñozwi ka moya wa Mulimu i li: “Davida a kona Mufilista yo, ka kafwililo ni ka licwe cwalo, a kona Mufilisita mi a mu bulaya; kono ne ku si na mukwale mwa lizoho la Davida.” (1 Samuele 17:50) Na si na mukwale mwa lizoho la hae, kono na tusizwe ki Jehova Mulimu ya m’ata. *
Taba yeo i bonisa kuli ku sepa Jehova kwa swanela mi ki yona nto ye ne tusize Davida kuli a tule mwa ndwa yeo. Haiba lu ipumana mwa muinelo o tokwa kuli lu kete mwahal’a ku saba batu ni ku saba Jehova ka ku sepa kuli u ka lu lamulela, keto ya luna i itunumanezi: “Ki swanelo kuli lu utwe Mulimu ku fita batu.” (Likezo 5:29) Mi haiba lu nga miinelo ye t’ata ku likana ni mwa i ngela Jehova Mulimu, lu ka kona ku ba ni mubonelo o munde niha lu talimani ni matata a matuna.
[Litaluso za kwatasi]
^ para. 13 Mu bone 2006 Calendar of Jehovah’s Witnesses, May/June.
[Mbokisi/Siswaniso se si fa likepe 9]
GOLIATI NA KUMA KAI?
Taba ye kwa 1 Samuele 17:4-7 i lu bulelela kuli butelele bwa Goliati ne bu likana ni liñokolwa ze fitelela 6—ili limita ze fitelela ze talu. Nto ye bonisa siyemo ni m’ata a Mufilisita yo ki siapalo sa sipi ya kopa sa na apezi. Bukiti bwa siapalo seo ne bu eza likilogramu ze 57! Bukima bwa teku ya lilumo la hae ne bu likana ni musumo mi sipi ya lilumo la hae ne i likana ni likilogramu ze supile. Mane ku bonahala kuli lilwaniso za Goliati ne li fita Davida kwa bukiti!