Ku Nga Mikopano ya Luna Ye Kenile ka Likute
Ku Nga Mikopano ya Luna Ye Kenile ka Likute
“Ni ka ba tisa kwa lilundu la ka le li kenile, ni ba tabise mwa Ndu ya ka ya tapelo.”—ISAYA 56:7.
1. Bibele i fa mabaka afi a bonisa kuli lu lukela ku bonisa likute le li swanela kwa mikopano ya luna?
JEHOVA u kopanyize batu ba hae, Bakreste ba ba tozizwe ni balikani ba bona, kuli ba mu lapele fa ‘lilundu la hae le li kenile.’ U sweli wa ba tabisa mwa ‘ndu ya hae ya tapelo,’ yona tempele ya hae ya kwa moya, ye li “Ndu ya tapelo ya macaba kaufela.” (Isaya 56:7; Mareka 11:17) Mihato yeo ya ngile Jehova i bonisa kuli bulapeli bwa hae ki bo bu kenile, bu twekile, mi bu pahami. Lu bonisa kuli lu nga lika ze kenile mwa li ngela Jehova haiba lu bonisa likute le li swanela kwa mikopano ya luna ko lu yo itutanga ni ku lapela.
2. Kiñi se si bonisa kuli Jehova na nga sibaka sa na ketile kuli si itusiswe kwa bulapeli bwa hae ku ba se si kenile, mi Jesu na bonisize cwañi kuli ni yena na na ni mubonelo o swana?
2 Mwa Isilaele wa ikale, sibaka sa na ketile Jehova kuli batu ba lapelelange ku sona ne si lukela ku ngiwa ku ba se si kenile. Tabernakele ni libyana za yona kaufela ne li na ni ku toziwa ni ku keniswa kuli “ibe linto ze kenile hahulu.” (Exoda 30:26-29) Mwahal’a yona ne ku na ni libaka ze peli ze bizwa “Sibaka se si kenile” ni “Sibaka se si kenile hahulu.” (Maheberu 9:2, 3) Hasamulaho tabernakele ne i yolilwe ki tempele ya mwa Jerusalema. Jerusalema ne li yona pita ya bulapeli bwa Jehova, kacwalo ne i bizwa “munzi o kenile.” (Nehemia 11:1; Mateu 27:53) Jesu ha na sa li fa lifasi-mubu, na bonisize likute le li swanela kwa tempele. Na filikanyizwe ki batu ba ne ba shwaula sibaka sa tempele ka ku ezeza lipisinisi za bona ku sona ni ba ne ba pumahanyanga fa sibaka seo kabakala ku saba ku ngonjoloka.—Mareka 11:15, 16.
3. Ki lifi lika ze bonisa kuli mikopano ya Maisilaele ne li ye kenile?
3 Maisilaele ne ba kopananga kamita kuli ba lapele Jehova ni ku teeleza kwa Mulao wa hae ha u baliwa. Mazazi a mañwi a mikiti ya bona na bizwa mikopano ye kenile kamba kopano ye kenile, ili ku bonisa bukeni bwa mikopano yeo. (Livitike 23:2, 3, 36, 37) Fa mukopano o muñwi wa sicaba mwa miteñi ya bo Ezira ni Nehemia, Malivi ne “ba tusa ku taluseza sicaba mulao.” Kabakala kuli “sicaba kaufela ne si lila ha si utwa manzwi a mulao,” Malivi ne “ba kuzisa sicaba kaufela cwalo, ba li: A mu kuze kakuli lizazi le, ki le li kenile.” Maisilaele cwale kiha ba ungeka Mukiti wa Minganda ka ‘tabo ye tuna.’ Ku zwa f’o “kwa balwa mwa buka ya mulao wa Mulimu ka zazi ni zazi, ku kala ka lizazi la pili, ku isa ku la ku feleleza. Ba eza mukiti ka mazazi a 7, mi ka la bu 8 kwa ezwa kopano ye tuna hahulu, ka ku ya ka mulao.” (Nehemia 8:7-11, 17, 18) Zeo luli ne li litukiso ze kenile ze ne tokwa kuli ba ba tilo kopana ba ise kwateñi tokomelo ka likute.
Mikopano ya Luna I Kenile
4, 5. Ki lifi lika ze ezahalanga kwa mikopano ya luna ze paka kuli ki ye kenile?
