Mu Sabe Jehova Kuli Mu Be ni Tabo!

“U fiwa mbuyoti [kamba tabo] mutu ya saba [Muñ’a] Bupilo.”—SAMU 112:1.

1, 2. Ku saba Mulimu ku kona ku tisañi?

TABO ha i ipumanelwi fela. Tabo sakata i itingile fela fa ku eza liketo ze nde, ku eza lika ze lukile, ni ku tokolomoha lika ze maswe. Mubupi wa luna Jehova, u lu file linzwi la hae Bibele kuli i lu lute mo lu kona ku ikolela bupilo. Haiba lu bata ketelelo ya Jehova ni ku i latelela, ili ku saba Mulimu, lu ka ikola bupilo bo bu tabisa luli.—Samu 23:1; Liproverbia 14:26.

² Mwa taba mo, lu ka nyakisisa mitala ya mwa Bibele ni ya miteñi ya cwale ye bonisa m’o ku saba Mulimu luli ku kona ku tuseza mutu ku tiyela sineneketo ya ku eza bumaswe ni ku ba ni bundume bwa ku eza ze lukile. Lu ka bona kuli ku saba Mulimu ku kona ku lu tiseza tabo ka ku lu susueza ku hakulula nzila ya luna sina mwa na ezelize Mulena Davida. Hape lu ka bona kuli ku saba Jehova ki sanda sa butokwa se ba swanela ku siyela bana ba bona bashemi. Kaniti, Linzwi la Mulimu li lu sepisa kuli: “U fiwa mbuyoti [kamba tabo] mutu ya saba [Muñ’a] Bupilo.”—Samu 112:1.

Ku Kutelwa ki Tabo

3. Davida na tusizwe kiñi ku bakela libi za hae?

³ Sina mo lu itutezi mwa taba ye felile, Davida halalu na palezwi ku bonisa kuli na saba hande Mulimu mi a eza sibi. Kono mwa na ngezi kalimelo ya na filwe ki Jehova ne ku bonisize kuli ku saba Mulimu ne li nto ya butokwa ku yena. Tompo ya hae ni likute la hae ku Mulimu ne li mu susuelize ku itumelela bufosi bwa hae, ku baka, ni ku kalisa sinca silikani se sinde ni Jehova. Nihaike kuli bufosi bwa hae ne bu tisize kuli yena ni ba bañwi ba nyande, ku baka kwa hae ko ku buniti ne ku tisize kuli Jehova a zwelepili ku mu tusa ni ku mu fuyaula. Mutala wa Davida wa kona ku tusa Bakreste kacenu ba ba kana ba ezize sibi se situna.

4. Ku saba Mulimu ku kona ku tusa cwañi mutu ku kutelwa ki tabo hape?

 ⁴ Ha mu nyakisise mutala wa Sonja. * Niha na sebeza sina mukutazi wa ka nako kaufela, Sonja a kala liango ze maswe, a ikenya mwa muzamao o maswe, mi mane a zwisiwa mwa puteho ya Sikreste. Ha sa ikupuzi, Sonja a eza buikatazo bwa ku kalisa sinca silikani sa hae ni Jehova. Hamulahonyana, Sonja a kutiswa mwa puteho. Niha na li mwa muinelo wo, Sonja na si ka felelwa ki takazo ya ku sebeleza Jehova. Mi hasamulaho a kalisa hape bukombwa bwa nako kaufela. Hamulaho a nyaliwa ki eluda wa Sikreste, mi u sebeza hamoho ni yena ka tabo mwa puteho. Nihaike kuli u sa inyaza bakeñisa kuli na keluhile hanyinyani mwa nzila ya Sikreste, Sonja u tabile hahulu kuli ku saba Mulimu kwa hae ne ku mu tusize ku kutela ku Jehova hape.

Ku Nyanda ku Fita ku Eza Sibi

5, 6. Mu taluse mi mu fe libaka Davida ha na hanile habeli kuli a bulaye Saule.

