Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Jesu “u ka lamulela mubotana” ka mukwa ufi sina mo ne i bulelezi cimo Samu 72:12?

Mwahal’a nako ya puso ya hae, batu kaufela ba ka atulelwanga hande ku si na bumutendasilya. Ndwa hañata i tisanga bunjebwe, kono Kreste u ka tisa kozo ye inelela. Wa utwisisa mapalelwi a batu mi u ka ba kopanya kaufela, mi u ka bona teñi kuli ba na ni lico ze likani. (Samu 72:4-16)—5/1, likepe 7.

• Luna ka ku ba Bakreste lu kona cwañi ku ba ni tukuluho ya ku bulela? (1 Timotea 3:13; Filemoni 8; Maheberu 4:16)

Lwa kona ku ba ni tukuluho ya ku bulela ka ku kutaza ku ba bañwi ka cisehelo ni ka bundume, ka ku luta ni ku fa kelezo kapilipili ni ku i fa hande, ni ku bulela maikuto a luna kaufela ku Mulimu mwa tapelo, ka ku ikolwisa kuli u ka lu utwa ni ku lu alaba.—5/15, makepe 14-16.

• Mwa Mulao, ki kabakalañi miitusezo ye miñwi ya lilama za lupepo ha ne i ngiwa kuli i ‘silafaza’ mutu?

Milao ye ama za ku silafala ko ku tiswa ki ku izwela fela kwa lupepo lwa sinna, ku keluha kwa musali, ni ku pepa mwana ne i susueza ku ba ni makete ni buikangulo bo bunde, ne i koñomeka bukeni bwa mali ni ku bonisa kuli ne ku tokwahala swalelo ya libi.—6/1, likepe 31.

• Haiba mutu u bata ku ba ni tabo, ki kabakalañi ha ne ku ka mu tusa ku nyakisisa buka ya Lisamu?

Bañoli ba Lisamu ne ba ikolwisize kuli tabo i zwa fa ku itama silikani se si nde ni Mulimu. (Samu 112:1) Ne ba koñomekile kuli ha ku na nto ye tisa tabo ye swana ni tabo ye fumanwa ka ku swalisana ni “sicaba seo [Muñ’a] Bupilo a li Mulimu wa sona.” (Samu 144:15)—6/15, likepe 12.

• Ki silikani mañi se si ipitezi sa n’a na ni sona Jehova ni Maisilaele ba kwaikale?

Ka mwaha wa 1513 B.C.E., Jehova na isweli bulikani bo bunca ni Maisilaele. (Exoda 19:5, 6; 24:7) Hamulaho wa fo, Maisilaele ne ba pepilwe sina sicaba sa Mulimu se si ketilwe se si inezi ku yena. Niteñi, mutu ni mutu n’a na ni ku ikezeza katulo ya ku sebeleza Mulimu.—7/1, makepe 21-2.

• Ki kabakalañi ha lu swanela ku eza linto kaufela lu “sa tongi”? (Mafilipi 2:14)

Mitala ye miñata ya mwa mañolo i bonisa kuli ku tongoka ne ku tisize kozi ye tuna mwahal’a batu ba Mulimu. Lu swanela ku nahanisisa za bumaswe bo bu kona ku tiswa ki ku tongoka kacenu. Batu ba ba si ka petahala ba na ni mukwa wa ku tongoka, mi lu swanela ku itibelela ku lemuha lisupo kaufela ze bonisa mukwa wa ku tongoka ni ku u tokolomoha.—7/15, makepe 16-17.

• Lu ziba cwañi kuli butali bo bu taluswa kwa Liproverbia 8:22-31 haki kalemeno fela ka butali?

Butali bo bu bulezwi fa ne bu ‘bupilwe’ sina nto ya pili kwa misebezi ya Jehova. Mulimu u bile teñi kamita mi u bile ya butali ka nako yeo kaufela; butali bwa hae ne bu si ka bupiwa. Butali bwa kwa Liproverbia 8:22-31 ne bu li ni Jehova bu nze bu mu “sebeleza,” ili ku talusa sibupiwa sa kwa moya se ne si sebelize hahulu ni Jehova mwa musebezi wa ku bupa. (Makolose 1:17; Sinulo 3:14)—8/1, Likepe 31.