“Hasi Mo Ni Latela Mulao wa Hao!”

SAMU 119 ki pina ye talusa mwa na ikutwezi muñoli wa yona ka za lushango, kamba linzwi la Mulimu le li tahile ka moya. Walisamu n’a opezi kuli: ‘Ni ipulukezi Linzwi la hao mwa pilu ya ka.’ ‘Ni ka tabela litaelo za hao.’ ‘Pilu ya ka i lobehile, kabakala ku shukelwa Likatulo za hao ka nako ni nako.’ ‘Likelezo za hao, zona, ki tabo ya ka.’ ‘Ni shukezwi litemuso za hao.’ ‘Ni ka tabela milao ya hao, ki yona ye ni lata.’ ‘Ni ka nahana litaelo za hao.’ ‘Hasi mo ni latela mulao wa hao! Na u nahana musihali kaufela.’—Samu 119:11, 16, 20, 24, 40, 47, 48, 97.

Walisamu n’a itebuha hahulu luli linzwi la Mulimu le li patuluzwi! Kana ni mina mu ikutwanga cwalo ka za lushango lo lu mwa Linzwi la Mulimu, yona Bibele? Kana ni mina mu ka bata ku tabela hahulu cwalo lona lushango lo? Haiba mwa tabela lushango lwa Linzwi la Mulimu, pili mu lukela ku hulisa takazo ya ku no balanga Bibele kamita, nihaiba kazazi. Jesu Kreste n’a ize: “Mutu h’a na ku pila buhobe fela, kono u ka pila ni ona manzwi kaufela a’ zwa mwa mulomo wa Mulimu.” (Mateu 4:4) Sa bubeli, mu swanela ku yeyanga ze mu bala. Ku nahanisisa za niti ya Mulimu, za tulemeno twa hae, za tato ya hae, ni za mulelo wa hae ku ka mi susueza kuli mu itebuhe hahulu Bibele. (Samu 143:5) Mi sa butokwa ni ku fita, mu itusise kelezo ya Bibele mwa bupilo bwa mina bwa ka zazi ni zazi.—Luka 11:28; Joani 13:17.

Mu ka tusiwa cwañi ki ku tabela ku ziba ze i luta Bibele? Samu 119:2 i li: “Ba filwe mbuyoti ba ba tokomela likelezo za [Mulimu].” Likelezo ze fumaneha mwa Bibele li ka mi tusa ku tiyela hande matata a bupilo. (Samu 1:1-3) Mu ka fumana butali, kutwisiso, ni zibo, ili ze ka mi tusa ku ‘fapusa mahutu a mina mwa nzila ye maswe.’ (Samu 119:98-101) Ku ziba niti ka za Mulimu ni za mulelo wa hae ka za lifasi ku ka mi pilisa bupilo bo bunde hahulu mi ku ka tiisa sepo ya mina ya nako ya kwapili.—Isaya 45:18; Joani 17:3; Sinulo 21:3, 4.

Lipaki za Jehova ba tabela hahulu ku tusa ba bañwi kuli ba fite fa ku utwisisa hande Bibele ni ku ba tusa kuli ba be ni takazo ya ku ituta lushango lo lu mwa Bibele. Lwa mi mema ka tabo kuli mu amuhele memo ye kwatasi.