Poto Ye Ne Cincize Bupilo Bwa Munna yo Muñwi

MUNNA yo muñwi ya na potezwi ki likalibe ze peli za Lipaki za Jehova n’a ñozi kuli: “Ne ni nyolezwi hahulu ku bulelela lubasi lwa ka za ‘mangeloi’ a mabeli a na lumile Mulimu ku na.” Lisunda li sikai pili ba si ka mu potela kale, munna y’o na shwezwi ki musal’a hae wa lilimo ze 45. Na lobehile pilu luli. Bana ba hae ba ba hulile ne ba mu omba-ombile, kono ne ba pila kwahule ni yena. Ha ku na mulikani kamba muyahwa ni yena ya na tilo mu lekula.

Munna yo na bulelezi likalibe ze peli ze ne mu potezi zeo kuli, “ha ni ikutwi ku ba bukaufi ni Mulimu.” Kono likalibe zeo ne li mu omba-ombile ni ku mu siyela trakitinyana ye tomile fa Bibele ye na ni toho ya taba ye li, Ki Sepo Ifi ya Balatiwa Ba Ba Shwile? Na balile trakiti yeo kaufela yona busihu bo mi na omba-ombilwe.

Hamulaho wa mazazinyana, likalibe za Sikreste ze peli zeo ne li mu potezi hape. Ne ba sa hupula mwa na lobehezi pilu fa poto ya bona ya pili mi ne ba tilo mu lekula kuli ba utwe zuho ya hae. Munna yo hasamulaho na ñozi kuli, “ne ni komokile hahulu kuli bazwahule ba babeli bo ne ni sa zibi ne ba iyakatitwe zuho ya ka.” Munna yo na susuelizwe hahulu ki manzwi a omba-omba a likalibe zeo a na zwelela mwa Bibele. Likalibe zeo ne li mu sepisize ku to mu potela hape. Munna yo na tabile luli kuli mane na susuelizwe ku ñola manzwi a bonisizwe fahalimu mwa liñolo la hae la na lumezi kwa Ndu ya Mubuso ya Lipaki za Jehova ya mwa silalanda.

Pili a si ka tutela kale mwa ndu ye ne li mabapa ni ya mwan’a hae, munna yo na fumanehile kwa mikopano ya Lipaki za Jehova mi lubasi lwa yo muñwi wa likalibe zeo ne lu mu memezi kwa sico. Na ñozi kuli: “Na tuta mwa sibaka mo, kono ha ni na ku libala likalibe zani, ni keleke ya mina mi ni ta mi lapelelanga. Mane mazazi a’ se ni lapelanga hahulu. Ni cincize hahulu bupilo bwa ka. Likalibe zani ne li ni tusize hahulu, mi ni ka itumelanga ku zona.”