Simbule Tota sa Tabo

MAÑI ni mañi u na ni swanelo ya “ku bata tabo.” Wo ne li ona muhupulo wa balukisi ba tumelelano ya mulao wa tukuluho ya naha ya America. Kono ku bata sika ha ku swani ni ku si fumana. Ku na ni mikulwani ba bañata ba ba ndongwami misebezi ya ku tabisa sicaba ni lipapali, kono ki ba ba kai ku bona mikulwani bao ba ba kondisize ku likana ni mo ne ba tokwela? Muopeli yo muñwi ya tumile ya lemuhile kuli ku t’ata kuli mutu a yo fita fa ku ba muopeli sakata, u li: “Mwendi mu ka palelelwa fahali.”

Haiba ni mina mu kile mwa ikutwa kuli ku fumana tabo ni kona ku cwalo, ha mu lukeli ku zwafa. Ha mu bata tabo ka nzila ye swanela, mu ka i fumana. Ki bufi bupaki bo bu yemela taba yeo? Mwa taba ye felile ku bulezwi kuli Jehova ki “Mulimu Ya [tabile, NW].” (1 Timotea 1:11) Mwa Bibele, Mulimu u lu fa ketelelo y’e lu tusa ku fumana tabo ku fita ku palelelwa fahali. Jehova wa kona ku mi tusa ku ziba mwa ku ezeza ha mu kopana ni miinelo ye utwisa butuku ye atile kacenu. Ka mutala, ha mu nyakisise mwa mi omba-ombela haiba mu shwelwa ki mutu yo mu lata.

Mulatiwa Ha Timela

Lifu ha li na se sinde. Li kauhanya bashemi kwa bana ba bona ni bana kwa bashemi ba bona. Lifu li kauhanya balikani ba ba utwana ni ku sinya buiketo bwa sicaba. Lifu ha li tile, lubasi lo ne lu li mwa tabo lu kenelwa ki matomola.

Mutu kaufela wa izibela hande kuli lifu ki ziyezi luli. Kono ku na ni batu ba ba bonisa inge kuli lifu ki mbuyoti. Ha mu nyakisise ze ne  ezahezi hamulaho wa ñuli ya Katrina ye ne lengile siko sa Mexico ñohola mwa kweli ya August. Kwa kepelo ya yo muñwi ya na bituzwi ki kozi yeo, muluti yo muñwi wa keleke na ize: “H’a si ka bulaiwa ki Katrina. Ki Mulimu ya mu bizelize kwa lihalimu.” Ka nako ye ñwi, kalaliki wa sipatela se siñwi, ka ku zwelela kwatas’a pilu ya hae luli, na taluselize musizana yo muñwi ya na shwezwi ki bomahe kuli a si ke a bilaela kakuli Mulimu ki yena ya ngezi bomahe kwa lihalimu. Musizana yo a si cuuma sililo, a nze a li: “Mulimu u ni amuheziñi boma?”

Litaba zeo li paka fela kuli mihupulo ye fosahezi cwalo ye ama bafu hañata ha i omba-ombangi balili. Libaka ki lifi? Kakuli mihupulo yeo ha i talusi lifu mo li inezi luli. Mi se si maswe ni ku fita kikuli mihupulo yeo i bonisa inge kuli Mulimu u pamulanga batu ku ba kauhanya kwa mabasi ni balikani ba bona ka nzila ye maswe ye utwisa lipilu butuku. Ha ku tile lifu, Mulimu u bonahazwa inge kuli ki sibulai ku fita kuli balili ba tiiswe ka yena. Kono Linzwi la Mulimu li talusa lifu mo li inezi luli.

Bibele i biza lifu kuli ki sila. I bulela kuli lifu li swana sina mulena ya busize batu. (Maroma 5:17; 1 Makorinte 15:26) Lifu ki sila se si m’ata se si sa konwi ku tibelwa ki mutu ufi kamba ufi, mi mutu kaufela ya shwa ki yo muñwi wa bonalimai ba bañata-ñata ba ba bituzwi ki sona sila se. Taba yeo ki ya niti mi i bonisa libaka ha lu tomohanga lipilu ni ku ikutwa kutokwa tuso muta lu shwelwa ki mutu ye lu lata. I paka kuli kwa swanela ku ikutwa cwalo. Kono kana Mulimu u itusisanga sila seo kuli a ngele fateñi batu be lu lata kwa lihalimu? Ha lu bateñi kalabo mwa Bibele.

Muekelesia 9:5, 10 i bulela kuli: “Ba ba shwile ha ba na se ba ziba . . . Kakuli mwa libita mo u ya, ha ku sa na musebezi, nihaili mulelo, kamba zibo, kamba butali.” Bafu ba ba mwa libita ha ba ikutwi se siñwi, ha ba nyanganyi, niha ba ka ngunyutwa ki sika ha ba utwi, mi ha ba na muhupulo ni o mukana. Ba swana inge mutu ya mwa buloko bo butuna. Kacwalo Bibele i bonisa fo ku sweu kuli Mulimu h’a ngangi banabahabo luna kamba balikani ba luna kuli ba yo pila ni yena kwa lihalimu. Kono ba mwa libita mi ha ba pili kakuli ba shwile.

