Mwa ku Atumelela “Ya Utwa Milapelo”

“Wena ya utwa milapelo, batu kaufela ba ka ta ku Wena.”—SAMU 65:2.

1. Batu ba shutana cwañi ni libupiwa ze ñwi za lifasi, mi seo si ba fa kolo mañi?

KWA libupiwa kaufela za lifasi ze ñata-ñata, ki batu fela ba ba kona ku lapela Mubupi. Ki batu fela ba ba utwanga linyolwa la ku lapela Mulimu ni ku ikutwa kuli ba swanela ku feza linyolwa leo. Seo si lu fa kolo ye nde hahulu ya ku itama silikani ni Ndat’a luna wa kwa lihalimu.

2. Sibi ne si tisize filikanyo mañi mwahal’a batu ni Mubupi wa bona?

² Mulimu na bupile batu kuli ba kone ku mu atumelanga. Bo Adama ni Eva ne ba si na sibi ha ne ba bupilwe. Kacwalo ne ba kona ku atumela Mulimu ka ku lukuluha inge mwa ezezanga mwana ku ndat’ahe. Kono bakeñisa sibi, tohonolo ye tuna yeo ne i ba bolomokile. Bo Adama ni Eva ne ba si ka utwa Mulimu, kacwalo ba latehelwa ki silikani sa bona se sinde ni yena. (Genese 3:8-13, 17-24) Kana seo si talusa kuli bana ba Adama ba ba si ka petahala ha ba sa kona ku ambola ni Mulimu? Batili, Jehova u sa ba lumeleza ku mu atumela kono u tokwa kuli ba kwanise lipimo ze ñwi. Ki lipimo lifi ona zeo?

Z’a Tokwa Mulimu Ha Lu Bata ku Mu Atumela

3. Batu ba ba si ka petahala ba swanela ku atumela cwañi Mulimu, mi ki mutala mañi o bonisa cwalo?

³ Ze ne ezahezi kwa bana ba Adama ba babeli li lu tusa ku ziba za tokwa Mulimu ku mutu ya si ka petahala ya bata ku mu atumela. Bo Kaine ni Abele mwa sibeli sa bona ne ba likile ku atumela Mulimu ka ku mu ezeza matabelo. Sitabelo sa Abele ne si amuhezwi, kono sa Kaine ne si si ka amuhelwa. (Genese 4:3-5) Ki kabakalañi ha ne ku li cwalo? Maheberu 11:4 i li: “Ka tumelo, Abele u tahisize fapil’a Mulimu sitabelo se si fita sa Kaine; mi kabakala tumelo, u pakilwe kuli ki ya lukile.” Seo si bonisa fo ku sweu kuli lu tokwa ku ba ni tumelo ha lu atumela Mulimu. Nto ye ñwi ye tokwahala i iputezi mwa manzwi a na bulezi Jehova ku Kaine kuli: “Ha u eza hande, kana u si ke wa lumelelwa?” Kaniti Kaine na kabe a amuhezwi ki Mulimu kambe na likile ku eza hande. Kono Kaine na hanile kelezo ya Mulimu, a bulaya Abele, mi a ba muyambaeli. (Genese 4:7-12) Kacwalo isali kwa makalelo k’o, ne ku koñomekilwe kuli mutu ya atumela Mulimu u tokwa ku ba ni tumelo ni ku eza ze nde.

4. Lu swanela ku lemuhañi ha lu atumela Mulimu?

⁴ Ha lu atumela Mulimu lu swanela ku lemuha kuli lu baezalibi. Batu kaufela ki baezalibi, mi sibi si palelwisa batu ku fita ku Mulimu. Mupolofita Jeremia na ñozi manzwi a latelela ka za Isilaele: “Lu ezize sibi . . . Wa ikwahela ka lilu, kuli tapelo ya luna i si ke ya y’o fita ku Wena.” (Malilo 3:42, 44) Nihakulicwalo, ku zwa fela kwa simuluho, Mulimu u bonisize kuli wa tabela ku utwa litapelo za batu ba ba mu atumela ka tumelo ni ka pilu ye nde, ili ba ba mamela milao ya hae. (Samu 119:145) Ba bañwi ba ku bona batu bao ne li bomañi, mi lu kona ku itutañi kwa litapelo za bona?

