Bulapeli Bo Bu Kona ku Mi Tusa

WALISAMU Asafi na ize: “Buswa bwa ka, ki ku sutelela ku Mulimu.” Na batile ku likanyisa batu ba ne ba si na taba ni ku sebeleza Mulimu ili ba ne ba ipatela fela za bona mwa bupilo. Kono Asafi a nahanisisa bunde bwa ku sutelela ku Mulimu mi sa lemuha kuli ku sutelela ku Mulimu ne li buswa ku yena. (Samu 73:2, 3, 12, 28) Kana bulapeli bwa niti ki buswa ku mina kacenu? Bu kona ku mi tusa cwañi?

Ku lapela Mulimu wa niti ku mi tusa ku ndongwama lika za butokwa mwa bupilo ku fita ku ipatela fela za mina. Bakeñisa mwa lu bupezi “Mulimu wa lilato,” batu ba ba ipatela fela za bona ni kamuta ha ba na ku fumana tabo. (2 Makorinte 13:11) Jesu na lutile taba ya butokwa, ye li ya niti, ya mo ba bupezwi batu ha na ize: “Ku na ni mbuyoti [kamba tabo, NW] mwa ku fana, ye fita ye mwa ku fiwa.” (Likezo 20:35) Kona libaka ha lu tabelanga ku sebeleza balikani ni lubasi lwa luna. Kono tabo ye tuna i fumanwa ka ku sebeleza Mulimu. Ki yena ye lu swanela ku lata hahulu ku fita mutu ufi kamba ufi. Bolule-lule ba batu ba ba shutana-shutana ba lemuhile kuli ku lapela Mulimu ka ku ya ka mwa tokwela kwa kolwisa luli.—1 Joani 5:3.

Ku Ba ni Mulelo mwa Bupilo

Bulapeli bwa niti hape bwa kona ku ba buswa ku mina kakuli bu mi fa mulelo mwa bupilo. Kana mu lemuhile hañata mo mu belanga ni tabo ha mu ikutwa kuli mu petile nto ye ñwi ya butokwa? Buñata bwa batu ba na ni mulelo mwa bupilo, ibe kuli ki mulelo o ama mabasi, balikani, lipisinisi kamba za ku itabisa. Bakeñisa ku sa swaleha hande kwa bupilo, zona lika zeo ha li ba fi tabo. (Muekelesia 9:11) Kono bulapeli bwa niti bwa kona ku mi tusa ku ba ni mulelo o ka zwelapili ku mi fa tabo niha mu kopana ni lika ze swabisa pilu.

Bulapeli bwa niti bu kopanyeleza ku ziba Jehova ni ku mu sebeleza ka busepahali. Ba ba mwa bulapeli bwa niti ba sutelela hahulu ku Mulimu. (Muekelesia 12:13; Joani 4:23; Jakobo 4:8) Mu kana mwa nahana kuli ku t’ata kuli mu fite fa ku ziba hande Mulimu cwalo kuli a be mulikan’a mina. Kono haiba mu kengeyela litaba za hae za mwa sebelisanezi ni batu ni ku nyakisisa za bupile, mwa kona luli ku fita fa ku utwisisa butu bwa hae. (Maroma 1:20) Hape ka ku balanga Linzwi la Mulimu, mwa kona ku utwisisa ze lu pilela, libaka Mulimu ha tuhelela manyando, ni mwa ka a feliseza, mi mwendi nto ye tuna ni ku fita ye mu ka utwisisa, ki ku ziba mo mu kona ku ezeza kuli mu pete kalulo ye tuna ku za sweli ku eza Mulimu. (Isaya 43:10; 1 Makorinte 3:9) Ku utwisisa lisupo zeo kwa kona ku mi tusa ku ziba mulelo sakata o lu pilela!