4 Ki niti Jehova kacenu ha na munzi o kenile wa ketile fa lifasi, o na ni tempele ye ipitezi ye neezwi kwa bulapeli bwa hae. Kono ha lu swaneli ku libala kuli mikopano ya ku lapela Jehova ki mikopano ye kenile. Lu kopananga halalu ka sunda, ka mulelo wa ku bala ni ku ituta Mañolo. Linzwi la Jehova la ‘taluswanga’ kwa mikopano ya luna, mi sina mo ne ku inezi mwa miteñi ya Nehemia, ‘batu b’a talusezwanga kuli ba utwisise se si balwa.’ (Nehemia 8:8) Mikopano ya luna kaufela i kwalulwanga ni ku kwalwa ka tapelo, mi ye miñata ku yona, lu opelanga lipina za ku lumbeka Jehova. (Samu 26:12) Kaniti mikopano ya puteho ki kalulo ya bulapeli bwa luna mi lu tokwa ku bonisa likute ku Mulimu ni ku isa kwateñi tokomelo ye tuna.
5 Jehova u fuyolanga batu ba hae ha ba kopana hamoho ku mu lapela, ku ituta Linzwi la hae, ni ku ikola siango se sinde sa Sikreste. Nako ya ku kopana ha i fitile, lu hupulange kuli kwa mikopano ‘ki kona kwa laezi mbuyoti ya hae Jehova.’ (Samu 133:1, 3) Lu abelwa kwa mbuyoti yeo haiba lu fumaneha teñi ni ku latelela ka tokomelo mo i zamaela mikopano. Mi Jesu na ize: “Mo ku na ni ba babeli kamba ba balalu ba ba kopani ka Libizo la ka, ni mwateñi mwahal’a bona.” Taba ye mwa liñolo le, i ama kwa maeluda ba Sikreste ba ba kopana kuli ba tatulule matata a matuna mwahal’a Bakreste, kono sikuka sa teñi si ama hape ni kwa mikopano ya luna. (Mateu 18:20) Haiba Kreste, wa banga teñi ka moya o kenile Bakreste ha ba kopani hamoho ka libizo la hae, u zibe mikopano yeo i swanela ku ngiwa ku ba ye kenile luli!
6. Ku kona ku bulelwañi ka za libaka za luna za makopanelo, ibe ze nyinyani kamba ze tuna?
6 Ki niti kuli Jehova ha pili mwa litempele ze ezizwe ka mazoho a batu. Kono niteñi Mandu a luna a Mubuso ki libaka za bulapeli bwa niti. (Likezo 7:48; 17:24) Lu yo kopananga kwa Ndu ya Mubuso kuli lu itute Linzwi la Jehova, ku yo mu lapela, ni ku yo mu opelela milumbeko. Ku cwalo ni kwa Mandu a luna a Mikopano. Libaka za nyangela ze telelwanga kuli lu kopanele mwateñi ka nako ya mikopano ya luna ya sikiliti—ze cwale ka maholu kamba masitediyamu a lipapali—li fetuhanga libaka za malapelelo ka nako ye li itusiswa kwa mikopano ya luna ye kenile. Lu lukela ku bonisa likute ka linako zeo za ku lapela, ibe kwa mikopano ye minyinyani kamba ye mituna, mi likute leo li swanela ku bonahala ka moya ni likezo za luna.
Mo Lu Kona ku Boniseza Likute kwa Mikopano ya Luna
7. Ki lika mañi ze lu kona ku eza luli kuli lu bonise likute kwa mikopano ya luna?
7 Ku na ni lika ze lu kona ku eza luli kuli lu bonise likute kwa mikopana ya luna. Ye ñwi ya zona ki ku fumaneha ha ku opelwa lipina za Mubuso. Buñata bwa lipina ze li ñozwi sina litapelo mi kacwalo li swanela ku opelwa ka likute. Muapositola Paulusi na kutezi ku ñola manzwi a kwa Samu 22 a ama ku Jesu a li: “Ni ka bulelela banyani ba ka Libizo la hao; ni ku lumbeke [kamba ni ku opelele, NW] mwahal’a Mukopano.” (Maheberu 2:12) Kacwalo lu swanela ku bona teñi kuli lu mwa lipula za luna pili muina-situlo a si ka biza kale pina mi cwale kihona lu ka nahanisisa taluso ya manzwi a pina yeo ha lu nze lu opela. Haike muopelelo wa luna u bonise maikuto a walisamu ya na ñozi kuli: ‘Ni ka itumela [kamba ku lumbeka, NW] Muñ’a Bupilo ka pilu ya ka kaufela, mwa Kuta ya ba ba lukile, ni mwa Kopano.’ (Samu 111:1) Kacwalo ku opelela Jehova milumbeko ki le liñwi la mabaka a utwahala ha lu swanela ku itahanelanga kwa mikopano ni ku sa funduka ku fitela mikopano i fela.
