Muta Yo Muñwi mwa Lubasi A Fulalela Jehova

BO MARK ni bo Louise ki Lipaki za Jehova. * Ne ba lutile bana ba bona Mañolo ka lilato ni ka tokomelo, ku likana ni mo ba elelelizwe bashemi ba Sikreste mwa Bibele. (Liproverbia 22:6; 2 Timotea 3:15) Kono ka bumai, ba bañwi ba bana ba bona ne ba si ka zwelapili ku sebeleza Jehova ha se ba hulile. Bo Louise ba li: “Ni utwanga butuku kwa pilu bakeñisa banake ba ba latehile. Ni kona ku itimeza cwañi mitala, inge kuli ha ku na ze ezahezi, kono inge ni tuka mwa pilu zazi ni zazi? Ba bañwi ha ba bulelanga za bana ba bona, ni utwanga butuku ni ku enga-enganga mioko.”

Ki niti, mutu ha iketela ku fulalela Jehova ni mupilelo o ñozwi mwa Mañolo, bahabo yena sihulu ki bona ba ba utwanga hahulu butuku. Irene u li: “Ni lata hahulu muhulwan’a ka. Na kona ku eza nto ifi kamba ifi kuli a kone ku kutela ku Jehova!” Kaizel’a Maria ni yena na fulalezi Jehova ka ku ishangulela buitamaeli, mi Maria u li: “Ku ni bezi t’ata luli kakuli yena ki mutu yo munde ku ze ñwi ze kaufela. Ni mu tondanga hahulu fo lu kopanelanga lubasi lwa luna kaufela.”

Ki Kabakalañi Ha ku Li T’ata Cwalo?

Ki kabakalañi Bakreste ha ba utwanga butuku cwalo muta mwan’a bona kamba mwanahabo bona yo muñwi a fulalela Jehova? Kakuli b’a ziba kuli Mañolo a sepisa kuli ba ba zwelapili ku sepahala ku Jehova ba ka fiwa bupilo bo bu sa feli mwa paradaisi fa lifasi-mubu. (Samu 37:29; 2 Pitrosi 3:13; Sinulo 21:3-5) Ba bata ku yo ca sanda seo ni banna kamba basali ba bona, bana ba bona, bashemi ba bona, banyani kamba bahulwani ba bona, ni baikulyabo. Ba sisitwanga hahulu kwa lipilu ha ba nahana kuli balatiwa ba bona ba ba lisezi ku sebeleza Jehova ba kana ba yawa mbuyoti yeo! Bakreste ba ziba kuli nihaiba kacenu, milao ni likuka za Jehova, za ba tusa luli mwa bupilo. Kona libaka ha ba lobehanga lipilu ha ba bona mutu ya lateha ha cala mikwa ye ka mu kutulisa ze maswe.—Isaya 48:17, 18; Magalata 6:7, 8.

 Ba ba pila mwa mabasi mo ku si ka fumaneha kale mutu ya fulalezi Jehova ba kana ba palelwa ku utwisisa butuna bwa butuku bo ba utwa ba ba mwa mabasi ao. Ku fulalela Jehova ku ama likalulo kaufela za bupilo bwa ba bañwi mwa lubasi. Bo Louise ba li: “Ku fumaneha kwa mikopano ya Sikreste ku zamaya ku ni bela t’ata ha ni nze ni bona bashemi ba ikashaula ku seha ni ku ambola ni bana ba bona. Nto kaufela ye tabisa i ba busula kabakala ndiulu ya ku tonda ba bañwi.” Eluda wa mwa puteho ye ñwi u hupula nako yeo mwan’a musal’a hae na fulalezi Jehova ka lilimo z’e ne. Eluda yo u talusa kuli: “Hañata nihaiba ‘ku itabisa’ ne ku kataza. Ha ni fa musal’a ka mpo kamba ku mu isa kwa sibaka se sinde kwa mafelelezo a sunda, n’a lilanga ha ka hupula kuli mwan’a hae kambe ni yena u teñi.”

Kana Bakreste bao ba tulile tikanyo ha ba ikutwa cwalo? Haki cwalo. Kakuli mwendi kwa lineku le liñwi ba bonisa tulemeno twa Jehova, ya na bupile mutu ka siswaniso sa hae. (Genese 1:26, 27) Pulelo yeo i talusañi? Lu bulele cwana kuli, Jehova na ikutwile cwañi sicaba sa hae sa Isilaele ha ne si ipanguzi? Kwa Samu 78:38-41 lu lemuha kuli Jehova na utwile butuku. Kono ka pilu-telele ya hae a ba eleza ni ku ba kalimela, mi ha ba baka n’a ba swalelanga. Ku si na ku kakanya, Jehova u katelwa hahulu batu ba bupile, ona ‘musebezi wa mazoho a hae,’ mi ha ba tuhelangi fela ka bunolo. (Jobo 14:15; Jonasi 4:10, 11) Ni bona batu ki mwa ba bupezi cwalo,  mi mane mwa mabasi ba kona ku katelwana hahulu ni ku fita. Kacwalo ha lu komoki batu ha ba lilokanga mwanahabo bona ha fulalezi Jehova.