⁵ Mane ki kwa butokwa hahulu haiba ku saba Mulimu ku tusa mutu ku sa eza sibi kwa makalelo. Kona mo ne ku bezi ku Davida. Muta o muñwi Saule ha na nze a bata-bata Davida, na keni mwa lihaha le lituna—mona mwa na ipatile Davida ni batu ba hae. Banna ba Davida ba mu susueza kuli a bulaye Saule. Bona ne ba nga kuli Jehova na file Davida kolo ya ku eza maswe sila sa hae. Davida a nanalela Saule ni ku yo puma siemba kwa mungundo wa siapalo sa hae. Bakeñisa kuli Davida na saba Mulimu, nihaiba kezo ye nyinyani ya na ezize yeo ne i sisitile lizwalo la hae. Davida a hanela batu ba hae ba ne ba nyemile kuli: “[Muñ’a] Bupilo a ni hanele, ni si ke na eza taba ye cwalo ku muñ’a ka, mutoziwa wa [Muñ’a] Bupilo.” *—1 Samuele 24:1-7.

⁶ Nako ye ñwi hape, Saule na tibelezi fa sibaka se siñwi, mi yena ni batu ba hae ba bebuka mwa ‘buloko bo butuna bwa na ba lobalize [Muñ’a] Bupilo.’ Davida ni Abishai ya bundume, mwan’a muhabo Davida, ba hohobela mwa mafulo ni ku yo yema fo ne ku lobalezi Saule. Abishai na bata ku omba Saule moyo. Kono Davida a hanisa Abishai, ka ku mu buza kuli: “Ki mañi ya ka isa lizoho ku mutoziwa wa [Muñ’a] Bupilo, a tokwa mulatu?”—1 Samuele 26:9, 12.

7. Davida na tusizwe kiñi kuli a si ke a eza sibi?

⁷ Ki kabakalañi Davida ha na si ka bulaya Saule hailif’o na fumani kolo ya ku eza cwalo habeli? Kabakala kuli Davida na saba hahulu Mulimu ku fita Saule. Bakeñisa kuli na saba Mulimu hande, Davida na iketezi kuli haiba ki cwalo a nyande fela, ku fita ku eza sibi. (Maheberu 11:25) Na kolwa kuli Jehova u babalela batu ba hae mi ni yena na ka mu babalela luli. Davida na ziba kuli ku mamela ni ku sepa Mulimu ne ku ka mu tiseza tabo ni limbuyoti ze ñata, mi ku foseza Mulimu ne ku ka tisa kuli a si ke a shemubwa ki yena. (Samu 65:4) Hape na ziba kuli Mulimu na ka taleleza sepiso ya hae ya ku mu eza mulena ni ku zwisa Saule ka nako ya hae mi na ka keta nzila ya na ka eza cwalo ka yona.—1 Samuele 26:10.

Ku Saba Mulimu ku Tisa Tabo

8. Davida na lu tomezi mutala ufi ha na li mwa miliko?

⁸ Ka ku ba Bakreste, lu swanela ku libelela kuli lwa kona ku sheununwa, ku nyandiswa, ni ku kopana ni miliko ye miñwi. (Mateu 24:9; 2 Pitrosi 3:3) Mane fokuñwi lwa kona ku kopana ni matata a tiswa ki balapeli ka luna. Kono lwa ziba kuli Jehova wa bona lika kaufela, wa utwa litapelo za luna, mi ka nako ye swanela u ka kondisa lika ka ku ya ka tato ya hae. (Maroma 12:17-21; Maheberu 4:16) Kacwalo ku fita ku saba ba ba lu lwanisa, lu saba Mulimu mi lu sepile kuli u ta lu pulusa. Sina Davida, ha lu yolisi misuha, kamba ku fulalela likuka za luna ze lukile kabakala ku pima manyando. Ku eza cwalo ku ka tisa tabo kwa mafelelezo. Ka mukwa ufi?

9. Mu fe mutala o bonisa ka mo ku saba Mulimu ku kona ku lu tabiseza niha lu nyandiswa.

⁹ Mulumiwa ya sebelelize hahulu mwa  Africa u bulela kuli: “Ni hupula za me yo muñwi ni mwan’a hae wa musizana ba ne ba hanile ku leka makadi a kopano ya lipolitiki bakeñisa ku ikambusa kwa lifasi. Ne ba likauzwi ki sikwata sa banna ni ku lukululwa kuli ba ye habo bona. Ha ne ba nze ba kutela kwa hae, me y’o na sweli ku omba-omba mwan’a hae ya na sa utwisisi libaka le ne ba nyandiselizwe cwalo. Nihaike ne ba si ka taba ka nako yeo, ne ba na ni lizwalo le linde. Hasamulaho, ne ba tabile hahulu kuli ne ba utwile Mulimu. Kambe ne ba lekile makadi a lipolitiki, nyangela ya batu yeo ne i kabe i tabile hahulu-hulu. Silundwamanje seo ne si kabe si ba file lino ze munati ni ku ba binela ha ne ba nze ba kutela habo bona cwalo. Kono musizana ni bomahe ha ne ba ka ziba kuli ba fulalezi tumelo ya bona, ne ba ka filikana maswe.” Ku saba Mulimu kwa bona ne ku ba tusize ku tiyela butata bo.