Ku Ba Mutu yo Munde

Bulapeli bwa niti bu kona ku ba buswa ku mina kakuli bu mi tusa ku ba batu ba bande. Ha mu nze mu itiisa mwa bulapeli bwa niti, mwa kona ku hulisa tulemeno to tu kona ku mi tusa ku utwana hande ni ba bañwi. Mwa kona ku ituta ku Mulimu ni Mwan’a hae, mwa ku bela ni busepahali, mwa ku bulelela ka musa, ni mwa ku pilela hande ka ku ba mutu ya itingwa. (Maefese 4:20–5:5) Ha mu ziba hande Mulimu ni ku fita fa ku mu lata, mu ka susuezwa ku mu likanyisa. Bibele i bulela kuli: “Mu be ba ba likanyisa Mulimu sina bana ba ba latwa.”—Maefese 5:1, 2.

Kana ha ku koni ku tabisa ku ba mwahal’a batu ba ba likanyisa lilato la Mulimu? Mu ka tabela  ku ziba kuli bulapeli bwa Mulimu wa niti hasi bulapeli bo mu kona ku eza mu li nosi nosi. Bulapeli bwa niti bu mi tusa ku swalisana ni ba bañwi ba ba lata ze nde ni ze lukile. Kono mwendi ha mu tabeli taba ya ku lapela ka sikwata ni ba bañwi. Kono sina mo lu bonezi mwa taba ye felile, se si tisa butata mwa bulapeli bo buñata hasi taba ya ku lapela ka sikwata, kono ki taba ya kuli balapeli ha ba si ka swalisana ka nzila ye lukile mi ha ba na milelo ye swanela. Bulapeli bo buñata, bwa ka likwata, bu swalisanezi ku peta milelo i sili ye lwanisana ni Bukreste. Batu ba Mulimu ba swalisanisizwe ki Jehova ka sibili kuli ba pete mulelo wa butokwa. Bibele i bulela kuli: “Mulimu hasi Mulimu wa mifilifili, kono ki wa kozo.” (1 Makorinte 14:33) Sina bolule-lule ba bañwi, mu kana mwa lemuha kuli ku swalisana ni sikwata se siñwi sa Bakreste se si onga-ongilwe ka kozo kwa tiisa sepo ya mina.

Sepo ya Kwapili

Mañolo a Kenile a bonisa kuli Mulimu u sweli ku swalisanisa balapeli ba niti kuli ba punyuhe mafelelezo a lifasi le ni ku yola lifasi le linca “mo ku yahile Ku Luka.” (2 Pitrosi 3:13; Sinulo 7:9-17) Kacwalo bulapeli bo bu tusa, bu mi fa sepo ye tokwahala kuli mu be ni tabo. Ba bañwi mwa milelo ya bona ya kwapili ba sepile ku tiya kwa mibuso, lipisinisi za bona ze sepisa, kamba ku sepa kuli ba ka iketa ni ku ikangula hande kwa mubili ha ba ka lisela musebezi. Kono ki li sikai fela ku zona lika zeo ze kona ku fa mutu sepo ye tiile ya ku pila ka tabo kwapili. Kono cwale muapositola Paulusi na ñozi kuli: “Lu sepile Mulimu-Ya-Pila.”—1 Timotea 4:10.

Haiba mu batisisa hande, mu ka ba fumana balapeli ba niti. Mwa lifasi le li kauhani le, lilato ni swalisano kona lika ze ba zibahala ka zona Lipaki za Jehova. Ba zwa mwa linaha ni mwa mishobo ye shutana-shutana; kono ba swalisani bakeñisa kuli ba latana mi ba lata Jehova. (Joani 13:35) Ba mi mema ku swalisana ni bona kuli mu itemuhele isali mina ze ba fumani. Asafi na ñozi kuli: “Buswa bwa ka, ki ku sutelela ku Mulimu.”—Samu 73:28.

[Siswaniso se si fa likepe 7]

Mwa kona ku ba mulikan’a Mulimu