Jesu na pakile taba yeo mulikan’a hae Lazaro ha na shwile. Jesu na ize lifu li swana sina buloko. Haiba Lazaro na ile kwa lihalimu ku yo pila ni Mulimu Ya-M’ata-Ote, mu zibe he Jesu na ezize lunya ku zusa Lazaro ni kuli hape hasamulaho a to shwa. Bibele i bulela kuli kwa libita Jesu na huwile kuli: “Lazaro, zwa mo.” Mi i zwelapili ku talusa kuli: “Mi mufu a zwa.” Lazaro na kalisize ku pila hape. Jesu na ziba kuli Lazaro na si ka zwa mwa lifasi ku ya kwa sibaka se siñwi. Na li mwa libita mi na sa pili.—Joani 11:11-14, 34, 38-44.

Likande le la Lazaro, le li ñozwi mwa Bibele, li lu tusa ku utwisisa kuli lifu haki yona nzila ya itusisa Mulimu kwa ku shimbulula batu ku ba zwisa fa lifasi ni ku ba isa kwa lihalimu. Mi he lu ka sutelela ku Mulimu kakuli lwa ziba kuli hasi yena ya lu utwisa butuku. Hape lu na  ni sepo ya kuli wa utwisisa ka ku tala maswabi a luna ni butuku bo lu utwa kabakala sila se si bizwa lifu. Hape niti ye mwa Bibele ya za muinelo wa bafu i paka kuli bafu ha ba yangi mwa lihele la mulilo kamba pagatori kono ba mwa libita mi ha ba pili. Kacwalo ha lu hupula balatiwa ba luna ha lu swaneli ku nahana kuli Mulimu ki yena sifosi kamba ku saba kabakala ku sa ziba ko ba inzi. Hape Jehova u sa lu omba-omba mwa Bibele.

Sepo I Tisa Tabo

Mañolo e lu nyakisisize a bonisa kuli sepo ya tokwahala kuli mutu a be ya tabile. Linzwi la “sepo” ka mo li itusiselizwe mwa Bibele li fa muhupulo wa ku libelela nto ye nde ka buikolwiso. Ha lu kuteñi kwa likande la Jesu ha zusa Lazaro kuli lu bone m’o sepo i kona ku tiseza mutu tabo.

Jesu na ezize makazo yani ka mabaka a mabeli. Libaka la pili ne li la kuli a felise matomola a bo Mareta, Maria, ni balili ba bañwi. Jesu na bata kuli ba bonane hape ni mulatiwa wa bona. Kono na taluselize Mareta libaka la bubeli, le lituna ni ku fita, a li: “Kikuli ha ni si ka ku bulelela kuli ha u lumela, u ka bona kanya ya Mulimu?” (Joani 11:40) Bibele ye Kenile, hatiso ya 1984, i talusa hande pulelo ya mafelelezo mwa timana ye ka ku bulela kuli “n’o ka bona maata a Mulimu.” Ha na kutiselize Lazaro kwa bupilo, Jesu na file mbengenge ya za kona ku eza Jehova Mulimu ili zona za ka eza luli kwapili. Ki ze litaba ze ñwi ze ama “maata a Mulimu” ao.

Kwa Joani 5:28, 29, Jesu na ize: “Mu si ke mwa komoka ka taba yeo; kakuli nako ya ta, mo ba ba li mwa mabita kaufela [a kupulo, NW], ba ka utwa linzwi la hae, mi ba zwe.” Kona kuli bafu kaufela ba ba mwa mabita a kupulo, yona Sheol, ku kopanyeleza cwalo ni balatiwa ba luna, ba ka kutela kwa bupilo. Likezo 24:15 i ekeza ku bulela za nako yeo kuli: “Ku zuha kwa bafu ku ka ba teñi, kwa ba ba lukile ni ba ba si ka luka.” Kona kuli nihaiba “ba ba si ka luka,” sona sicaba se ne si si ka fumana kolo ya ku ziba Jehova ni ku mu sebeleza, si ka fiwa kolo ya ku fumana muhau wa Mulimu.

Ki kai ko i ka bela zuho yeo? Samu 37:29 i bulela kuli: “Ba ba na ni niti ba ka yola sanda sa naha, ni ku yaha mwateñi ku ya ku ile.” Mu nahane fela taluso ya manzwi ao! Mabasi ni balikani ba ba kauhanyizwe ki lifu ba ka pila hamoho hape fa lifasi-mubu. Ha mu nze mu nahana za ku yo ikola siango se sinde ni batu bo ne mu katelwa luli, mu ka ba ni tabo luli.

