“Ne Ni Si Ka Libelela Kuli Ni ka Feza Hande Cwalo Sikolo”
“Ne Ni Si Ka Libelela Kuli Ni ka Feza Hande Cwalo Sikolo”
MULUTI yo muñwi ya luta fa sikolo se si pahami mwa Spain na ñozi kuli: “Ka lilimo-limo, Lipaki za Jehova ba bonisize swalisano sakata, busepahali bwa niti, mi sihulu-hulu tumelo ye tiile.” Muluti yo ya sa lumeli kuli Mulimu u teñi na susuelizwe kiñi kuli a bulele manzwi ao?
Ne li kabakala taba ya na ñozi Noemí, yo muñwi wa Lipaki za Jehova ya na kena fa sikolo se si pahami seo, mi taba ya hae ne li kalulo ya tatubo ya ku feza sikolo. Na ketile ku ñola za taba ye li, “The Purple Triangles Under Nazi Rule.”
Ki kabakalañi ha na ketile taba yeo? Noemí u talusa kuli: “Bakeñisa kuli bo muluti ne ba ka tatuba musebezi wa ka, na keta ku itusisa kolo yeo kwa ku fa bupaki. Likande leo le li bonisa m’o Lipaki za Jehova ne ba kumalezi lipimo za bona mwa Nazi Germany ne li ni susuelize hahulu. Ne ni na ni buikolwiso bwa kuli li ka susueza ba bañwi.”
Taba ya na ñozi Noemí yeo ne i susuelize batu ba bañata ku fita mwa na nahanela. La 5 October, 2002, taba ya hae yeo ne i mu fumanisize mupuzo kwa kangisano ya naha ya za lipatisiso za sayansi ni za bupilo bwa batu. Mipuzo ya kangisano yeo i fiwanga ki sitopa sa licaziba ze 20 za fa liyunivesiti ze tumile hahulu mwa Spain.
Pilar del Castillo, yo muhulu wa likolo la tuto mwa Spain ki yena ya na file Noemí mupuzo. Noemí na itusisize kolo yeo kwa ku fa yo muhulu wa likolo la tuto vidio ya Jehovah’s Witnesses Stand Firm Against Nazi Assault. Likwambuyu yo na amuhezi mpo yeo ka mazoho a mabeli.
Mutende wa mwa muleneñi wa Manresa mwa pila Noemí, ne u talusize za ku pasa hande kwa hae mi ne u bonisize za na ñozi mwa taba ya hae. Kwanda zeo, muluti yo muhulu fa sikolo sa hae na kupile taba ya na ñozi ilikuli i be fa mukoloko wa lika ze ne ka hupulwa fa mukiti wa kupuzo ya sikolo wa bu 75.
Noemí na bulezi kuli: “Ne ni si ka libelela kuli ni ka feza hande cwalo sikolo. Ne ni tabile hahulu-hulu ha ne ni balile manzwi a makalelo a piho ya bo muluti ba ka bo Jorge Tomás Calot:
‘Ne ni sa lumeli kuli Mulimu u teñi, kono cwale ni kozwi kuli ku na ni Mutu ya Pahami ka ku fitisisa, ya susumeza balapeli ba hae ku ba ni ‘lilato la muyahwa ni bona.’”