Mubuso wa Mulimu Ki Nto Mañi?

NE LI kozi ye sabisa hahulu ye ne kenezi batu kwa makalelo-kalelo a ku ba teñi kwa bona. Lingeloi ne li fetuhezi tamaiso ya Mubupi wa lona ka sibili. Yena mufetuheli yo na pepelize Eva, yena musali wa pili, kuli a ce kwa muselo o ne u hanisizwe. Ha ne li bulela ku yena musali yo ni ku wa munna, yena Adama, lingeloi leo ne li ize: “Ku shwa, ha mu na ku shwa. Kono Mulimu u ziba kuli, nako ye mu i ca, meto a mina a ka tona, mi mu ka ba sina milimu, mu zibe bunde ni bumaswe.” (Genese 2:16, 17; 3:1-5) Lingeloi la mukwenuheli leo la fita fa ku bizwa Diabulosi ni Satani.—Sinulo 12:9.

Kana Eva na kozwi za na mu bulelezi Satani? Bibele i lu taluseza kuli: “Musali h’a bona kuli kota ki ye munati ha i ciwa, mi i katelisa meto, hape i lakazisa ku talifisa, a nga kwateñi, a ca, mi a fa munn’a hae ya n’a inzi ni yena; mi ni yena a ca.” (Genese 3:6) Ka ku eza cwalo, bosinyalana ba pili, bona bo Adama ni Eva, ba swalisana ni Satani ka ku ba baipanguli. Kabakaleo, bona hamohocwalo ni baikulu ba bona, ba latehelwa ki Paradaisi. Bana ba ne ba swanela ku pepwa ba li ba ba petehile ni ku ba ni sepo ya bupilo bwa kamita ne ba ka hoza sibi ni lifu.—Maroma 5:12.

Jehova Mulimu, yena Mubusi ya Pahami wa pupo kamukana na ezizeñi ka za bukwenuhile bo? A lela ku eza tukiso ya ku swalela libi. (Maroma 5:8) Jehova Mulimu hape u tomile mubuso o ka felisa bona butata bo. Mubuso wo u bizwa “mubuso wa Mulimu.” (Luka 21:31) Ona mubusonyana wo o li kalulo ya Mubuso wa Mulimu wa pupo kamukana ne u tomilwe kuli u pete mulelo o ipitezi.

Ki ufi mulelo wa Mubuso wa Mulimu? Ki lifi ze ñwi za likalulo za ona, mi likalulo zeo li cwañi ha li bapiswa ni puso ya batu? Ki lili fo ne u ka kaliseza ku busa? Lipuzo ze li ka nyakisiswa mwa taba ye tatama.