10, 11. Musali yo muñwi na kutuzi bunde bufi kabakala ku saba Mulimu?

¹⁰ Ku saba Mulimu hape ku kona ku lu tiseza tabo muta lu talimana ni miliko ya ku bonisa likute kwa bupilo. Bo Mary ha ne ba itwezi mwan’a bona wa bulalu, dokota na ba bulelezi kuli ba sulule mulwalo wo. Na ize: “Mu mwa kozi. Kwa kona ku zuha butata nako ifi kamba ifi mi mwa kona ku timela mwa lihora ze 24 fela. Mi mwan’a mina u ka shwa ni yena. Ku be cwañi kamba cwañi, ha ku na sepo ya kuli mbututu i ta iketa.” Bo Mary ne ba itutanga Bibele ni Lipaki za Jehova, kono ne ba si ka kolobezwa kale. Bo Mary ba bulela kuli: “Niha ne kuli cwalo, ne ni ikatulezi ku sebeleza Jehova, mi ne ni bata ku satalala ku zwelapili ku ipeya ku mu utwa ku si na taba ni nto ifi kamba ifi.”—Exoda 21:22, 23.

¹¹ Ha ne ba itwezi cwalo, bo Mary ne ba patehile ku ituta Bibele ni ku babalela lubasi lwa bona. Kwa mafelelezo, mbututu yo a pepwa. Bo Mary ba bulela kuli: “Ne ni puluhile ka t’ata hanyinyani ku fita mo ne ku bezi kwa milwalo ye miñwi ye mibeli, kono ne ku si na matata a matuna luli.” Ku saba Mulimu ne ku tusize bo Mary kuli ba be ni lizwalo le linde, mi hamulahonyana se ba kolobezwa. Mbututu yo ni yena ha ne a nze a hula, a ituta ku saba Mulimu, mi cwale sa sebeleza fa ofisi ye ñwi ya mutai wa Lipaki za Jehova.

‘Mu Ikutaze ka Jehova’

12. Ku saba Mulimu ne ku tiisize cwañi Davida?

¹² Kwanda ku mu takeleza kwa ku eza bumaswe, ku saba Jehova kwa Davida ne ku mu tusize ka nzila ye ñwi. Ne ku mu tusize ku nga mihato ni ku eza lika ka butali ha na li mwa miinelo ye t’ata. Kabakala ku mata Saule, Davida ni banna ba hae ne ba izo tanda mwaha u li muñwi ni likweli z’e ne mwa munzi wa Zikilagi mwa naha ya Mafilisita. (1 Samuele 27:5-7) Nako ye ñwi Davida ni banna kaufela ha ne ba zwile mwa munzi, lifunga za Maamaleke za cisa munzi ni ku hapa basali kaufela, ni banana, ni mitapi kaufela. Davida ni banna ba hae ha se ba kutile ni ku bona ze ne ezahezi, ba situwa sililo. Banna ba halifa kabakala sililo seo mi ba fumbela ku mu pobaula. Niha na kalezwi cwalo, Davida na si ka zwafa. (Liproverbia 24:10) Ku saba Mulimu kwa hae ne ku mu susuelize ku sepa Jehova, mi a ‘ikutaza ka Jehova.’ Ka tuso ya Mulimu, Davida ni banna ba hae ba lelekisa Maamaleke ni ku yo ba amuha lika kaufela ze ne ba hapile.—1 Samuele 30:1-20.

13, 14. Ku saba Mulimu ne ku tusize cwañi Mukreste yo muñwi kuli a eze liketo ze nde?

