Ku Sa Ba mwa Buinosi Niha Ba Supezi

BAKEÑISA busupali, ba bañata ba banga lianga, ku ikauhanya kwa nyangela. Bo Fernand Rivarol ba ba shwile inze ba na ni lilimo ze 95 za buhulu mwa Geneva, kwa Switzerland ne ba si cwalo. Ne ba pila ba nosi, bakeñisa kuli bafumahali ba bona ne se ba shwile mi mwan’a bona ya nyezwi n’a na ni lapa la hae. Nihaike kuli hañata ne ba tolanga fela fa ndu ya bona, ne ba sa ikutwi bulutu. Hañata ne ba inanga kwa tafule mwa ndandulo, inze ba sweli luwaile, ni ku lizeza batu kuli ba ambole ni bona za kwa moya.

Mwa nako ya bona ye tabisa, ne ku na ni nako ye ne ba bile mwa buinosi luli bo Fernand. Kabakalañi? Bo Fernand ni bafumahali ba bona ba sa zo ba fela Lipaki za Jehova ba ba tiile mwa 1939, Ndwa ya Lifasi ya Bubeli ya tumbuka mwa Europe. Bo Fernand ne ba pilile ka ku lumelelana ni katulo ya bona ye tomile fa Bibele ya ku sa holofaza mutu. Kacwalo ba zwisiwa fa musebezi mi ne ba pikile tolongo hañata-ñata—mi nako ye ne ba pikile mwa tolongo yeo ha i kopanyiwa i kwana lilimo ze keta-lizoho ni licika—ka yona nako yeo ne ba kauhanyizwe kwa basali ba bona ni kana ka bona ka kasizana.

Ha ba iheta, bo Fernand ne ba ize: “Kwa batu ba bañata, ne ku bonahezi inge kuli ne ni tuhezi musebezi o munde ni ku yubeka lubasi lwa ka. Batu ne ba ni shwaula ni ku ni nga sina sikebenga. Niteñi, ha ni nahana lilimo zani ze t’ata, ni hupula hande ka mwa na lu tuselize Jehova. Ku fitile lilimo ze ñata ku zwa fo, kono ni sa sepile Jehova sina mo ne ni mu sepezi ka nako yani.”

Tumelo yeo ne i susumelize bo Fernand ku bulelela ba bañwi sepo ya bona ya mwa Mañolo fa luwaile. Haiba ne ba ambolisani hande ni mutu yo muñwi, ne ba lumelanga mutu yo hatiso ye tomile fa Bibele. Hamulaho, ne ba lizezanga hape yena mutu yo luwaile kuli ba ikolwise haiba u ikozi ku bala hatiso yeo. Fokuñwi bona batu ne ba alabanga ka ku ñola liñolo la ku itumela, ili le ne li tabisanga hahulu bo Fernand.

Mwendi mu ka potelwa ki mutu ya swana ni bo Fernand mwa silalanda sa mina. Kana mu ka teeleza ku za ka bulela kuli mu zibe za lumela? Lipaki za Jehova ba tabelanga kamita ku mi taluseza ze ba lumela.