Lipuzo Ze Zwa kwa Babali

Lu ziba cwañi kuli butali bo bu taluswa kwa Liproverbia 8:22-31 ki Jesu Kreste pili a si ka ba kale mutu wa fa lifasi?

Buka ya Liproverbia ye ñozwi ka ketelelo ya moya wa Mulimu i talusa cwana butali: “[Muñ’a] Bupilo u ni bupezi ko i simuluha nzila ya hae, pili, misebezi ya hae ya kwa kale-kale i si ka eziwa. . . . Ni tahile pili ku si ka ezwa malundu, niheba malundunyana; . . . H’a lukisa mahalimu, ne ni se ni li kwateñi . . . ka linako zani, ne ni se ni inzi ku Yena, ni nze ni mu sebeleza, ne li na [ya] n’a tabela ka zazi ni zazi, ni nze ni tabile fapil’a hae kamita . Ne ni wabelelwa ni bana ba batu.”

Liñolo le ha li buleli fela za butali bwa Mulimu kamba za kalemeno ka butali. Kabakalañi? Kabakala kuli butali bo bu bulezwi fa ne bu ‘bupilwe’ sina nto ya pili kwa misebezi ya Jehova. Jehova Mulimu u bile teñi kamita mi u bile ya butali ka nako yeo kaufela. (Samu 90:1, 2) Butali bwa hae ha bu na makalelo mi ne bu si ka bupiwa. Ne bu si ka pepwa. Hape butali b’o bu bonisizwe kuli bwa bulela ni ku sebeza mi nto yeo i bonisa kuli butali bo bu taluswa fo ki mutu.—Liproverbia 8:1.

Buka ya Liproverbia i bulela kuli kwa simuluho butali ne bu li ni Jehova, yena Mubupi, bu nze bu mu “sebeleza.” Kaniti luli butali bo bu taluswa fo ki Jesu. Lilimo-limo pili a si ka taha kale fa lifasi, Jesu na sebelize hahulu ni Jehova kuli mane Bibele i li: “Ki yena wa pili kwa linto kaufela, mi kaufela ha li yemi ki ka yena.”—Makolose 1:17; Sinulo 3:14.

Ku swaniseza Mwan’a Mulimu kwa butali kwa swanela bakeñisa kuli ki yena ya na patuluzi milelo ni litaelo za Jehova ze butali. Pili a si ka ba kale mutu wa fa lifasi, Jesu na li Linzwi la Mulimu, kamba Mubuleli wa hae. (Joani 1:1) Jesu u taluswa kuli ki “mata a Mulimu, [ni] butali bwa Mulimu.” (1 Makorinte 1:24, 30) Taba yeo i talusa hande Mwan’a Mulimu, ili yo bakeñisa kuli na lata hahulu batu a fa bupilo bwa hae kuli a ba liulule.—Joani 3:16.

[Siswaniso se si fa likepe 31]

“Ni tahile pili ku si ka ezwa malundu”