8. Bibele i fa mutala mañi o bonisa kuli lu swanela ku teelezanga ka tokomelo litapelo ha li fiwa kwa mikopano ya luna?
8 Ye ñwi ya lika za butokwa ze kutekehisa mikopano ya luna kaufela ki tapelo ye zwa kwa pilu ye fiwanga ku yemela sicaba kaufela se si putehani. Ka nako ye ñwi, Bakreste ba mwa Jerusalema mwa miteñi ya baapositola ne ba kopani hamoho mi “ba tumusa kwa manzwi ku lapela Mulimu ka pilu i liñwi.” Kabakaleo, niha ne ba nyandiswa, ba zwelapili ku “bulela Linzwi la Mulimu ba sa sabi.” (Likezo 4:24-31) Kana mu hupula kuli ku na ni ya na tuhelezi munahano wa hae ku yembuluka mwahal’a tapelo yeo? Kutokwa, kakuli kaufela bona ne ba ‘lapela ka pilu i liñwi.’ Litapelo ze fiwanga kwa mikopano ya luna li tunumekanga maikuto a bote ba ba putehani. Luli lu swanela ku teelezanga ka tokomelo tapelo ha i fiwa.
9. Lu kona ku bonisa cwañi likute kwa mikopano ya luna ye kenile ka muapalelo ni likezo za luna?
9 Ku zwa f’o, lwa kona ku bonisa mo lu ngela ka likute mikopano ya luna ye kenile ka muapalelo wa luna. Mo lu bonahalela, ibe ka muapalelo kamba mushukulelo wa luna wa milili, kwa kona ku bubekisa hahulu mikopano ya luna. Muapositola Paulusi na file kelezo ye li: “Ni lata kuli banna ba lapele mwa mabaka kaufela, inze ba yemisa mazoho a kenile, ku si na buhali ni likañi. Hape ni lata kuli basali ba apale ka mukwa o swaneleha, ku kaba kwa bona ibe buikokobezo ni buiswalo; ba si ke ba kaba milili ya lunyeze, niheba gauda, kamba lipelela, kamba liapalo ze feza mali; kono mukabo wa bona ibe misebezi ye minde, ili ye lukela basali ba ba ipulezi kuli ba sebeleza Mulimu.” (1 Timotea 2:8-10) Ha lu ezeza mikopano ye mituna mwa libaka ze si na miluti, lwa kona ku apala liapalo ze tokwahala ka nako ya ku cisa kono inze ili ze kutekeha. Ku zwa fo, kabakala ku nga ka likute mikopano lu ka ambuka ku ca lico kamba ku sota cingamu ka nako ye lu kopani. Ku apala hande ni ku bonisa mikwa ye minde kwa mikopano ya luna ku kutekehisa Jehova Mulimu, bulapeli bwa hae, ni balapeli ka luna.
Muzamao O Lukela Ba Ndu ya Mulimu
10. Muapositola Paulusi na bonisize cwañi kuli kwa mikopano ya luna ya Sikreste ku tokwahala muzamao o pahami?
10 Kwa 1 Makorinte, kauhanyo 14, lu bala za kelezo ye butali ya muapositola Paulusi ya mo i swanela ku zamaisezwa mikopano ya Sikreste. Na unguzi kelezo yeo ka manzwi a’ li: “Linto kaufela li ezwe ka swanelo, ni ka mulao.” (1 Makorinte 14:40) Mikopano ya luna ki kalulo ya butokwa mwa litukiso za puteho ya Sikreste, mi i tokwa kuli lu be ni muzamao o pahami o lukela ba ndu ya Jehova.
