Lipuzo Ze Zwa kwa Babali

Jesu na talusañi ha na bulelezi Nekudema kuli: “Ha ku na ya kambamezi kwa lihalimu, konji ya tulukile kwa lihalimu, yena Mwan’a mutu”?—Joani 3:13.

Jesu ha na bulela manzwi ao na sa li fa lifasi, mi na si ka kambamela kale kamba ku kutela kwa lihalimu. Kono ze lu ziba ka za Jesu ni taba ya na ambola za kona ku lu tusa ku utwisisa sisupo sa na talusa.

Jesu na “tulukile kwa lihalimu,” ili ku talusa kuli pili na pilile mwa liluko la kwa moya ni Ndat’ahe, kono nako ha ne i fitile, bupilo bwa Mwana yo ne bu shimbululezwi mwa mba ya Maria, ilikuli Jesu a pepwe sina mutu. (Luka 1:30-35; Magalata 4:4; Maheberu 2:9, 14, 17) Hamulaho wa lifu la hae, Jesu na ka zusiwa sina mutu wa kwa moya ni ku kutela ku Jehova. Kona libaka pili Jesu a si ka bulaiwa kale, na lapezi kuli: “Ndate, u ni lumbe fapil’a hao ka kanya ye ne ni na ni yona ku wena, lifasi li si ka ezwa kale.”—Joani 17:5; Maroma 6:4, 9; Maheberu 9:24; 1 Pitrosi 3:18.

Nako ya na ambola ni Nekudema, Mufalisi ni muluti wa mwa Isilaele, Jesu na si ka kambamela kale kwa lihalimu. Kwand’a Jesu, ha ku na mutu yo muñwi ya kile a shwa ni ku kambamela kwa liluko la kwa moya, kona kwa lihalimu. Jesu ka sibili na bulezi kuli Joani Mukolobezi ne li mupolofita wa Mulimu ya na sa koni ku bapanywa ku mutu ufi kamba ufi, kono “yo munyinyani ku ba ba mwa mubuso wa kwa lihalimu ki yo mutuna ku yena.” (Mateu 11:11) Mi muapositola Pitrosi na talusize kuli nihaiba Mulena Davida ya na sepahala ya na shwile, na sa bulukilwe mwa libita la hae, mi na si ka kambamela kwa lihalimu. (Likezo 2:29, 34) Ku na ni libaka Davida, Joani Mukolobezi, ni batu ba bañwi ba ne ba na ni tumelo ha ne ba si ka ya kwa lihalimu ha ne ba shwile pili Jesu a si ka kambamela kale kwateñi. Ne ba shwile pili Jesu a si ka kwalula kale nzila kamba tukiso ya kuli batu ba zusiwange ni ku kambamela kwa lihalimu. Muapositola Paulusi na ñozi kuli Jesu ka ku ba mutwaleti ‘u lukisize nzila ye nca, ye pila’ ya ku ya kwa lihalimu.—Maheberu 6:19, 20; 9:24; 10:19, 20.

Kacwalo bakeñisa kuli Jesu na si ka shwa kale ni ku zusiwa, na talusañi ha na ize: “Ha ku na ya kambamezi kwa lihalimu, konji ya tulukile kwa lihalimu, yena Mwan’a mutu”? (Joani 3:13) Ha mu nyakisise liñolo kaufela ni ku bona litaba za na sweli ku ambola Jesu ni Nekudema.

Nekudema ha na tile ku Jesu mwa lififi, Jesu na mu bulelezi kuli: “Kaniti-niti na ku bulelela, ni li, Mutu h’a sa pepwi sinca, h’a koni ku bona mubuso wa Mulimu.” (Joani 3:3) Nekudema sa mu buza kuli: ‘Taba yeo i konahala cwañi? Mutu u kona ku pepwa cwañi lwa bubeli?’ Nekudema na si ka utwisisa tuto ya kwa moya yeo ya za ku ba mwa Mubuso wa Mulimu. Kana ne ku na ni nzila ye ñwi ya na kona ku ituta ka yona tuto yeo? Na si ke a kona ku ituta tuto yeo kwa batu, kakuli ha ku na mutu ya na kile a ba mwa lihalimu ya na ka kona ku talusa za ku kena mwa Mubuso. Ya na kona fela ku eza cwalo ne li Jesu. Na kona ku luta Nekudema ni ba bañwi kabakala kuli yena na shetumukile kwa lihalimu mi ki yena ya na kona ku luta batu litaba ze cwalo.

Kacwalo puzo ye, ya za liñolo le, i bonisa butokwa bwa ku itutanga Linzwi la Mulimu. Ha ku si ka luka ku kakanya liñolo bakeñisa kuli ha li utwisisehi. Ze i bulela Bibele mwa timana ye ñwi li swanela ku utwisiswa hande ka ku bapanya litimana ze ñwi ze lumelelana ni yona. Hape ku utwisisa taba ye ne ambolwa kwa kona ku lu tusa ku utwisisa hande taluso ya liñolo le li t’ata.