Kaniti ye ñwi ya litiko ze tuna za balapeli ba niti ki ku bona mutu ye ba lata ha lisela ku sebeleza Jehova. (Likezo 14:22) Jesu na ize ku mamela manzwi a hae ne ku ka shangumuna lifapahano mwa mabasi a mañwi. (Mateu 10:34-38) F’o ha ku talusi kuli ze i bulela Bibele ka ili zona li fapahanya mabasi. Kono taba kikuli ba bañwi mwa mabasi ba ba sa lumeli kamba ba ba sa sepahali ki bona ba ba shakanga lifapahano zeo ka ku hana Bukreste, ku bu tuhela, kamba mane ku bu lwanisa. Kono se lu itebuha kikuli Jehova ha si ka tuhelela basepahali ba hae kuli ba iponele mo ba ka ezeza ha ba kena mwa litiko. Haiba ha lu bulela cwana mu mwa sililo sa mwanahabo mina ya fulalezi Jehova, ki likuka mañi za Bibele ze kona ku mi tusa ku itiisa ni ku fumana kwateñi mwangalwa?

Mwa ku Ezeza

“Mu ikahele fa mutomo wa tumelo. . . . Mu tiiseze mwa lilato la Mulimu.” (Juda 20, 21) Mwendi ku likana ni miinelo ya mina, ha ku na ze mu kona ku eza ka nako ye kuli mu tuse mwanahabo mina ya tuhezi ku sebeleza Jehova. Kono niteñi mwa kona ku ikaha isali mina ni ku yaha bafi kamba bafi ba ba sa zwelapili ku sepahala mwa lubasi lwa henu, mi kona mo mu swanela ku ezeza cwalo. Ba babeli kwa bana ba bo Veronica ba balalu ne ba fulalezi Jehova. Mi cwale bo Veronica ba li: “Na ni bomunn’a ka ne lu elelizwe kuli haiba lu zwelapili ku ba ba ba tiile kwa moya, ku ka lu bela bunolo ku amuhela bana ba luna ha ba ka yo ikupula. Ne ku ka ba cwañi kambe mwana ya na latehile na fumani bondat’ahe mwa muinelo o maswe ha na kutile?”

Kuli mu zwelepili ku ba ba ba tiile, mu lukela ku tukufalelwa misebezi ya kwa moya. Misebezi yeo i kopanyeleza ku ba ni tomahanyo ye nde ya tuto ye tungile ya Bibele ni ku fumaneha kwa mikopano ya Sikreste. Mu ifane ku tusa ba bañwi mwa puteho ku likana ni miinelo ya mina. Ki niti kuli kwa makalelo ku ka mi bela t’ata ku eza lika zeo. Bo Veronica ba hupula kuli: “Nto ya pili ye ne tile mwa munahano wa ka ki ku bata ku ikambusa ku ba bañwi sina mo i ezezanga folofolo ha i holofezi. Kono bomunn’a ka ne ba tundamezi kuli lu zwelepili ni litukiso za kwa moya. Ne ba bona teñi kuli lwa fumaneha kwa mikopano. Nako ya ku ya kwa mukopano wa sikiliti ha ne i fitile, ne ni tokwa bundume kuli ni yo bonahala kwa sicaba. Kono mukopano wo ne u izo lu hohela bukaufi ni Jehova. Sihulu mwan’a luna wa mushimani ya na sa siyezi mwa niti na tiisizwe hahulu ki mukopano wo.”

Bo Maria ba ba bulezwi kwa makalelo, ba lemuhile kuli ku pateha mwa bukombwa kwa tusa luli mi ha lu bulela cwana ba sweli ku tusa batu ba bane ku ituta Bibele. Bo Laura ni bona ba li: “Nihaike ni sa lilanga ka zazi, ni itumela ku Jehova kuli niha ni palezwi ku uta bana ba ba tiile kwa moya inge bashemi ba bañwi, ni na ni litaba za butokwa hahulu mwa Bibele, ze kona ku tusa mabasi mwa miteñi ye ya maungulo.” Bana ba babeli ba ba hulile, ba bo Ken ni bo Eleanor, ne ba fulalezi puteho, mi bashemi ba bona ba itukiseza ku yo sebeleza kwa sibaka se si mwa butokwi bo butuna bwa bahasanyi ba Mubuso mi ba tiiseza mwa bukombwa  bwa nako kaufela. Ku eza cwalo ku ba tusize ku nga hande lika ni ku sa ciwa ki ndiulu.

