Ku Swalisana Hamoho mwa Musebezi wa ku Yaha Kuli Mulimu A Lumbekwe

BATU ba ba pila ku se siñwi sa lioli za Solomon Islands ne ba nze ba iponela Ndu ya Mubuso ye nca ya Lipaki za Jehova ha i yahiwa. Musali yo muñwi na ize: “Mwa keleke ya luna ki ba bañata ba ba zamayanga ba nze ba koleka mali. Niha lu kupanga ba mwa keleke ya luna kuli ba koleke mali, lu sa palelwa ku ba ni mali a likani a ku yahisa keleke ye nca. Kanti mina Lipaki mu fumana cwañi mali?” Paki ya na ambotwa ki musali yo a alaba kuli: “Lipaki kaufela mwa lifasi lu lapela Jehova sina lubasi lu li luñwi. Puteho ya luna ni mizwale ba luna ba mwa lifasi kaufela ne ba zwisize ze ne tokwahala kuli lu yahe Ndu ya Mubuso ye nca. Jehova u lu lutile ku swalisana mwa linto kaufela.”

Swalisano ya Lipaki za Jehova ya iponelwa mwa misebezi ya bona kaufela, ku kopanyeleza cwalo ni musebezi wa ku yaha Mandu a Mubuso a mañata-ñata. Swalisano yeo ye iponelwa ha ku nze ku petwa misebezi ye cwalo hasi ye sienyi. Batu ba Mulimu ba zwezipili ku swalisana ka lilimo-limo. Ki kabakalañi ha ku konwa ku bulelwa cwalo?

Ku Yahiwa kwa Tabernakele ni Tempele

Jehova na ama kwa sicaba sa Isilaele ha na bulelezi Mushe lilimo ze fitelela 3,500 kwamulaho kuli: “Ba ni lukiseze Sibaka se si kenile.” (Exoda 25:8) Ka za mo ne si swanela ku yahelwa Sibaka se si kenile seo, Jehova hape na ize: “Mu ka eza zeo kaufela ka ku ya ka siswaniso sa Tabernakele, ni ka siswaniso sa libyana za yona kaufela, mo ni mi boniselize.” (Exoda 25:9) Jehova kiha fa milao ye bonisa hande-ndende mwa ku yahela sibaka se si kenile seo, libyana za mwateñi, ni mwa ku si kabiseza. (Exoda 25:10–27:19) Yona “tabernakele” kamba tende yeo, kona ye ne ka ba pita ya bulapeli bwa niti bwa Maisilaele kaufela.

Ha lu zibi palo ya batu ba ne ba abani mwa musebezi wo, kono Maisilaele kaufela ne ba kupilwe kuli ba tuse kwateñi. Mushe na ba bulelezi kuli: “Mu zwise ku za mina nubu ye mu ka fa [Muñ’a] Bupilo. Mutu ni mutu wa pilu ye tabela ku eza cwalo, a tise nubu ye fiwa [Muñ’a] Bupilo.” (Exoda 35:4-9) Maisilaele ba mano utwa cwalo ne ba ezize cwañi? Exoda 36:3 i li: “Ba nga ku Mushe linubu kaufela ze filwe [Muñ’a] Bupilo, ze tisizwe ki bana ba Isilaele ku eza misebezi ya sebelezo ya mwa Sibaka se si kenile. Mi ka zazi ni zazi, ka nako ya kakusasana, ne ba nze ba tisa linubu za buitumelo bwa bona.”

Hañihañi linubu ze ne tisizwe za ba ze ñata hahulu, mi batu ne ba sa zwelapili ku tisa linubu ze ñata. Bambuti kaufela ba ne ba eza musebezi ba bulelela Mushe kuli: “Sicaba si se si tisize ze likana misebezi ya sebelezo y’a laezi [Muñ’a] Bupilo kuli lu i eze, mane ni ku fita.” Kacwalo  Mushe a bulelela sicaba kuli: ‘Banna ni basali, mu si ke mwa tisa linubu za musebezi wa Sibaka se si kenile.’ Ki sika mañi se ne si zwile mwateñi? “Linto za ku sebeza misebezi kaufela ne li se li likani; ni ku siyala ne ku ka siyala ze ñata.”—Exoda 36:4-7.