¹³ Batanga ba Mulimu kacenu ni bona ba talimananga ni miinelo ye tokwa kuli ba sepe Jehova ni ku ba ni bundume bwa ku nga muhato. Mu nyakisise mutala wa bo Kristina. Ha ne ba sa li kalibe, bo Kristina ne ba itutanga Bibele ni Lipaki za Jehova. Kono ne ba bata ku ba mulizi wa kañombyo ka ka bizwa piano, mi ba eza zwelopili luli mwa musebezi wo. Hape ne ba ziba taba ya ku kutaza mi kabakaleo ne ba saba ku ba ni buikalabelo bo bu tiswa ki kolobezo. Bo Kristina ha ne ba nze ba zwelapili ku ituta Linzwi la Mulimu, la kalisa ku ba fita kwa pilu. Ne ba sweli ku ituta ku saba Jehova, mi ba lemuha kuli Jehova u tokwa kuli batanga ba hae ba mu late ka pilu ya bona kaufela, ni ka moyo wa bona kaufela, ni ka kutwisiso ya bona kaufela,  ni ka m’ata a bona kaufela. (Mareka 12:30) Ku lemuha zeo ne ku ba tusize kuli ba neele bupilo bwa bona ku Jehova ni ku kolobezwa.

¹⁴ Bo Kristina ne ba kupile Jehova kuli a ba tuse ku eza zwelopili ya kwa moya. Bo Kristina ba talusa kuli: “Ne ni ziba kuli bupilo bwa ku liza tuñombyo bu tokwa ku hela-hela mi mwa silimo si li siñwi mutu u kona ku liza kwa likwata ze 400 za batu. Kabakaleo na iketela ku sebeza sina ticele kuli ni ifepe ni ku zwelapili mwa sebelezo ya nako kaufela.” Ka nako yeo, ne se ku tomahanyizwe kale kuli bo Kristina ba yo liza lwa pili fapil’a sicaba mwa muyaho o no tumile hahulu mwa naha ya bona. Ba bulela kuli: “Mulizezo wo kona wo ne u li wa pili ni wa mafelelezo.” Ku zwa fo bo Kristina ba nyalwa ku Mukreste ya li eluda mwa puteho. Mi sibeli sa bona se ba sebeleza fa mutai o muñwi wa Lipaki za Jehova. Ba tabile hahulu kuli Jehova na ba file m’ata a ku eza liketo ze nde, mi cwale ba itusisa m’ata ni nako ya bona mwa sebelezo ya Jehova.

Sanda sa Butokwa

15. Davida na bata ku siyelañi bana ba hae, mi na ezize cwañi cwalo?

¹⁵ Davida na ñozi kuli, “bana ba ka, a mu tahe, mu ni teeleze, ni ka mi luta za ku saba [Muñ’a] Bupilo.” (Samu 34:11) Ka ku ba ndate, Davida na bata ku siyela bana ba hae sanda sa butokwa hahulu—sona sa ku ba ni sabo ye swanela ya ku saba Jehova. Ka manzwi ni ka likezo za hae, Davida na bonisize kuli Jehova hasi Mulimu ya sabisa, ya itukiselize ku batisisa ba ba loba milao ya hae ni ku ba ota, kono ki Ndate ya lilato, ya babalela, ni ku swalela bana ba hae ba fa lifasi. Davida na buzize kuli: “Ki mañi ya ka tomenena lifoso?” Hape kuli a bonise sepo ya hae ya kuli Jehova ha batisisi milatu ya luna, na ekelize ku bulela kuli: “U ni swalele lifoso ze patilwe.” Davida na na ni sepo ya kuli ha na ka ikataza ka mwa konela kaufela, manzwi a hae  ni za na nahana ne li ka tabelwa ki Jehova.—Samu 19:12, 14, NW.

16, 17. Bashemi ba kona ku luta cwañi bana ba bona ku saba Jehova?

¹⁶ Davida ki mutala o munde kwa bashemi kacenu. Ralph ni munyan’a hae ba ba sebeleza fa ofisi ye ñwi ya mutai wa Lipaki za Jehova u bulela kuli: “Bashemi ba luna ne ba lu utile ka mukwa o no tisa kuli lu ikole ku ba mwa niti. Ha ne lu sa li banana, ne ba lu lumelezanga ku kena kwa makande a bona a za litukiso za puteho, mi lwa cisehela hahulu niti sina bona. Ne ba lu lutile kuli lwa kona ku eza lika ze nde mwa sebelezo ya Jehova. Mane ka lilimo-limo, lubasi lwa luna ne lu pilile mwa naha mo ne ku na ni butokwi bo butuna bwa bakutazi ba Mubuso mi lwa tusa kwa ku toma liputeho ze nca mwa sibaka seo.”