Mu si felelwi ki sepo. Lilato “li na ni sepo mwa linto kaufela.” (1 Makorinte 13:7) Bo Ken bo lu sa zo bulela, ba talusa cwana ba li: “Bana ba luna ha ne ba tuhezi ku zamaya mwa niti, ne ni boni inge kuli ba shwile. Kono kaizel’a ka ha sa timezi na cinca mubonelo wo. Ni itebuha kuli banake ha ba si ka shwa lifu la kwa mubili mi Jehova u sa kwaluzi nzila ya kuli ba kutele ku yena.” Ka maniti, ze ezahezi li pakile kuli ba bañata ba ba fulalezi Jehova ba kutelanga ku yena hasamulaho.—Luka 15:11-24.

Mu tokolomohe ku ipa mulatu. Bashemi sihulu ba kana ba hanelela ku talima kwamulaho ni ku inyaza kuli ne ku si ke kwa ba cwalo kambe ne ba ezelize lika mu sili. Kono kwa Ezekiele 18:20 ku koñomekwa sisupo sa kuli Jehova ha fi bashemi mulatu wa mwan’a bona kono u fa mulatu yena sifosi ka sibili kakuli ki yena ya na ketile nzila ye si ka luka. Kwand’a litaba za buikalabelo bwa bashemi bwa ku hulisa bana ba bona hande, buka ya Liproverbia hape i lwezi likelezo ze ñata za kuli bana ba utwe bashemi ba bona ni ku mamela ze ba bulela. Ki niti, bana ba na ni buikalabelo bwa ku latelela tuto ye zwa mwa Bibele ye ba fiwa ki bashemi ba bona ba ba si ka petahala. Mwendi ne mu ezize fela hande ku likana ni mo ne ku konahalela ka nako yeo. Nihaikaba kuli mu ikutwa kuli ne mu ezize mafosisa a mañwi mi mulatu ne li wa mina, ha ku talusi kuli kipeto mafosisa a mina ao kona a tisize kuli mwanahenu a fulalele niti. Ibe cwañi kamba cwañi, ku kabangisa za kuli “mawe kambe ne ni ezize cwana kamba cwana” ha ku tusi se siñwi. Mu itute se siñwi ku zwelela kwa mafosisa a ne mu ezize, mu ikatulele ku s’a kutela, mi mu kupe swalelo ku Jehova ka tapelo. (Samu 103:8-14; Isaya 55:7) Mi cwale mu talimele za kwapili, isiñi ku tomenena za kwamulaho.

Mu be ni pilu-telele ku ba bañwi. Ba bañwi ba kana ba fumana t’ata ku ziba mwa ku mi tiiseza kamba ku mi omba-ombela sihulu haiba ba li ku ba ba be mwa muinelo o cwalo. Hape lika ze ba nga batu kuli za susueza ni ku omba-omba za shutana. Cwale haiba ba bañwi ba bulela lika ze mi filikanya, mu latelele kelezo ya muapositola Paulusi ye kwa Makolose 3:13, ye li: “Mu ezane hande, mi mutu h’a na ni s’a tongoka yo muñwi, mu swalelane.”

Mu amuhele tukiso ya Jehova ya kalimelo. Haiba wahabo mina u kalimezwi ki puteho, mu si libali kuli ku kalimelwa k’o ki tukiso ya Jehova mi ku lukiselizwe ku tusa batu kaufela, ku kopanyeleza cwalo ni yena sifosi. (Maheberu 12:11) Kacwalo mu tokolomohe moya wa ku hanelela ku fa mulatu maeluda ba ne ba talima taba kamba wa ku nyaza katulo ye ba file. Mu hupule kuli ku na ni bunde bo bu fumanwa haiba lika li ezwa ka tukiso ya Jehova, mi ku lwanisa litukiso za Jehova ku kona fela ku lu ekeleza kwa maziyezi.

Maisilaele ha se ba lukuluzwi mwa Egepita, Mushe ki yena ya na atulela sicaba. (Exoda 18:13-16) Lwa kona ku utwisisa libaka ba bañwi ha ne ba kana ba nyefisizwe ki likatulo za Mushe kakuli haiba katulo i yemela yo muñwi i ka bonahala ku lwanisa ya zeka ni yena. Mwendi ku nyaza likatulo za Mushe kona ko ne ku tisize kuli ba bañwi ba fetuhelange bueteleli bwa hae. Kono Jehova na etelela batu ba hae ka ku itusisa Mushe, mi na si ka fa Mushe koto, kono na otile bakwenuheli ni mabasi a bona a na yemela likezo za bona. (Numere 16:31-35) Tuto ye lu ituta fa ki ya kuli lu swanela ku yemela ni ku lumelelana ni likatulo ze ezwa ki bao Mulimu a file m’ata a ku etelela.

