Lipuzo Ze Zwa kwa Babali

Hamulaho wa tiko ya mafelelezo kwa mafelelezo a Lilimo ze Sikiti, kana batu ba ka kona ku eza sibi ni ku shwa?

Mañolo a mabeli a fumaneha kwa Sinulo a lu fa litaba ze lu tusa ku alaba puzo ye, h’a li: “Lifu ni libita za nepelwa mwa lisa la mulilo. Lisa la mulilo ki lifu la bubeli.” (Sinulo 20:14) “U ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”—Sinulo 21:4.

Mu lemuhe nako ye amilwe fa. Ku nepelwa kwa “lifu, ni libita” mwa lisa la mulilo ku ka ezahala hamulaho wa bapunyuhi ba Armagedoni, ba ba zusizwe kwa bafu, ni ba ba ka pepiwa kaufela hamulaho wa Armagedoni ha se ba atuzwi ka ku ya ka ze “ñozwi mwa libuka,” kamba lika kaufela za ka tokwa Jehova kuli batu ba li eze mwa lilimo ze sikiti. (Sinulo 20:12, 13) Muapositola Joani u ñola pono ye ñwi, ye kwa Sinulo kauhanyo 21, ye ka talelezwa mwa Puso ya Kreste Jesu ya Lilimo ze Sikiti. Kono talelezo ye tuna ya pono yeo i ka ba teñi kwa mafelelezo a Lizazi la Katulo la lilimo ze sikiti. Jehova ka nako yeo u ka yaha ni batu ku si na bayemeli, Jesu ha sa kutisize Mubuso ku Ndatahe. Jehova u ka yaha kwa moya ni “macaba a hae” ka ku busa fahalimw’a bona luli kuya ku ile. “Lifu ha li sa na ku ba teñi” luli muta batu ba ka petahala bakeñisa ku liululwa ki sitabelo sa tiululo sa Kreste ka ku tala.—Sinulo 21:3, 4.

Kacwalo, lifu le li bulezwi mwa mañolo a bonisizwe fahalimu ki lifu le li hozizwe ku Adama, le li ka feliswa ka tiululo ya Kreste. (Maroma 5:12-21) Lifu le ba hozize batu ku mutu wa pili ha se li felisizwe, batu ba ka ba sina Adama ha na bupilwe. Adama na petehile, kono fo ne ku sa talusi kuli na sa koni ku shwa. Jehova na bulelezi Adama kuli a si ke a ca kwa “kota ya ku ziba bunde ni bumaswe,” mi n’a ize: “Kakuli nako y’o i ca, u ka shwa luli.” (Genese 2:17) Leo ne li lifu le ne li tisizwe ki sibi sa ka bomu. Hamulaho wa tiko ya mafelelezo kwa mafelelezo a Puso ya Lilimo ze Sikiti, batu ba ka zwelapili ku ba ni tukuluho ya ku iketela lika. (Sinulo 20:7-10) Ba ka zwelapili ku iketela ze ba lata, ibe ku zwelapili ku sebeleza Jehova kamba kutokwa. Kacwalo ha ku konwi ku bulelwa ngambu kuli ha ku na mutu ya ka fulalela Mulimu, sina mwa na ezelize Adama.

Ki sika mañi se si ka ezahala ku mutu ya ka iketela ku ipangula hamulaho wa tiko ya mafelelezo muta lifu kamba libita li ka ba siyo? Ka nako yeo, ha ku na ku ba ni lifu le li hozizwe ku Adama. Mi Hades, lona libita mo ku yanga mutu kaufela ya shwa ya na ni sepo ya zuho, ha li na ku ba teñi. Kono Jehova wa kona ku timeza muipanguli kaufela mwa lisa la mulilo, ku mu tima sepo kaufela ya zuho. Lifu le li cwalo li ka ba sina lifu le ne ba shwile ka lona bo Adama ni Eva, isi lifu le ba hozize batu ku Adama.

Kono ha lu koni ku libelela kuli nto ye cwalo i ka ezahala. Ba ba ka sepahala mwa tiko ya mafelelezo ba ka shutana ni Adama ka nzila ye ñwi ye ipitezi. Ba ka be ba likilwe ka ku tala. Lwa kona ku ba ni sepo ya kuli tiko ya mafelelezo yeo i ka ezwa ka swanelo kakuli Jehova wa ziba ku tatuba batu mwahali ni kwande. Lwa kona ku kolwa kuli tiko ya mafelelezo i ka timeza batu kaufela ba ba si ke ba itusisa hande tukuluho ya ku iketela. Kacwalo, nihaike kuli ba ba sepahalile mwa tiko ya mafelelezo ba kona ku fetuhela Mulimu mi kacwalo ni ku sinyiwa, mwendi ni yona nto ye cwalo ha i na ku ezahala.

[Siswaniso se si fa likepe 31]

Hamulaho wa tiko ya mafelelezo, batu ba ka swana cwañi ni Adama?