5, 6. Mutala wa Abrahama u lu lutañi ka mwa ku atumela Mulimu?

⁵ Abrahama ki yo muñwi wa bona batu bao. Mulimu na utwile litapelo za hae, kona  libaka ha na mu bizize kuli “mulatiwa wa ka.” (Isaya 41:8) Lu kona ku itutañi ku Abrahama ka mwa na atumezi Jehova? Ñulukundi ya sepahala y’o na lapezi ku Jehova ka za mucasanda, kuli: “Mulena [Muñ’a] Bupilo, u ka ni fañi? Haili fo ni ikela ni si na mwana.” (Genese 15:2, 3; 17:18) Nako ye ñwi hape, na fitisize pilaelo ya hae ku Mulimu ka za haiba ku na ni batu ba ne ba ka puluswa Mulimu ha na ka atula batu ba ba maswe mwa Sodoma ni Gomora. (Genese 18:23-33) Abrahama hape na lapelezi batu ba bañwi. (Genese 20:7, 17) Mi Abrahama fokuñwi na atumelanga Mulimu ka ku mu fa sitabelo sina mwa na ezelize Abele.—Genese 22:9-14.

⁶ Ka linako zeo kaufela, Abrahama na ambolanga ni Jehova ka ku lukuluha. Kono niha na lukuluhile cwalo, na li mutu ya ikokobeza bakeñisa ku lemuha mayemo a na na ni fapil’a Mubupi wa hae. Mu lemuhe manzwi a hae a bonisa likute a ñozwi kwa Genese 18:27 a li: “Bona, cwale ni tiisize pilu ku bulelisana ni Mulena, niha ni li liluli ni mulola fela.” Wo ki mutala o munde luli o lu swanela ku likanyisa!

7. Ki litaba mañi ze ne ba lapezi liñulukundi ku Jehova?

⁷ Liñulukundi ne ba lapezi ka za litaba ze fitana-fitana, mi ne ba utwilwe ki Jehova. Jakobo na lapezi tapelo ya buitamo. A mano kupa tuso ku Mulimu, na itamile kuli: “Ni ka ku tubulela nto i li ñwi ku ze lishumi za lika kamukana z’o ka ni fa.” (Genese 28:20-22) Nako ye ñwi, pili a si ka kopana kale ni muhulwan’a hae, Jakobo na kupile Jehova ku mu sileleza ka ku bulela kuli: “Mawe, u ni lamulele mwa lizoho la muhulwan’a ka, mwa lizoho la Isau, kakuli na mu saba.” (Genese 32:9-12) Ñulukundi Jobo na lapelezi lubasi lwa hae ku Jehova ni ku ba ezeza matabelo. Muta balikani ba Jobo ne ba fosize mwa lipulelo, Jobo na ba lapelezi, mi “[Muñ a] Bupilo a amuhela tapelo ya Jobo.” (Jobo 1:5; 42:7-9) Litaba ze li lu tusa ku ziba lika ze lu kona ku bulela mwa litapelo za luna ku Jehova. Hape li lu tusa ku lemuha kuli Jehova wa tabela ku utwa litapelo za batu ba ba mu atumela ka nzila ye swanela.

Mwatas’a Mulao wa Bulikani

8. Mwatas’a Mulao wa bulikani, litaba ze ne ama sicaba ne li fitiswa cwañi ku Jehova?

⁸ Hasamulaho wa ku lukulula sicaba sa Isilaele mwa Egepita, Jehova na si file Mulao wa bulikani. Mulao ne u bonisize kuli Mulimu na kona ku atumelwa ka tuso ya baprisita ba ne ba ketilwe. Malivi ba bañwi ne ba filwe musebezi wa ku sebeza sina maprisita ba batu. Ha ne ku zuhile litaba ze ne ama naha,  mutu ya na ketilwe kuli a yemele sicaba ili yo na kana a ba mulena kamba mupololfita na fitisa taba yeo ku Mulimu ka tapelo. (1 Samuele 8:21, 22; 14:36-41; Jeremia 42:1-3) Ka mutala, fa lizazi la kakulo ya tempele, Mulena Salumoni na lapezi ku Jehova ka ku zwelela kwa pilu. Mi Jehova na bonisize kuli na utwile tapelo ya Salumoni ka ku taza tempele ka kanya ya hae ni ku bulela kuli: “Lizebe za ka li ka teeleza tapelo ye ezwa mwa sibaka se.”—2 Makolonika 6:12–7:3, 15.

