Kana Likuka za Bibele za Imeza?

MUTANGANA yo muñwi ya pila kwa Finland na ize: “Ha ne ni sa li mwanana ne ni si ka lutiwa likuka za Bibele. Mane ha ku na ni yo mukana ya na amanga ku za Mulimu.” Ki ba bañata ba ba hulisizwe cwalo kacenu. Buñata bwa bona, sihulu-hulu ba banca, ba nga kuli Bibele ki ya kale hahulu mi kelezo ya yona ya imeza. Ba ba tabela ku eza ze i bulela ba ngiwa kuli ba nyandile mi ha ba ikoli bupilo bakeñisa ku latelela likaniso ni milao. Kacwalo ba bañata ba nga kuli ku bata kelezo ku sili ku mbubo ku fita ku bala Bibele.

Mubonelo o cwalo ka za Bibele sihulu u tisizwe ki likeleke za Krestendomu bakeñisa kuli ne li nyandisize batu ka nako ye telele. Ka mutala, ka nako ye ba biza licaziba ba bañwi ba litaba za kale kuli Nako ya Lififi, Keleke ya Katolika ne i kotopa ibato ba likalulo kaufela za bupilo bwa batu mwa Yurope. Mañi ni mañi ya na hanyeza keleke na nyandiswa mane nihaiba ku bulaiwa. Likeleke za Protestanti ze ne tomilwe hasamulaho ni zona ne li palelisizwe batu ku ba ni tukuluho. Kacenu le ba ba ziba za likeleke za Protestanti ha ba nahanangi fela za balateleli ba zona kono hape ba hupulanga ni mo ne li nyandisezanga batu. Kabakaleo ba bañwi ba bile ni mibonelo ye fosahalile ya kuli Bibele ki buka ye maswe.

Mwa lilimonyana ze felile, likeleke li palezwi ku kukueza hahulu bupilo bwa batu mwa linaha ze ñwi. Ba bañata ba hanile lituto za bulapeli mi se ba lumela kuli batu ba na ni tukelo ya ku iketela se sinde ni se si maswe. Kiñi ze zwile mwateñi? Ahti Laitinen caziba wa za likezo za bubangoki ni za swalisano ye nde ya batu u li: “Batu ba bañwi ha ba sa latelela hahulu mulao mi ha ba sa ziba mwa ku taluhanyeza lika ze nde ku ze maswe.” Kwa komokisa kuli baeteleli ba keleke ni bona kona mo se ba ngela lika cwalo. Bishopu ya tumile wa keleke ya Lutheran na ize: “Ni hanelelanga ku hanyeza taba ya kuli mutu wa kona ku ziba mwa ku ezeza ze lukile ka ku bala Bibele kamba ka ku teeleza ku mueteleli wa keleke.”

Kana ku Ba ni Tukuluho ye Ñata kwa Tabisa?

Ba banca sihulu ba tabela ku ba ni tukuluho ye ñata. Ki ba sikai ku bona ba ba tabela ku kotopiwa kamba ku latelela milao ye bonisa ze swanelwa ku eziwa ni ze sa swaneli. Kono kana ku lukile kuli mañi ni mañi a eze lika mwa latela? Ha lu nyakisiseñi mutala wo o ka lu tusa ku alaba puzo ye. Mu nahane tolopo ye si na milao ya fa mukwakwa. Teñi mo ndilaiba ha tokwiwi ku ba ni liñolo le li mu fa laluwe ya ku matisa mota kamba ku lutiwa mwa ku matiseza mota. Batu ba kona ku itamaiseza limota mo ba latela kaufela, niha ba kozwi, mi ha ba tokwi ku latelela lubilo lo lu lumelelizwe, milao ya za fo ba swanela ku yema, malaiti  a za litaelo za fa mukwakwa, milao ye bonisa mikwakwa mo ku swanela ku fita fela limota ze ya kulokulikuñwi, kamba sibaka sa mukwakwa se si lukiselizwe kuli batu ba silele teñi. Kana “tukuluho” ye cwalo ya tabisa? Kutokwa ni hanyinyani! Tukuluho ye cwalo ne i ka labula matata a matuna. Nihaike kuli milao ya fa mukwakwa i palelwisa batu ku ikezeza mo ba latela kaufela, lwa ziba kuli milao yeo i sileleza mandilaiba ni bazamai.

Ka nzila ye swana, Jehova u lu fanga milao ye bonisa mo lu swanela ku pilela. Milao yeo ya lu tusanga. Kambe milao yeo ne i siyo, ne lu ka tokwa ku ituta lika ka ku lika-lika fela mi seo ne si ka lu kenya mwa kozi ni ku nyandisisa ba bañwi. Muinelo o cwalo u swana ni ku pila mwa tolopo mo ku si na milao ya fa mukwakwa mi ha u tabisi mi hape u lubeta. Niti kikuli lwa tokwa milao ya mufuta o muñwi mi ba bañata ba lumela taba yeo.