 Bo Delores ba hupula mo ne ba fumanezi t’ata ku ba ni mubonelo o munde muta mwan’a bona na kalimezwi ki puteho. Ba talusa cwana ba li: “Nto ye n’e ni tusize ne li ku kuta-kutela ku bala litaba ze bonisa bunde bwa litukiso za Jehova. Ne ni lukisize buka mo ne ni ñozi fela lisupo ze zwa mwa lingambolo ni lihatiso ze ne kona ku ni tusa ku itiisa ni ku zwelapili ku sebeleza Jehova.” Taba ye i lu tisa fa sisupo se siñwi.

Mu bulele maikuto a mina. Mu kana mwa ikutwa hande ha ne mu ka taluseza mulikani kamba balikani ba babeli bo mu sepile, ba ba utwisisa. Ha mu bata ba ku bulelela maikuto a mina, mu kete balikani ba ba ka mi tusa ku ba ni mubonelo o munde. Mu ka fumana tuso luli ha mu ka ‘sululela pilu ya mina’ ku Jehova ka tapelo. * (Samu 62:7, 8) Libaka ki lifi? Kakuli wa utwisisa luli mo mu ikutwela? Ka mutala, mwendi mu ikutwa kuli ne mu sa lukeli ku nyanda kwateñi cwalo. Hailif’o mina ha mu si ka fulalela Jehova. Mu taluseze Jehova maikuto a mina, mi mu mu kupe kuli a mi tuse ku nga lika hande kuli mu kusufaze kwa butuku bo mu utwa.—Samu 37:5.

Nako ha inze i ya mu ka fita fa ku ziba mwa ku ezeza. Kono mu si ke mwa tuhela ku eza misebezi ye tabisa Ndat’a mina wa kwa lihalimu, mi mu si ke mwa ikutwa kuli mu eza za mbango. (Magalata 6:9) Mu hupule kuli niha ne lu ka fulalela Jehova, matata na si ke a fela; na ka zwelapili ku ba teñi. Kono ha lu zwelapili ku sepahala ku yena, wa lu tusa ha lu kopana ni litiko. Kacwalo mu be ni buikolwiso bwa kuli Jehova wa utwisisa mo u inezi muinelo wa mina kaufela mi u ka zwelapili ku mi fa m’ata a tokwahala ka nako ye swanela.—2 Makorinte 4:7; Mafilipi 4:13; Maheberu 4:16.

[Litaluso za kwatasi]

[Mbokisi fa likepe 19]

Mwa ku Ezeza

◆ “Mu ikahele fa mutomo wa tumelo. . . . Mu tiiseze mwa lilato la Mulimu.”—Juda 20, 21.

◆ Mu si felelwi ki sepo.—1 Makorinte 13:7.

◆ Mu tokolomohe ku ipa mulatu. —Ezekiele 18:20.

◆ Mu be ni pilu-telele ku ba bañwi. —Makolose 3:13.

◆ Mu amuhele tukiso ya Jehova ya kalimelo.—Maheberu 12:11.

◆ Mu bulele maikuto a mina. —Samu 62:7, 8.

[Mbokisi/Siswaniso se si fa likepe 21]

Kana Ni Mina Mu Fulalezi Jehova?

Haiba ki cwalo, ibe kuli libaka ki lifi, silikani sa mina ni Jehova ni sepo ya mina ya ku pila ku ya ile li mwa silikwalikwani. Mwendi mu lela ku kutela ku Jehova. Puzo ki ya kuli, Kana mu sweli ku lwanela sikonkwani seo cwale? Kamba mwendi mu kashelize taba yeo kwapili ku fitela nako ye twi ki ye swanela? Mu hupule kuli liñungwa la Armagedoni li sweli la sutelela. Hape bupilo mwa lifasi le ki bwa makutelakaufi mi ha bu swalehi. Mi mane ha mu koni ku ziba nihaiba nji mu ka fita ku la kamuso. (Samu 102:3; Jakobo 4:13, 14) Munna yo muñwi ya na fumanwi kuli na kula butuku bo bu bulaya na ize: “Butuku bo, bu ni fumani inze ni sebeleza Jehova mwa bukombwa bwa nako kaufela ni si na bumaswe bo ni patile. Mi ni ikutwa ku lukuluha niha ni kula cwana.” Cwale mu nahane fela kuli kambe butuku bo ne bu mu shiukezi ka nako ya na sa kabangisa kuli, “Zazi le liñwi ni ka kutela ku Jehova!” Haiba mu fulalezi Jehova, ye kona nako ye mu swanela ku kutela ku yena.

[Maswaniso a fa likepe 18]

Ku tukufalelwa misebezi ya kwa moya kwa kona ku mi tusa ku ba ni mubonelo o munde