Bufani bwa Maisilaele ne bu tisize kuli tabernakele i fezwe ku yahiwa mwahal’a silimo. (Exoda 19:1; 40:1, 2) Ka ku yemela bulapeli bo bu kenile, batu ba Mulimu ne ba kutekile Jehova. (Liproverbia 3:9) Kwapilinyana ne ba ka abana mwa mungendenge wa ku yaha muyaho o mutuna o fita wo. Hape ba ne ba ta itakaleza kaufela ne ba ka abana mwa musebezi wo ibe kuli ba na ni yeloseli ya za buyahi kamba kutokwa.

Ibata iba hamulaho wa lilimo ze mianda i ketalizoho ku zwa fo i yahelwa tabernakele, Isilaele a kalisa musebezi wa ku yaha tempele mwa Jerusalema. (1 Malena 6:1) Tempele yeo ne i ka ba muyaho sakata, o buheha luli kabakala ku yahiwa ka macwe ni likota za miambeso. (1 Malena 5:17, 18) Jehova na file Davida siswaniso sa tempele ka moya wa hae. (1 Makolonika 28:11-19) Kono na ketile Salumoni, mwan’a Davida kuli a okamele musebezi wa ku yaha. (1 Makolonika 22:6-10) Davida na yemezi musebezi wo wa ku yaha ka pilu ya hae kaufela. Na bata-batile macwe, miambeso, ni liyahiso ze ñwi ni ku tisa gauda ni silivera ze ñata. Hape na susuelize Maisilaele ka yena kuli ba fane, ka ku ba buza kuli: “Ki mañi ya lata ku zwiseza [Muñ’a] Bupilo za hae kacenu?” Sicaba ne si ngile muhato mañi?—1 Makolonika 29:1-5.

Salumoni ha na kalile ku yaha tempele, na na ni litalenta za gauda ze likana 100,000, ni litalenta za silivera ze likana 1,000,000. Kopa ni lisipi ne li ze ñata hahulu kuli mane ne li sa konwi ku likanywa. (1 Makolonika 22:14-16) Ka tuso ya Jehova ni buikatazo bwa Maisilaele kaufela, mungendenge wo wa ku yaha ne u felizwe hamulaho wa lilimo ze supile ni licika.—1 Malena 6:1, 37, 38.

‘Ndu ya Mulimu wa Niti’

Tabernakele ni tempele ne li bizwa ‘Ndu ya Mulimu wa niti.’ (Baatuli 18:31; 2 Makolonika 24:7) Jehova ni kamuta na sa tokwi ku yahelwa ndu kuli a pumulele mwateñi. (Isaya 66:1) Na bata kuli miyaho yeo i tuse batu. Mane ka nako ye ne kakulwa tempele, Salumoni na buzize kuli: “Kikuli, Mulimu a ka ina luli mwa lifasi? Mbali mahalimu, mane mahalimu a mahalimu  a sa koni ku ku likana, hahulu Ndu ye, ye ni yahile!”—1 Malena 8:27.

Jehova ka mupolofita wa hae Isaya na ize: “Ndu ya ka i ka bizwa kuli ki Ndu ya tapelo ya macaba kaufela.” (Isaya 56:7) Matabelo ni litapelo ze ne fiwa kwa tempele, hamohocwalo ni mikiti ye ne ezezwanga teñi, ne li fa batu ba ba saba Mulimu—bona Majuda ni batu ba macaba—kolo ya ku sutelela ku Mulimu wa niti. Ku yo lapelelanga kwa ndu ya Jehova ne ku tisize kuli ba itame bulikani ni ku silelezwa ki yena. Tapelo ya na lapezi Salumoni kwa tempele i tunafaza niti yeo. Mwa kona ku ipalela manzwi a susueza ao a na bulezi mwa tapelo ya hae ku Mulimu kwa 1 Malena 8:22-53 ni 2 Makolonika 6:12-42.