¹⁷ U sa zwelapili ku bulela kuli: “Se ne si lu tusize ku zamaya mwa nzila ya niti ne si milao ye miñata-ñata ye t’ata, kono ki kabakala kuli bashemi ba luna ne ba nga Jehova ku ba wa luli, ni kuli u na ni musa ni bunde. Ne ba tabela ku ituta hahulu za Jehova, mi ne lu likanyisize mutala wa bona wa ku saba Jehova ni lilato la bona ku yena. Nihaiba ha ne lu fosanga, bashemi ba luna ne ba sa lu utwisangi inge kuli Jehova ha sa lu lata, mi hape ne ba sa lu kwalelangi ku eza lika ze ñwi kabakala mabifi. Hañata ne ba lu inisanga fafasi ni ku lu eleza fela, mi boma bona fokuñwi ne ba lotisanga miyoko inze ba lika ku fita kwa lipilu za luna. Mi likelezo zeo ne li tusize. Ne lu itutile ka manzwi ni ka likezo za bashemi ba luna kuli ku saba Jehova kona nto ye nde ni kuli ku ba yo muñwi wa Lipaki za Jehova ne ku tabisa isiñi ku imeza.”—1 Joani 5:3.

18. Lu ka fumana mipuzo mañi haiba lu saba Mulimu wa niti?

¹⁸ Mwa “manzwi a Davida a ku feleleza,” lu bala kuli: “Ya busa batu ka mulao, ya busa inz’a saba Mulimu, u swana sina liseli la kakusasana lizazi ha li pazula.” (2 Samuele 23:1, 3, 4) Ku bonahala kuli Salumoni, mwan’a Davida ya na mu yolile, na utwisisize sisupo seo kakuli na kupile Jehova kuli a mu fe “pilu ye na ni kutwisiso” ni buikoneli bwa “ku keta se sinde ku se si maswe.” (1 Malena 3:9) Salumoni na lemuhile kuli ku saba Jehova kona nzila ya butali ni tabo. Kwa mafelelezo na unguzi buka ya Muekelesia ka ku bulela kuli: “Mi cwale litaba ze, mafelelezo a zona ki a: Saba Mulimu, mi u mamele milao ya hae. Kakuli ki yona swanelo kaufela ya mutu. Kakuli misebezi kaufela, ni ze patilwe kaufela, kamba ki ze nde kamba ze maswe, Mulimu u ka li bulela ni ku li atula.” (Muekelesia 12:13, 14) Haiba lu mamela kelezo yeo, lu ka fumana kuli “mupuzo wa ku ikokobeza ni ku saba Mulimu” hasi butali fela ni tabo kono hape “ki bufumu, ni ku kutekiwa, ni bupilo.”—Liproverbia 22:4.

19. Kiñi se si ka lu tusa ku utwisisa se ku talusa ku “saba [Muñ’a] Bupilo”?

¹⁹ Mwa mitala ya mwa Bibele ni ya miteñi ya cwale, lu iponezi kuli ku saba Mulimu hande ku tusa hahulu batanga ba Jehova mwa bupilo. Sabo yeo ha i lu tibeli fela ku eza lika ze maswe ze sa tabisi Ndat’a luna wa kwa lihalimu kono hape ya kona ku lu fa bundume bwa ku talimana ni lila za luna ni m’ata a ku tiyela miliko ni matata a lu tahelanga. Haike kaufela luna, banana hamoho ni ba bahulu, lu tukufalelwe ku ituta Linzwi la Mulimu, ku yeya ze lu ituta, ni ku sutelela ku Jehova kamita mwa litapelo ze zwelela kwa pilu. Haiba lu eza cwalo, ha lu na fela ku fumana “ku ziba za Mulimu” kono lu ka utwisisa ze ku talusa “ku saba [Muñ’a] Bupilo.”—Liproverbia 2:1-5.

[Litaluso za kwatasi]

Kana Mwa Kona ku Talusa?

Ku saba Mulimu ku kona

• ku tusa cwañi mutu ku bakela sibi se situna?

• ku tisa cwañi tabo muta mutu a talimana ni miliko ni nyandiso?

• ku lu tiisa cwañi kuli lu eze tato ya Mulimu?

• ku ba cwañi sanda sa butokwa kwa bana ba luna?

[Lipuzo za Tuto]

[Siswaniso se si fa likepe 26]

Ku saba Mulimu ne ku tusize Davida kuli a si ke a bulaya Saule

[Maswaniso a fa likepe 29]

Ku saba Mulimu ki sanda sa butokwa se ba swanela ku siyela bana ba bona bashemi