9. Jehova na tokwa kuli batu ba atumele cwañi kwa sibaka se si kenile?

⁹ Mulao wa na file Jehova ku Isilaele ne u bonisize mo ne ba kona ku mu atumelela kwa sibaka se si kenile. Ne ba kona ku mu atumela cwañi? Kwand’a ku fa matabelo a lifolofolo, muprisita yo mutuna na swanela ku cisa insense zazi ni zazi kakusasana ni manzibwana fapil’a Jehova. Hasamulaho, baprisita ba banyinyani ni bona ne ba ezanga musebezi wo, kono ne ba sa ezangi cwalo fa Lizazi la Swalelo ya Libi. Baprisita ha ne ba si ke ba bonisa likute ka nzila ye cwalo, Jehova na ka hana sebelezo ya bona.—Exoda 30:7, 8; 2 Makolonika 13:11.

10, 11. Ki bupaki bufi bo bu bonisa kuli Jehova na utwile litapelo za batu?

¹⁰ Kana ki kuli ki bayemeli ba batu fela ba ne ba kona ku lapela ku Mulimu mwa miteñi ya Isilaele ya ikale? Batili, Mañolo a bonisa kuli Jehova na tabela ku utwa litapelo za batu za ka butu. Mwa tapelo ya Salumoni ya ku kakula tempele, na kupile Jehova kuli: “Tapelo ni kupo y’a ka ku tahiseza mutu kaufela, nihaili sicaba kamukana sa Isilaele, . . . mi a otololela mazoho a hae kwa neku la Ndu ye, u utwe, u li mwa lihalimu.” (2 Makolonika 6:29, 30) Taba ya Luka i lu bonisa kuli Zakaria, ndat’ahe Joani Mukolobezi, ha na cisa insense mwa sibaka se si kenile, silundwamanje sa balapeli ba Jehova besi maprisita ne ba “lapela kwande.” Ku bonahala kuli batu ne ba na ni mukwa wa ku lapelanga fande a sibaka se si kenile ka nako ye ne i fiwa insense ku Jehova fa aletare ya gauda.—Luka 1:8-10.

¹¹ Kacwalo, Jehova ha na atumelwa ka nzila ye swanela, na tabela ku utwa litapelo za batu ba ne ba yemela sicaba kaufela, ni za batu ba ne ba mu atumela ka butu. Luna kacenu ha lu si ka laelwa ku buluka Mulao wa bulikani. Nihakulicwalo, lwa kona ku ituta lituto za butokwa kwa Maisilaele ba ikale ka za mo ne ba atumelelanga Mulimu.

Mwatas’a Tukiso ya Sikreste

12. Ki tukiso ifi yeo Bakreste ba kona ku atumela Jehova ka yona?

¹² Cwale lu pila mwatas’a tukiso ya Sikreste. Ha ku sa na tempele ko ba kona ku liba baprisita kuli ite ba yo lapelela batu ba Mulimu kaufela kamba ko lu kona ku ya ha lu bata ku lapela ku Mulimu. Nihakulicwalo, Jehova u lukisize nzila ye lu kona ku mu atumela ka yona. Ki nzila ifi ona yeo? Ka 29 C.E. Kreste ha toziwa ni ku ketiwa sina Muprisita yo Mutuna, tempele ya kwa moya ne i kalile ku beleka. * Tempele ya kwa moya yeo ne li  yona tukiso ye nca yeo batu ne ba kona ku lapela Jehova ka yona ili ye tomile fa sitabelo sa tiululo sa Jesu Kreste.—Maheberu 9:11, 12.

