Daniel ni Baji ya Hae ya Mukopano wa Sikiliti

JESU na nyazize ba bahulu ba bulapeli ba baipi ba ne ba filikanyizwe ki bana ba ne ba lumbekile Mulimu fa nyangela. Kacwalo Jesu a ba buza kuli: “Ha mu si ka bala taba ye li: Ka milomo ya bana, ni ya ba ba anya, u fumani milumbeko ye petehile?”—Mateu 21:15, 16.

Daniel, mwanana wa lilimo ze silezi, ya swalisana ni puteho ya si-Russia mwa Germany, u paka kuli bana ba sa lumbeka Jehova nihaiba la kacenu le. Yena ni bomahe, ni kaizel’a hae ne ba fumanehile kwa mukopano wa sikiliti wa Lipaki za Jehova mwa Duisburg. Ne li lona lwa pili ku fumaneha kwa mukopano wo mutuna wo. Lika kaufela ne li ze nca ku bona, ku kala ka hotela mo ne ba tibelezi, buñata bwa batu ba ne ba putehani, taba ya ku ina sikalalambo ni ku teeleza ka mazazi a malalu, kolobezo mane ni yona drama. Daniel na ezize cwañi kwa mukopano wo? Na ikutekile hande.

La Mubulo hamulaho wa mukopano, Daniel a zuha kakusasana kuli a ye kwa sikolo. F’o na sa kutezi kale kwandu. Kono ne ku sa na ni nto ye ñwi ye ne li fa baki ya hae. Ne li baji ye ne i bonisa kuli na fumanehile kwa mukopano! Bomahe ba mu taluseza kuli: “Mukopano u felile. Kacenu wa kona ku zwisa baji ya mukopano fa baki ya hao.” Kono Daniel a ba alaba kuli: “Ni bata kuli batu kaufela ba zibe ko ne ni ile ni ze ni zo ituta kwateñi.” Kacwalo Daniel a tina baji ya hae ya mukopano inze a tabile lizazi kaufela kwa sikolo. Bo muluti ba hae ha ne ba mu buzize ka za baji yeo, a ba taluseza za mukopano wo kaufela ona.

Ka ku eza cwalo, Daniel na likanyisa mutala wa banana ba bañata-ñata ba ba lumbekile Jehova mwa linako za kwamulaho.