Jehova U Tokwa Kuli Mu Tabe

Lu nyakisisize linzila ze peli za itusisa Jehova kuli a mi tuse ku mi ekeleza kwa tabo ya mina ku si na taba ni matata a mina. Nzila ya pili, ki Bibele, mi ka yona u lu fa zibo ni ketelelo ye lu tusa ku ziba mwa ku tulela makayamana. Kwand’a ku lu omba-omba ha lu tezwi ki maswabi, Bibele hape i lu tusa ku ziba mwa ku ezeza ha lu kopana ni matata a za masheleñi ni makulanu. Hape ya kona ku mi fa m’ata a ku tiyela saluluti sa sicaba ni ku tiyela mifilifili ya litaba za puso ya naha. Mi haiba mu latelela ketelelo ya yona mwa bupilo bwa mina, ya kona ku mi tusa ku tula matata a mañwi a ka butu.

Nzila ya bubeli, ki ya ku ituta Bibele, mi ha mu eza cwalo mu fumana sepo ye fitela kwahule nto ifi kamba ifi ye kona ku fumanwa mwa lifasi. Zuho ya balikani ni mabasi i balelwa kwa sepo ye fiwa mwa Bibele. Sinulo 21:3, 4 i tolongosha kuli: “Mulimu u ka ba ni bona, Yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” Liñolo le, li talusa kuli nto ifi kamba ifi y’e mi utwisa butuku mwa bupilo i ka feliselelezwa mbuu ona cwanoñu fa. Lika ze i sepisa Bibele li ka bonahala, mi mu ka ikola ku iponela zona ha li talelezwa. Ku ba fela ni zibo ya kuli kwapili ku ka ba ni linako ze nde kwa omba-omba luli. Mi kwa tabisa luli ku ziba kuli ha mu na ku nyandiswa ku ya ku ile ha mu ka shwa.

 Ha mu nyakisise mutala wo: Lilimo li sikai kwamulaho bo Maria ne ba iponezi munn’a bona ha shwa lifu le li maswe kabakala kansa. Ko ne ba sa li mwa sililo cwalo ba ziyeleha bakeñisa kutokwa mali mi kabakaleo bo Maria ni bana ba bona ba balalu ba zwa fa ndu ya bona. Hasamulaho wa lilimo ze peli, bo Maria ba fumaneha ni butuku bwa kansa. Mi se ba pazuzwi habeli ku zwa f’o mi zazi ni zazi ba mwa butuku bo butuna. Ku si na taba ni matata ao, bo Maria ha ba bonahali ku ba ni lipilaelo mi mane bona ki bona ba se ba susueza ba bañwi. Ki nto mañi ye ba tusa ku zwelapili ku ba ba ba tabile?

Bo Maria ba li: “Ha ni na ni butata, ni likanga ku sa nahana hahulu ka za butata bwa ka. Ni tokolomohanga ku ipuza lipuzo za kuli: ‘Kiñi nto ye ha i ezahezi ku na? Ni nyandelañi cwana? Kiñi ha ku si ka kula u sili?’ Minahano i anya m’ata a mutu. Ku fita ku swalelela ku bilaela, ni itusisa m’ata a ka kwa ku sebeleza Jehova ni ku tusa ba bañwi. Mi ni fumana tabo ka ku eza cwalo.”

Sepo i tusa cwañi bo Maria mwa bupilo bwa bona? Ba isize pilu ya bona ku za kwapili muta Jehova a ka felisa makulanu ni matata a mañwi kaufela. Ha ba yanga kwa likalafo kwa sipatela, ba yo kopananga ni bakuli ba bañwi ba kansa, ba ba bonahala kutokwa sepo, mi ba ba talusezanga za sepo ya bona ya kwapili. Sepo i butokwa cwañi ku bo Maria? Ba li: “Ni nahananga hahulu manzwi a Paulusi a’ kwa Maheberu 6:19, kwa talusize kuli sepo i swana sina ankora ya moyo. Ha u si ka fungiwa kwa ankora yeo, u ka biuka sina sisepe se si kukiswa ki moya. Kono haiba u fungezwi kwa ankora yeo, u ka iketa niha u kopana ni matata a matuna.” “Sepo [yeo] ya bupilo bo bu sa feli, bo bu sepisizwe ki Mulimu ya sa koni ku puma” i tusa bo Maria ku ba ba ba tabile. Ni mina ya kona ku mi tusa ku ba ba ba tabile.—Tite 1:2.

Ha mu ituta Bibele, mwa kona ku fumana tabo sakata niha mu li mwa matata. Kono mwendi ha mu utwisisi hande buniti bwa taba ye. Lipaki za Jehova ba ka tabela ku mi bonisa likalabo mwa Mañolo ze mu tokwa ku ziba kuli mu be ni tabo sakata. Mi ha mu nze mu libelela fo i ka talelezwa sepiso ya Mulimu, mwa kona ku balelwa kwa batu ba ba bulelwa kuli: “Ba ka fumana ze tabisa, ze ebelisa; mi ze utwisa butuku ni masitapilu li ka sabela kwahule.”—Isaya 35:10.

[Siswaniso se si fa likepe 5]

Ki niti ya mwa Bibele fela ye kona ku fukuza kwa matomola

[Siswaniso se si fa likepe 7]

Sepo ye mwa Bibele ya zuho ya kona ku mi tusa ku ba ni tabo