Yona ndu ya Mulimu wa niti yeo ne i sinyizwe kale-kale ko, kono Linzwi la Mulimu ne li polofitile kuli kwa nako ya kwapili batu ba macaba kaufela ne ba ka kopana hamoho kuli ba lapelele Jehova mwa tempele ya kwa moya ye tuna ni ku fita. (Isaya 2:2) Matabelo a lifolofolo a na fiwanga kwa tempele na swaniseza sitabelo se si petehile sa Mwan’a Mulimu, ili yona nzila fela i nosi ya ku atumela Jehova ka yona. (Joani 14:6; Maheberu 7:27; 9:12) Lipaki za Jehova cwale se ba lapela Mulimu ka yona nzila ye ipitezi yeo, mi ba sweli ku tusa batu ba bañata ku eza cwalo ni bona.

Misebezi ya ku Yaha Kacenu

Mwa lifasi kaufela, Lipaki za Jehova ba sebeleza Mulimu wa niti. Ki bona ba ba li “sicaba se si mata,” se si sweli ku ekezeha. (Isaya 60:22) Sibaka se situna ko ba kopanelanga Lipaki za Jehova si bizwa Ndu ya Mubuso. * Buñata bwa yona miyaho yeo i sweli ya itusiswa, mi ku sa tokwahala ye miñwi ye miñata.

Lipaki za Jehova ba ifananga ‘nze ba lata’ kuli ba yahe Mandu a Mubuso a tokwahala. (Samu 110:3) Kono hañata Lipaki ba mwa silalanda ha ba na yeloseli ye tokwahala ya buyahi, mi mwa libaka ze ñwi mo ku na ni kulo ya bahasanyi ku na ni bubotana bo butuna. Mwa silimo sa 1999, Sitopa Se Si Etelela sa Lipaki za Jehova sa tateka tukiso ya ku yaha Mandu a Mubuso kuli butata bwa kutokwa Mandu a Mubuso bu tatululwe. Ka yona tukiso ye, Lipaki ba ba cuukile ku za buyahi ba tamile misipili ye mitelele kuli ba yo luta mizwale ni likaizeli za bona mwa ku yahela Mandu a Mubuso. Mi bona bayahi ba ba lutilwe bao ba zwezipili mwa musebezi wa ku yaha mwa libaka zeo. Ki lika mañi ze zwile mwa buikatazotuna bo?

Kweli ya February 2006 ha i to eshanga, Lipaki za Jehova ba ba pila mwa linaha ze shebile ne se ba iponezi Mandu a Mubuso a manca a fitelela 13,000 ha yahiwa. Ha mu ipalele manzwi a latelela a ba ba sweli ku kopanela mwa Mandu a Mubuso a manca ao.

Muokameli wa mupotoloho wa kwa Ecuador u bulela kuli: “Hañata ne ku fumanehanga fela batu ba 160 kwa mikopano. Kono ku zwa fela fo i yahelwa Ndu ya Mubuso, batu ba ba fitelela 200 ne ba fumanehile kwa mukopano wa pili. La kacenu le, hamulaho wa likweli ze silezi, batu ba 230 se ba fumanehanga kwa mikopano. Kwa iponelwa hande kuli Jehova u fuyozi musebezi wa ku yaha yona miyaho ye sa tuli hahulu ye kono ili ye tusa sicaba.”

Puteho ya kwa Uganda i li: “Ka lilimo-limo, batu ne ba lu buzanga kuli, ‘mu ka ba lili ni Ndu ya Mubuso ye swana ni e lu bonanga mwa lihatiso za mina?’ Lwa itebuha hahulu ku Jehova kuli cwale se lu na ni sibaka se si kutekeha sa ku lapelela teñi. Ne lu ezezanga mikopano ya luna mwa sintolo sa muzwale, mi hañata ne lu kopananga  lu li ba 30. Kwa mukopano wa pili mwa Ndu ya Mubuso ye nca, ne ku putehani batu ba 110.”