“Mulwalo Wa Ka Ha U Na Bukiti”

Milao ya fa mukwakwa i kona ku ba ye miñata hahulu—mwa linaha ze ñwi ku na ni milao ye miñata-ñata ye ama fela za mayemisezo a limota. Kono Bibele ha i si ka lu tomela milao ye miñata-ñata. Yona i lu fa fela likuka za butokwa, ili ze sa imezi kamba ku nyandisa. Jesu Kreste na file bateelezi ba hae memo ye tabisa ye li: “Mu tahe ku na mina kamukana ba ba katezi, ba ba imezwi, mi ni ka mi imulula. Kakuli coko ya ka i bubebe, mi mulwalo wa ka ha u na bukiti.” (Mateu 11:28, 30) Mwa liñolo la na ñolezi puteho ya Sikreste ya kwa Korinte, muapositola Paulusi na ñozi kuli: “Fo ku na ni Moya wa Mulena, ku inzi tukuluho.”—2 Makorinte 3:17.

Kono tukuluho yeo i na ni maciñekelo. Jesu na bonisize fo ku sweu kuli Mulimu u tokwa kuli lu latelele milao ye bunolo. Ka mutala, Jesu na bulelezi balutiwa ba hae kuli: “Taelo ya ka, kikuli mu latane, sina ha ni mi latile.” (Joani 15:12) Mu nahane fela mo ne bu ka bela bupilo kambe mañi ni mañi na mamela taelo yeo! Seo si bonisa kuli tukuluho ye ba ikola Bakreste i na ni maciñekelo. Muapositola Pitrosi na ñozi kuli: “Mu ba ba lukuluhile, kono mu si ke mwa eza bulukuluhi bwa mina kubo ya ku apesa bumaswe; kono mu izamaise sina batanga ba Mulimu.”—1 Pitrosi 2:16.

Kacwalo, nihaike kuli Bakreste ha ba tokwiwi ku mamela milao ye miñata-ñata, ha ba pili ka ku latelela ze ba nga fela bona kuli ki ze nde kamba ze maswe. Batu ba tokwa ketelelo ye kona ku fiwa fela ki Mulimu. Bibele i bulela patalaza kuli: “Mutu nih’a zamaya, h’a koni ku izamaisa ili yena.” (Jeremia 10:23) Haiba lu latelela ketelelo ya Mulimu, lu ka tuseha hahulu.—Samu 19:11.

Ye ñwi ya lituso zeo ki tabo ye lu ka ba ni yona. Ka mutala, mutangana ya bulezwi kwa makalelo a taba ye sapili na banga lisholi ni lihata. Hape na li muitamaeli. A mano ituta likuka za Bibele ze pahami, a cinca mupilelo wa hae mi a kala ku li latelela. U li: “Nihaike kuli ne ni palezwi ku latelela likuka za Bibele  kaufela onafo fela, ne ni ziba kuli ki za butokwa. Mupilelo wa ka wa kale ne u si ka ni tiseza tabo ye ni ikola cwale. Ku pila ka likuka za Bibele ku nolofaza bupilo bwa mutu. Ku mu tusa ku ziba mwa ku pilela ni ku ziba ze nde ni ze maswe.”

Batu ba bañata ba fumani kuli ku cwalo luli. Bibele i ba tusize ku ikola lika ze cwale ka bulikani bo bunde ni ba bañwi, ku ba ni mubonelo o munde wa musebezi, ku ambuka mikwa ye sinya, ni ku pila bupilo bo bunde. Markus, * mutangana ya na sa mamelangi likuka za Bibele sapili kono ya sa li mamela cwale, u bulela cwana ka za bupilo bwa hae, u li: “Ku pila ka likuka za Bibele ku ni tusize kuli ni kutekehe.” *

Mu Ka Iketelañi?

Kacwalo he kana Bibele i lu palelwisa ku ikezeza mo lu latela? Kalabo kikuli eni—ilikuli kaufela luna lu kone ku tuseha. Kono kana Bibele ya imeza? Kalabo kikuli batili. Tukuluho ye si na maciñekelo i labulanga fela matata. Likuka za Bibele ki ze bunolo mi li lu tusa ku pila bupilo bo bunde ni bo bu tabisa. Markus u li: “Nako ha i nze i ya ne ni boni butali bwa ku itusisa likuka za Linzwi la Mulimu mwa bupilo. Nihaike kuli bupilo bwa ka bwa shutana ni bwa batu ba bañata, ni kamuta ha ni nahanangi kuli ni yawile nto ye ñwi ye nde mwa bupilo.”

Muta mu lemuha bunde bo bu tiswa ki ku itusisa likuka za Bibele mwa bupilo bwa mina, mu ka fita fa ku itebuha hahulu Linzwi la Mulimu. Seo si ka mi fumanisa mbuyoti ye tuna ni ku fita—yona ya ku lata Musimululi wa lona, yena Jehova Mulimu. “Ku lata Mulimu, kiha lu mamela litaelo za hae; mi litaelo za hae ha li na bukiti.”—1 Joani 5:3.

Jehova ki yena ya lu bupile mi hape ki Ndat’a luna wa kwa lihalimu. Wa ziba ze kona ku lu tusa. Ku fita ku lu imeza, u lu fanga milao ye kona ku lu tusa. Jehova u lu eleza cwana ka ku loka, u li: “Mawe, kabe n’o utwile milao ya ka! n’o kabe u pilile mwa kozo ye swana inge nuka; ze lukile za hao ne li kabe li bonahala sina mandinda a mwa liwate.”—Isaya 48:18.

[Litaluso za kwatasi]

[Siswaniso se si fa likepe 9]

Jesu na bulezi kuli milao ya Mulimu ya imulula

[Siswaniso se si fa likepe 10]

Ku latelela ketelelo ya Mulimu ku tusa mutu ku ba ni tabo mwa bupilo ni ku pila bupilo bo bu kutekeha