Kana Mulimu Lwa Kona ku Mu Ziba Luli?

“MI BUPILO BO BU SA FELI, KIKULI BA . . . ZIBE, WENA, MULIMU A NOSI WA NITI.”—JOANI 17:3.

MUAPOSITOLA PAULUSI n’a bulezi kuli: “O! buliba bwa bufumu ni bwa butali . . . ni bwa zibo ya Mulimu! Likatulo za hae ha li konwi ku batisezwa, ni linzila za hae ha li konwi ku fumanwa!” (Maroma 11:33) Kana manzwi ao a talusa kuli batu ha ba koni ku ba ni butali kamba zibo ye swana ni ya Mulimu, kuli mane ha ba koni nihaiba ku mu ziba?

Balapeli ba bañwi ba lumela kuli ha ku konahali ku ziba Mulimu. Hatiso ye bizwa The Encyclopedia of Religion i talusa cwana ka za tumelo ya balapeli bao, i li: “Mulimu u fita za zibwa ka zona kaufela. . . . Mulimu ha konwi ku fiwa libizo kamba ku taluswa. Ha ku na libizo la swanela kamba nzila ya konwa ku taluswa ka yona. . . . Ha na ku zibiwa bakeñisa kuli ha ku konahali ku mu ziba.” *

Magazini ye bizwa Newsweek i talusa kuli buñata bwa batu ba ba si balapeli se ba lumela hahulu “tumelo ye nca” ya kuli “ku na ni niti fela iliñwi, mi niti yeo kikuli ha ku na niti.”

Niteñi, batu ba bañata ha ba tabeli ku ba ni lipuzo ze sa alabiwi ka za mulelo wa bupilo. Ba tomohiswa lipilu ki bunjebwe, matuku, ni mifilifili. Mi batu bao ba kana ba zwafiswa ki ku sa ziba ze ka ezahala kwapili. Ba kana ba bata ku fumana likalabo, kono ha ba sa li fumani, ba kana ba nahana kuli ha li yo. Mi kacwalo buñata bwa batu bao ba zwile mwa likeleke mi ba ba sa lumela kuli Mulimu u teñi bona ba ipatela linzila za ku mu lapela ka zona.

Ze I Bulela Bibele

Batu ba ba lumela ze i bulela Bibele ili ba ba lumela kuli Jesu Kreste ki Mubuleli wa Mulimu ba swanela ku tabela ku ziba ze i bulela Bibele. Mwendi mwa hupula kuli muta o muñwi Jesu n’a bulezi za linzila ze peli, ‘nzila ya sinyeho ye atami’ ni ‘nzila ya bupilo ye kumbani.’ N’a talusize mo lu kona ku zibela mufuta wa batu ba ba zamaya mwa nzila ye ñwi ni ye ñwi ka ku bulela kuli: “Mu  ka ba ziba ka miselo ya bona.” Ka miselo ya mufuta mañi? Ha mu na ku ba ziba ka ze ba bulela kono mu ka ba ziba ka likezo za bona, sina mwa n’a bulelezi Jesu kuli: “Hasi batu kaufela ba ba li ku na: Mulena, Mulena, ba ba ka kena mwa mubuso wa kwa lihalimu; kono ku ka kena ya eza se si latwa ki Ndate ya kwa lihalimu.” Ku ipulela fela kuli lu na ni tumelo ku Mulimu ha ku si ka likana. Lu swanela ku eza tato ya Mulimu. Mi kona libaka lu swanela pili ku ba ni zibo ye nepahezi ya tato ya Mulimu.—Mateu 7:13-23.

Jesu n’a bonisize hande kuli batu ba kona luli ku ba ni zibo ya Mulimu. N’a bulezi kuli: “Mi bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Kaniti, lwa kona ku ba ni butali ni zibo ya patulula Mulimu, ibile fela lu ikataza ku bata lika zeo. Niteñi, mupuzo wa ka fa ba ba eza cwalo Mulimu ki bupilo bo bu sa feli mi kona libaka ku bata butali ni zibo yeo ha ku swanela.

[Litaluso za kwatasi]

[Siswaniso se si fa likepe 4]

Nzila ye kumbani i isa kwa bupilo