11, 12. (a) Banana ba ba fumanehanga kwa mikopano ya luna ba swanela ku lutiwañi? (b) Ki ifi nzila ye swanela yeo banana ba kona ku paka tumelo ya bona kwa mikopano?
11 Banana sihulu ba tokwa ku lutiwa mo ba lukela ku ezeza ha lu li kwa mikopano. Bashemi ba Sikreste ba swanela ku taluseza bana ba bona kuli Ndu ya Mubuso ni sibaka ko ku itutelwa Tuto ya Buka ya Puteho hasi mabapalelo. Kono ki libaka ko lu yo lapelelanga Jehova ni ku ituta Linzwi la hae. Mulena Salumoni ya butali na ñozi kuli: “Ha u kena mwa ndu ya Mulimu, u tokomele mautu a hao, mo u kenela. U sutelele, kakuli nto ye nde ki ku teeleza litaba.” (Muekelesia 5:1) Mushe na lutile Maisilaele ku kopana hamoho, ba bahulu ni “bana” ba bona. Na ize: ‘U ka puta sicaba . . . kuli ba utwe, mi ba itute ku saba Muñ’a Bupilo Mulimu wa mina, mi ba tokomele ku eza litaba kaufela za milao yeo. Ni kuli bana ba ba si ka ziba litaba zeo, ba li utwe, mi ba itute ku saba Muñ’a Bupilo.’—Deuteronoma 31:12, 13.
12 Ka nzila ye swana, banana kacenu ba yanga ni bashemi ba bona kwa mikopano kuli ba yo utwa ni ku ituta. Ha se ba kona ku teeleza ni ku utwisisa lituto za matatekelo za Bibele, banana ni bona ba kona ku “paka ka mulomo” tumelo ya bona, ka ku fa likalabo ze kuswani. (Maroma 10:10) Mwanana wa kona ku kala ka ku alabanga fela manzwi a sikai ha ku buzizwe puzo ya utwisisa. Kwa makalelo a kana a balanga fela kalabo, kono nako ha i nze i ya, u ka lika ku alabanga ka ku itusisa manzwi a hae tota. Ka ku eza cwalo mwanana u fumana tuso ni ku ba ni tabo, mi lipulelo za hae ze zwa kwa pilu li tabisa ba bahulu ba ba teeleza. Kacwalo bashemi ba swanela ku toma mutala o munde ka ku fanga likalabo ni bona. Haiba kwa konahala, ki hande banana ha ne ba ka fiwa Bibele ya ka butu, buka ya lipina, ni buka ye itutiwa. Ba swanela ku ituta ku nga ka likute libuka zeo. Lika ze kaufela li ka tusa banana ku utwisisa kuli mikopano ya luna ki mikopano ye kenile.
13. Ki sifi se lu bata kuli ba ba tilo kopana lwa pili kwa mikopano ya luna ba eze?
13 Kono ha lu tokwi kuli mikopano ya luna i swane sina lisebelezo za likeleke za Krestendomu. Lisebelezo za ba Krestendomu li kona ku ba ze kuzize hahulu kabakala buipi kamba ze na ni lilata le lituna inge ko ku ungekezwi ngoma. Lu bata kuli mikopano ya luna kwa Ndu ya Mubuso i be ye susueza ni ku tabisa kono hape isiñi ku fiteleza kuli mane ku swane inge ba ba fa mukotokoto. Se lu kopanelanga ki ku lapela Jehova, kacwalo mikopano ya luna i swanela ku ba ye kutekeha kamita. Lu bata kuli batu ba ba tilo fumaneha lwa pili kwa mikopano ya luna, hamulaho wa ku teeleza ku ze bulezwi ni ku lemuha likezo za luna ni za bana ba luna, ite ba bulele kuli: “Luli Mulimu u mwateñi ku mina.”—1 Makorinte 14:25.
Mikopano Ha I Na ku Fela mwa Bulapeli bwa Luna
14, 15. (a) Lu kona ku tokomela cwañi kuli lu si ke lwa ‘libala Ndu ya Mulimu wa luna’? (b) Liñolo la Isaya 66:23 li sweli ku talelezwa cwañi kacenu?