13. Tempele ya mwa Jerusalema ni tempele ya kwa moya li swana cwañi ha ku taha kwa tapelo?

¹³ Likalulo ze ñata za tempele ya mwa Jerusalema ne li swaniseza hande likalulo za mwa tempele ya kwa moya, ku kopanyeleza cwalo ni litukiso za tapelo. (Maheberu 9:1-10) Ka mutala, kiñi se ne i yemela insense ye ne fiwa fa aletare ya insense kakusasana ni manzibwana mwa sibaka se si Kenile sa tempele? Buka ya Sinulo i bonisa kuli insense i yemela “milapelo ya balumeli.” (Sinulo 5:8; 8:3, 4) Ka ketelelo ya moya wa Mulimu, Davida na ñozi kuli: “Tapelo ya ka i amuhelwe ki Wena sina insense.” (Samu 141:2) Kacwalo, mwatas’a tukiso ya Sikreste, insense ye munati ka swanelo i yemela litapelo ze amuheleha ni tumbo ye fiwa ku Jehova.—1 Matesalonika 3:10.

14, 15. Ku konwa ku bulelwañi ka za mwa atumelwa Jehova ki (a) Bakreste ba ba tozizwe? (b) ba “lingu ze ñwi”?

¹⁴ Ki bomañi ba ba kona ku atumela Mulimu kwa tempele ya kwa moya yeo? Mwa tempele ya fa lifasi, baprisita ni Malivi ne ba filwe tohonolo ya ku sebeleza mwa lapa la mwahali, kono ki baprisita fela ba ne ba lumelelizwe ku kena mwa sibaka se si Kenile. Bakreste ba ba tozizwe ba ba na ni sepo ya ku ya kwa lihalimu ba ikola muinelo o ipitezi wa kwa moya o yemelwa ki lapa la mwahali ni sibaka se si Kenile, ili o ba konisa ku lapela ni ku lumbeka Mulimu.

¹⁵ Kono ba “lingu ze ñwi” bo, bona ba ba na ni sepo ya ku pila fa lifasi-mubu? (Joani 10:16) Mupolofita Isaya na polofitile kuli macaba a mañata a ka ta ku to lapela Jehova “kwa mazazi a kwapili.” (Isaya 2:2, 3) Hape na ñozi kuli “bana ba macaba” ba ka kumalela Jehova. Kuli a bonise kuli na ba amuhela, Mulimu na ize: ‘Ni ka ba . . . tabisa mwa Ndu ya ka ya tapelo.’ (Isaya 56:6, 7) Sinulo 7:9-15 i fa litaba ze ñwi ha i bulela za “buñata bo butuna bwa batu” ba ba zwa “mwa macaba kaufela” ba ba lapela Mulimu ni ku mu sebeleza “musihali ni busihu” mwa lapa la kwande la tempele ya kwa moya. Kwa tabisa luli ku ziba kuli batanga ba Mulimu kaufela kacenu ba kona ku atumela Mulimu ka ku lukuluha ni ku sepa kuli wa ba utwa!

Ki Litapelo Ze Cwañi Ze Utwiwa?

16. Lu kona ku itutañi ka za tapelo kwa Bakreste ba kwa makalelo?

¹⁶ Bakreste ba kwa makalelo ne li batu ba ne ba lapelanga hahulu. Ki litaba mañi ze ne ba bulelanga mwa litapelo za bona? Maeluda ba Sikreste ne ba kupile ketelelo ya Mulimu ha ne ba keta banna ba ne ba ka fiwa buikalabelo mwa kopano. (Likezo 1:24, 25; 6:5, 6) Epafrasi na lapelezi balumeli ka yena. (Makolose 4:12) Ba mwa puteho ya mwa Jerusalema ne ba lapelezi Pitrosi ha na lengilwe mwa tolongo. (Likezo 12:5) Bakreste ba kwa makalelo ne ba kupile Mulimu ku ba tusa ku ba ni bundume ha ne ba lwaniswa, ne ba bulezi kuli: “Mulena, bona mifumbelo ya bona; mi  u fe batanga ba hao mata a ku bulela Linzwi la hao ba sa sabi.” (Likezo 4:23-30) Mulutiwa Jakobo na susuelize Bakreste ku lapela ku Mulimu ni ku kupa butali ha ne ba talimana ni litiko. (Jakobo 1:5) Kana mwa lapelanga ka za litaba ze cwalo ku Jehova?

