Siapalo sa Boya ni Ku Tiya mwa Tumelo
Siapalo sa Boya ni Ku Tiya mwa Tumelo
LOUIS IX mulena wa France a kile a si apala fateñi. Muñali Thomas More ha n’a ituta mulao kwa butangana, n’a si apalanga mi na kona ku tona ka lihora ze 19 kamba ze 20 ka zazi mi na konile ku eza cwalo ka likweli-kweli. Mane More u zibahala kuli na si apalanga hahulu mwa bupilo bwa hae. Mi Thomas Becket, yo muhulu kwa mabishopu wa kwa Canterbury ha na bulailwe mwa keleke ya Katolika, siapalo sa mufuta wo ne si fumanwi kwatas’a libyana za hae ka ku sa libelela. Batu bao ne ba swana cwañi? Ne ba na ni mukwa wa ku tukufaza mibili ya bona ka ku apalanga siapalo sa boya.
Siapalo se si taluswa fo ne li sa boya bwa puli bo bu ñwalula mi ne si apalwanga fa mubili ona cwalo fela kuli litalo la mutu ya si apezi li kale ku yuwa. Hape siapalo seo ne si kenwa ka bunolo ki linda. Ku bulelwa kuli Thomas Becket na kile a apalanga siapalo sa hae sa boya ni putulukwe ya boya bo bu swana ku fitela siapalo seo si “fufula linda.” Hamulaho wa lilimo za ma-1500, mwa sibaka sa ku itusisa boya bwa puli fokuñwi ne ku itusiswanga buwaya bo busisani-sisani bo bu shengile mi buwaya bo ne bu taba-taba mubili. Mupangelo wo wa siapalo ne u ekeza fela kwa butuku bwa na utwa mutu ya si apezi.
Ka ku ya ka dikishinari ye ñwi, mulelo o ne si lukiselizwe siapalo sa boya, ku likana ni mitukufalezo ye miñwi ya mubili, ne li kuli si “kome litakazo za mubili ni ku tusa mutu ku tiya mwa tumelo.” Kono haki ba bahulu fela ba bulapeli ba ne ba apalanga siapalo seo kono ni balapeli ba bañwi ne ba si apalanga, ku kopanyeleza cwalo ni batu ba ba cwale ka makwambuyu ba muuso. Mane ni la kacenu le bulapeli bo buñwi bu sa latelela mukwa wo.
Kana ku apala siapalo sa boya kamba ku itima lika za butokwa kwa mubili kwa kona ku tusa mutu ku tiya mwa tumelo? Batili, ku tiya mwa tumelo ha ku si ka itinga fa lika ze cwalo. Esi mane muapositola Paulusi na lwanisize mukwa wa “ku sa babalela mubili.” (Makolose 2:23) * Kono kuli mutu a tiye mwa tumelo luli u tokwa ku ba ni zibo ya Mulimu ka ku ituta Linzwi la hae ka tukufalelo ni ku itusisa zibo yeo mwa bupilo bwa hae.
[Litaluso za kwatasi]
^ para. 5 Haiba mu bata ku ziba ze ñata ka za taba ye, mu bone Awake! ya October 8, 1997, ye lwezi toho ya taba ye li “The Bible’s Viewpoint: Is Asceticism the Key to Wisdom?”
[Manzwi a bañi ba maswaniso fa likepe 32]
Mulena Louis IX, ya bonisizwe fahalimu: Ku zwelela mwa buka ya Great Men and Famous Women; Thomas Becket, ya bonisizwe fahali: Ku zwelela mwa buka ya Ridpath’s History of the World (Vol. IV); Thomas More, ya bonisizwe kwatasi: Ku zwelela mwa buka ya Heroes of the Reformation, 1904