14 Sina mo ku bulelezwi kwa makalelo, Jehova u kopanya batu ba hae ni ku ba tabisa mwa ‘Ndu ya hae ya tapelo,’ yona tempele ya hae ya kwa moya. (Isaya 56:7) Nehemia munna ya sepahala na hupulisize Majuda ka yena kuli ba swanela ku bonisa likute le li swanela kwa tempele ka ku zwisa linubu za misebezi ya kwa tempele yeo. Na ize: “Za Ndu ya Mulimu wa luna, ha lu na ku li libala.” (Nehemia 10:39) Ni luna hape ha lu swaneli ku keshebisa memo ya Jehova ya kuli lu mu lapelele mwa ‘Ndu ya hae ya tapelo.’
15 Isaya na polofitile za butokwa bwa ku kopananga hamoho kamita ka mulelo wa ku lapela Mulimu, ha na ize: “Ka kweli ni kweli ha i tasa, ni la Pumulo kaufela mo li tela, mishobo ya batu kamukana i ka kubama fapil’a ka, ku bulela [Muñ’a] Bupilo.” (Isaya 66:23) Bupolofita b’o bu sweli bwa talelezwa kacenu. Ka sunda ni sunda, mwa kweli ni kweli, Bakreste ba ba ineezi ba kopananga hamoho ku lapela Jehova. Ye ñwi ya linzila ze ba ezanga cwalo ka zona ki ku yanga kwa mikopano ya Sikreste ni ka ku kutaza kwa nyangela. Kana mu ba bañwi ba batu ba ba tahanga kamita ‘ku to kubama fapil’a Jehova’?
16. Ki kabakalañi ha lu swanela ku fumanehanga kamita kwa mikopano cwale?
16 Liñolo la Isaya 66:23 li ka talelezwa ka ku tala mwa lifasi le linca la sepisize Jehova. Ka nako yeo, sunda ni sunda luli, ka kweli ni kweli, ‘mishobo luli ya batu kamukana,’ i ka to ‘kubamanga fapil’a Jehova,’ kamba ku mu lapela, kamita ni ku ya ku ile. Haiba kuli mwa lifasi le linca lu kana lu kopananga hamoho ku lapela Jehova kamita, kana ha lu swaneli ku fumanehanga kamita kwa mikopano ya luna ye kenile kacenu?
17. Ki kabakalañi ha lu tokwa ku kopananga hamoho “sihulu ka ku bona kuli lizazi le lituna li sutelezi”?
17 Ha lu nze lu sutelela kwa maungulo, lu swanela ku ikataza hahulu ni ku fita kuli lu fumanehange kwa mikopano ya Sikreste ya ku lapela Jehova. Kabakala ku nga ka bukeni mikopano ya luna, ha lu lumelezi mubeleko, misebezi ya sikolo ya ku yo ezeza kwahae, kamba lituto za sikolo za manzibwana, ku lu palelwisa ku kopananga kamita ni balumeli ka luna. Lu tokwa ku tiiswa ki ba bañwi ka ku ikola siango ni bona. Mikopano ya luna ya puteho i lu fa kolo ya ku zibana hande, ku tiisana, ni ku susumezana “mwa lilato ni mwa misebezi ye minde.” Lu tokwa ku eza cwalo “sihulu ka ku bona kuli lizazi le lituna li sutelezi.” (Maheberu 10:24, 25) Kacwalo he, haike lu bonise likute le li swanela kamita kwa mikopano ya luna ye kenile ka ku fumanehanga kamita, ku apala hande, ni ku bonisa likezo ze nde. Ka ku eza cwalo lu ka bonisa luli kuli lu nga lika ze kenile mwa li ngela Jehova.
Lundululo
• Ki sifi se si bonisa kuli mikopano ya batu ba Jehova i swanela ku ngiwa ku ba ye kenile?
• Ki lifi lika ze ezahalanga kwa mikopano ya luna ze paka kuli ki ye kenile?
• Banana ba kona ku bonisa cwañi kuli ba nga mikopano ya luna ku ba ye kenile?
• Ki kabakalañi ha lu swanela ku fumanehanga kamita kwa mikopano?
[Lipuzo za Tuto]
[Maswaniso a fa likepe 28]
Mikopano ya ku lapela Jehova ki ye kenile ku si na taba kuli i ezezwa kai
[Siswaniso se si fa likepe 31]
Bana ba luna ba yelanga ku yo teeleza ni ku ituta kwa mikopano