17. Ki litapelo za bomañi za utwa Jehova?

¹⁷ Mulimu ha utwangi litapelo kaufela. Kono cwale lu kona ku lapela cwañi kuli litapelo za luna li utwiwe? Basepahali ba mwa linako za ikale ba ne ba utwilwe ki Mulimu ne ba mu atumezi ha buniti ni ka pilu ye nde. Ne ba na ni tumelo mi ne ba bonisize cwalo ka ku eza misebezi ye minde. Lwa kona ku ba ni buikolwiso bwa kuli Jehova u ka utwa litapelo za ba ba mu atumela ka nzila ye swana kacenu.

18. Bakreste ba tokwa ku ezañi kuli litapelo za bona li utwiwe?

¹⁸ Ku na ni nto ye ñwi hape ye tokwahala. Muapositola Paulusi na bulezi cwana ka za taba yeo: “Ki ka yena ha lu kona ku sutelela . . . ku Ndate, ka Moya u li muñwi.” Ki mañi ya na talusa Paulusi ha na ñozi kuli lwa kona ku sutelela ku Ndate “ka yena”? Ki Jesu Kreste. (Maefese 2:13, 18) Ki niti, lwa kona ku atumela Ndate ka ku lukuluha ka Jesu fela.—Joani 14:6; 15:16; 16:23, 24.

19. (a) Insense ye ne i fiwa ku Jehova mwa Isilaele ne i mu filikanya ha ne ba ezañi? (b) Lu kona ku eza cwañi kuli litapelo za luna li be sina insense ye munati ku Jehova?

¹⁹ Sina ha se ku bulezwi, insense ye ne fiwanga ki baprisita ba Maisilaele i talusa litapelo ze amuheleha za batanga ba Mulimu ba ba sepahala. Kono fokuñwi insense ye ne ba fanga Maisilaele ne i nyenyisanga Jehova. Ne ku ezahezi cwalo muta Maisilaele ne ba cisa insense mwa tempele ni ku kubamela maswaniso ka nako ye swana. (Ezekiele 8:10, 11) Ku cwalo ni kacenu, litapelo za batu ba ba ipapata kuli ba sebeleza Jehova kono ba ba eza lika ze lwanisana ni milao ya hae li swana sina munko o nyenyisa. (Liproverbia 15:8) Kacwalo he, haike lu zweleñipili ku ba ba ba kenile mwa bupilo bwa luna kaufela kuli litapelo za luna li be sina insense ye munati ku Mulimu. Jehova u tabela litapelo za ba ba latelela linzila za hae ze nde. (Joani 9:31) Kono ku na ni lipuzo ze sa tokwa ku alabiwa. Lu swanela ku lapela cwañi? Lu kona ku lapela ka zañi? Mi Mulimu u alabanga cwañi litapelo za luna? Taba ya luna ye tatama i ka alaba lipuzo ze ni ze ñwi.

[Litaluso za kwatasi]

Kana Mwa Kona ku Talusa?

• Batu ba ba si ka petahala ba kona ku atumela cwañi Mulimu ka ku amuheleha?

• Lu kona ku likanyisa cwañi mutala wa liñulukundi mwa litapelo za luna?

• Lu itutañi kwa litapelo za Bakreste ba kwa makalelo?

• Lu tokwa ku ezañi kuli litapelo za luna li be sina insense ye munati ku Mulimu?

[Lipuzo za Tuto]

[Siswaniso se si fa likepe 23]

Ki kabakalañi Mulimu ha na amuhezi sitabelo sa Abele ni ku hana sa Kaine?

[Siswaniso se si fa likepe 24]

Ni “liluli ni mulola fela”

[Siswaniso se si fa likepe 25]

“Ni ka ku tubulela nto i li ñwi ku ze lishumi za lika kamukana z’o ka ni fa”

[Siswaniso se si fa likepe 26]

Kana litapelo za mina li swana sina insense ye munati ye fiwa ku Jehova?