Ba Ba Ishuwa Ba Ka Luwa Lifasi

Jean-Marie Pelt, caziba wa limela ni lifolofolo wa Mufura, na ize: “Ni nahana kuli pupo i ka cinciwa ni ku uncafazwa. . . . Isi la kacenu le, kono k’o kwapili luli, muta ku ka ba ni lihalimu le linca ni lifasi le linca.”

BAKEÑISA ku ziyezwa ki miinelo ya batu ni mo ba pilela fa lifasi, batu ba bañata ne ba ka tabela ku bona lifasi la luna ha ne li ka ba paradaisi. Kono haki mwa lilimo za ma 2000 fela fo ba kaliselize batu ku ba ni sepo ya paradaisi. Kale-kale k’o, Bibele ne i sepisize kuli Paradaisi ne i ka kutiswa sinca fa lifasi. Manzwi a n’a bulezi Jesu a li, ‘ba ba ishuwa ba ka ca sanda sa lifasi’ ni a li, “se si latwa ki Wena si ezwe mwa lifasi, mo si ezezwa kwa lihalimu,” ki a mañwi a litaba za mwa Mañolo ze ba ziba hahulu batu. (Mateu 5:5; 6:10) Kono kacenu haki batu ba bañata ba ba lumela kuli ku ka ba ni paradaisi ya fa lifasi-mubu mo ku ka yaha batu ba ba ishuwa. Batu ba bañata ba ba ipulela kuli ki Bakreste ha ba sa na sepo ya kuli Paradaisi i ka ba teñi.

Mutende wa kwa France o bizwa La Vie ili o hatiswanga hañwi ka sunda u talusa libaka batu, sihulu mwendi ba Keleke ya Katolika, ha ba tuhezi ku lumela kuli ku ka ba ni paradaisi, ibe fa lifasi-mubu kamba kwa lihalimu, ha u li: “Hamulaho wa ku ba yona taba ye tuna hahulu mwa lituto za bulapeli bwa Katolika ka lilimo ze bat’o eza 1900, [taba ya] paradaisi i tuhezi ku bulelwa kwa lisebelezo za bulapeli, kwa Lisunda, kwa likolo za bulapeli, ni kwa lituto za tutekisema.” Lona linzwi luli la paradaisi li bulelwa kuli li “fifalisizwe” ki “litaba ze sa utwisisehi ni filikanyo.” Bakutazi ba bañwi ha ba tabeli ku itusisanga linzwi la paradaisi bakeñisa kuli li “talusa hahulu za ku pila ka tabo fa lifasi-mubu.”

Ka ku ya ka Frédéric Lenoir, caziba wa za bulapeli, u li litumelo za paradaisi ki kale li fita fa ku ba “litaba ze ba nahana fela batu ba bañata.” Ka ku swana, Jean Delumeau, caziba wa litaba za kale ya ñozi libuka ze ñata ze bulela za paradaisi, u nahana kuli lisepiso za mwa Bibele ha li na ku talelezwa honacwalo fela ka mo li ñolezwi. U ñola kuli: “Ka ku alaba puzo ye li, ‘Ki lifi ze ba sa lumela batu ka za Paradaisi?’ Bakreste ba zwelapili ku alaba kuli: Lwa itumela bakeñisa kuli Mupulusi n’a zusizwe, muta o muñwi, kaufela luna lu ka yo swalisana ni ku pila hamoho ka tabo.”

Kana taba ya paradaisi ya fa lifasi-mubu i sa li ya butokwa? Lifasi la luna li ka ba cwañi luli kwapili? Kana nako ya kwapili i bonahala ku ba ni kafifi, kamba kana lwa kona ku bona hande nako ya kwapili? Taba ye tatama i ka alaba lipuzo zeo.