“Ki Swanelo Kuli Lu Utwe Mulimu Ku Fita Batu”

‘Ha Lu Koni ku Sa Bulela za Jesu’

NE LI ka silimo sa 33 C.E., mi ne li mwa kuta ye tuna ye kutekeha ya Majuda mwa Jerusalema. Se ne si ezahala kikuli, kuta ye tuna ya Sanhedrini ne i zekisa balateleli ba Jesu Kreste ba 12. Ka libaka mañi? Ne li ka libaka la kuli ne ba kutaza za Jesu. Lo ne li lona lwa bubeli ku muapositola Pitrosi ni muapositola Joani ku zekiswa ki kuta ye. Kono kwa baapositola ba bañwi ne li lona lwa pili.

Muprisita yo mutuna a taluseza baapositola ba 12 za katulo ye ne filwe ki kuta fa muzeko wa pili. Ha ne ba laezwi kuli ba lisele ku kutaza za Jesu fa muzeko wa pili, muapositola Pitrosi ni muapositola Joani ne ba alabile kuli: “A ku atule mina, kana ki taba ye lukile fapil’a Mulimu, kuli lu utwe mina ku fita Mulimu? Kakuli luna ha lu koni ku sa bulela ze lu boni, ni ze lu utwile.” Ha se ba lapezi kuli ba tiiswe, balutiwa ba Jesu ba zwelapili ku shaela taba ye nde.—Likezo 4:18-31.

Ka ku lemuha kuli mifumbo ya hae ya pili ne i si ka peta se siñwi, cwale fa muzeko wo wa bubeli muprisita yo mutuna a bulela kuli: “Kikuli ha lu si ka mi laela hahulu kuli mu si ke mwa lutanga ka Libizo leo? Kanti mu tazize Jerusalema tuto ya mina, mi mu lata ku tisa mali a mutu yo fahalimw’a luna.”—Likezo 5:28.

Tundamo Ye Sa Kuyuki

Ka bundume, Pitrosi ni baapositola ba bañwi ba alaba, ba li: “Ki swanelo kuli lu utwe Mulimu ku fita batu.” (Likezo 5:29) Mi kaniti haiba milao ya batu i lwanisana ni ya Mulimu, lu lukela ku utwa Jehova ku fita ku utwa batu. *

Manzwi a baapositola ao a na bonisa busepahali bwa bona ku Mulimu, na swanela ku kolwisa hahulu manduna ba Sanhedrini. Ha ne ba ka buziwa za ku utwa Mulimu, baeteleli ba Majuda bao ne ba swanela ku alaba ka ku lumelelana kuli: “Mu utwe Mulimu.” Esi mane ni bona ne ba lumela kuli Mulimu ki yena Muambakani-ya-Pahami wa pupo kaufela.

Ku bonahala kuli ka ku yemela baapositola kaufela, Pitrosi u bonisa kuli ka ku peta bukombwa bwa bona, ba utwa Mulimu ku fita batu. Kacwalo u bonisa kuli tamilikezo ya kuli baapositola ne ba sa utwi mulao nesi ya niti. Ku zwelela ku ze ne ezahezi kwamulaho mwa sicaba sa bona, manduna bao ba Sanhedrini ne ba ziba kuli ka linako ze ñwi ne ku lukile luli ku utwa Mulimu ku fita batu. Bapepisi ba babeli ba mwa Egepita ha ne ba pilisize limbututu za bashimani za basali ba Maheberu, ne ba utwile Mulimu ku fita Faro. (Exoda 1:15-17) Mulena Ezekiasi ha na hapelelizwe ku koza, yena na utwile Jehova ku fita Mulena Senakeribi. (2 Malena 19:14-37) Mañolo a Siheberu, a ne ba izibela hande manduna ba Sanhedrini, a koñomeka kuli Jehova u tokwa kuli batu ba hae ba mu utwe.—1 Samuele 15:22, 23.

Ku Utwa Ku Ba Fumanisa Mupuzo

Ku bonahala kuli nduna a li muñwi mwa kuta ye tuna yeo na fitilwe kwa pilu ki manzwi a li: “Ki swanelo kuli lu utwe Mulimu ku fita batu.” Gamaliele, muatuli wa mwa Sanhedrini ya na lumbwa hahulu ki sicaba, na konile ku susueza kuta kuli i teeleze kwa kelezo ya hae ye butali ya na fezi mwa puhisano ya kwa mukunda.  Ka ku punda mitala ya kwamulaho, Gamaliele a bonisa kuli ku lwanisa musebezi wa baapositola ne li kutokwa butali. A feza puhisano ya hae ni manduna ba kuta ka ku bulela kuli: “Mu kauhane ni batu bao, mi mu ba tuhele; . . . Mi mu tokomele, mu ka swana mu fumanwa kuli mu lwanisize Mulimu.”—Likezo 5:34-39.

Manzwi a utwahala a Gamaliele na kolwisize kuta ye tuna kuli i lukulule baapositola. Nihaike ne ba shapakilwe, baapositola ne ba si ka sabiswa ki ze ne ba ezahalezi. Kono taba ya mwa Bibele i li: “Ha ba si ka lisela, ka mazazi kaufela, ku luta batu, ni ku bulela mwa Tempele ni mwa mandu kuli Jesu ki Kreste.”—Likezo 5:42.

Kaniti baapositola ne ba fuyauzwi ka ku zwelapili ku nga Mulimu ku ba yena ya m’ata ka ku fitisisa. Ni kacenu Bakreste ba niti ba na ni moya o swana. Lipaki za Jehova ba zwelapili ku sepa Jehova sina yena Mubusi wa bona ya pahami ka ku fitisisa. Ha ba laelwa ku eza lika ze lwanisana ni litaelo za Mulimu, Lipaki za Jehova ba alaba sina mo ne ba alabezi baapositola kuli: “Ki swanelo kuli lu utwe Mulimu ku fita batu.”

[Litaluso za kwatasi]

[Mbokisi/Maswaniso a fa likepe 9]

KANA MU KILE MWA NAHANA ZA TEÑI?

Luka muñoli wa Evangeli na zibile cwañi litaba za na bulezi Gamaliele mwa puhisano ya kwa mukunda ya Sanhedrini? Mwendi ki Mulimu ya na patululezi Luka manzwi a Gamaliele. Hape i kona ku ba kuli mwendi Paulusi (ya kile a ba yo muñwi wa baituti ba Gamaliele) ki yena ya na taluselize Luka za puhisano ya Gamaliele. Kamba mwendi Luka na buzize nduna ya silikani wa mwa kuta ye tuna.