Lipuzo Ze Zwa kwa Babali

Puteho i tokwa ku ezañi haiba Mukreste ya na matisa mota a ba mwa kozi ya fa mukwakwa ye tahisa kuli batu ba bañwi ba shwe?

Puteho i tokwa ku nyakisisa haiba mumatisi wa mota yo u na ni mulatu wa mali, bakeñisa kuli puteho ha i lukeli ku ngiwa ki batu kuli i na ni mulatu wa ku sulula mali. (Deuteronoma 21:1-9; 22:8) Mumatisi wa mota ye bile fa kozi ya fa mukwakwa wa kona ku fiwa mulatu wa ku sulula mali haiba na sa matisi mota ka tokomelo kamba haiba na tulile ka bomu o muñwi wa milao ya fa mukwakwa ya Sesare. (Mareka 12:14) Kono ku na ni litaba ze ñwi ze tokwa ku nyakisiswa.

Mubulai ya na matelanga ku o muñwi wa minzi ya masabelo mwa Isilaele n’a zekiswanga fapil’a kuta ye ne mu atulanga. Ha ne ku fumanwanga kuli pulao ne si ya ka bomu, mubulai yo na lumelezwanga ku zwelapili ku ina mwa munzi, kuli a si ke a bulaiwa ki mulomboti ya likanyisa mali. (Numere 35:6-25) Kacwalo haiba Mukreste u tahisize kuli mutu yo muñwi a shwe fa kozi ya fa mukwakwa, maeluda ba swanela ku batisisa litaba ilikuli ba zibe haiba ku bile ni mulatu wa ku sulula mali. Katulo ya muso kamba katulo ya kuta haki yona fela ye bonisa muhato o swanela ku ngiwa ki puteho.

Ka mutala, kuta i kona ku atula kuli mutu u bile ni mulatu wa ku tula mulao wa fa mukwakwa, kono maeluda ba ba batisisa taba yeo ba kana ba lemuha kuli mumatisi wa mota ha na mulatu wa ku sulula mali bakeñisa kuli ne ku si na mwa na ka ezeza kuli a kone ku tibela kozi yeo ye tahisize lifu. Kono fokuñwi kuta niha i ka atula kuli mumatisi ha na mulatu, maeluda ba kona ku lemuha kuli mutu yo luli u na ni mulatu wa ku sulula mali.

Katulo ya maeluda ba ba batisisa taba yeo i swanela ku toma fa Mañolo ni fa litaba ze fumanwi ku ba za niti, inge cwalo ku itumelela kwa mumatisi wa mota kuli u fosize kamba bupaki bo fu filwe ki lipaki ze sepahala ze peli kamba ze talu. (Deuteronoma 17:6; Mateu 18:15, 16) Haiba maeluda ba fumana kuli mutu yo u na ni mulatu wa ku sulula mali, ba swanela ku toma katengo ka buatuli. Haiba katengo ka lemuha kuli sifosi u bonisa ku baka, ba ka mu fa kelezo ye swanela ya mwa Mañolo mi u ka tuheliswa ku ba ni buikalabelo mwa puteho. Ha sa na ku sebeza sina eluda kamba mutang’a bukombwa. Mi u ka ba fa likaniso ze ñwi. Mi hape u ka ikalabela ku Mulimu bakeñisa kuli na si ka ba ni tokomelo, mi na ezize ka bomu kuli mane u tahisize kozi ni lifu.—Magalata 6:5, 7.

Ka mutala, haiba moya ne u fuka hahulu kamba ne ku na ni milupi ka nako ye ne i ezahezi kozi, mumatisi na swanela ku matisa ka tokomelo ye tuna. Haiba na ozela, na swanela ku yema ni ku pumula hanyinyani ku fitela buloko ha ne bu ka mu fela, kamba na swanela ku fa mutu yo muñwi kuli a matise mota.

Ku cwañi haiba mumatisi wa mota na matisa ka lubilo lo lu tulile tikanyo? Haiba Mukreste a matisa hahulu mota ka ku fitelela sipimo sa lubilo se si tomilwe fa mukwakwa wo, fo ku talusa kuli u palezwi ku kutiseza “Sesare ze li za Sesare.” Mi hape ku bonisa kuli ha ngi bupilo ka butuna, kakuli ku matisa mota ka lubilo lo lu tuna ku kona ku tisa kozi ya lifu. (Mateu 22:21) Mu nyakisise taba ye ñwi hape. Haiba eluda a sa tokomeli milao ya Sesare ya fa mukwakwa kamba haiba a palelwa ku i mamela ka bomu, ki mutala mañi wa tomela mutapi?—1 Pitrosi 5:3.

Bakreste ha ba lukeli ku ba mwa muinelo o ka ba tokwa ku matisa mota ka lubilo lo lu tulile tikanyo ka mulelo wa ku bata kuli Bakreste ba bañwi ba yo fita kwa sibaka se siñwi ka bunako. Kono hañata mutu u swanela ku kalanga musipili ka ku itahanela kamba ku cinca tomahanyo ilikuli a be ni nako ye ñata kuli a kone ku matisa ka ku iketa. Haiba Mukreste a eza cwalo, ha na ku bata ku matisa ka lubilo lo lu tulile tikanyo, kono u ka kona ku matisa mota ka lubilo lo lu lumelelana ni milao ya fa mukwakwa ya “ba ba beilwe fa bulena.” (Maroma 13:1, 5) Ku eza cwalo ku ka tusa mumatisi kuli a tibele likozi za fa mukwakwa ze kona ku mu kenya mwa mulatu wa ku sulula mali. Mi hape ku eza cwalo ku ka mu bisa mutala o munde mi u ka zwelapili ku ba ni lizwalo le linde.—1 Pitrosi 3:16.