Ofisi ya Mutai ya kwa Solomon Islands i li: “Likaizeli ba babeli ba ba sebeza sina mapaina ba kamita ba biha kuli kwa tabisa luli ku sebeza mwa kalulo ya simu ya puteho ku zwa fela fo i yahezwi Ndu ya Mubuso. Batu se ba tabela hahulu ku teeleza kwa lushango lwa luna ha lu kutaza fa ndu ni ndu ni ka ku tandalelwa. Bona likaizeli bao se ba zamaisa lituto za Bibele ze 17, mi buñata bwa bona baituti bao ba fumanehanga kwa mikopano.”

Ofisi ya mutai ya kwa Myanmar i li: “Pasita ya pila bukaufinyana ni Ndu ya Mubuso u bulela kuli Ndu ya Mubuso ye nca i ekeza kwa bunde bwa silalanda mi batu ba mwa silalanda seo ba itumba ka yona. Bolifitanzila ba bañata ba ambolanga za bunde bwa Ndu ya Mubuso yeo. Seo si fanga mizwale kolo ye nde ya ku fa bupaki. Batu ba bañata ba bata ku ziba ka za sizwale sa luna sa mwa lifasi kaufela. Ba bañata ba ne ba tuhezi ku kopana ka lilimo-limo ba susuelizwe ku kalisa sinca ku kopana.”

Ofisi ya mutai ya kwa Colombia i li: “Kaizeli yo muñwi na memezi munna cwana ya tabela kwa sibaka kone ku yahelwa Ndu ya Mubuso mwa silalanda. Hasamulaho munna yo a bulela kuli: ‘Ne ni nahana kuli mwendi babeleki ba kwateñi ne ba si ke ba ni lumeleza ku kena mwa sibaka seo. Ne ni komokile hahulu ku bona Lipaki ha ba ni lumelisa ka silikani. Banna ni basali ne ba beleka ka t’ata mi ne ku si na ya na namile fela wa toze. Ne ku na ni swalisano mi ne ba bonisa moya o munde. Munna yo a amuhela tuto ya Bibele mi sa kalisa ku fumanehanga kwa mikopano. Hasamulaho a bulela kuli: ‘Se ni ngela  lika mu sili. Ha ni na ku siya Mulimu cwale kabakala kuli ki kale ni mu fumana.’”

Tuso ya Luna ki ya Butokwa

Ku yaha Mandu a Mubuso ki kalulo ya butokwa ya sebelezo ya luna ye kenile. Linzila ze ba tusize ka zona Lipaki za Jehova kwa musebezi wo ibe kuli ki ka mali kamba ka linzila ze ñwi, za itebuhiwa luli. Kono hape lu swanela ku hupula kuli likalulo ze ñwi za sebelezo ye kenile ni zona ki za butokwa. Fokuñwi Bakreste ba banga bonalimai mwa likozi za ka taho mi ba tokwanga tuso ya luna. Ku hatiswa kwa libuka ze tomile fa Bibele ni kona ku peta kalulo ye tuna kwa ku yemela sebelezo ye kenile. Buñata bwa luna lu iponezi mo ba tuselizwe batu ba ba tabela ki magazini kamba buka ye tomile fa Bibele. Kwanda zeo, tuso ya balumiwa ni ba bañwi ba ba mwa sebelezo ye ipitezi ni zona ki za butokwa. Bona Bakreste ba ba bonisize moya wa buitomboli bao ba peta kalulo ye tuna mwa ku yandulula musebezi wa ku kutaza mwa mazazi a mafelelezo a’.

Bote ba ne ba ifanile kwa ku yaha tempele ne ba nyakalalile hahulu. (1 Makolonika 29:9) Nihaiba la kacenu le, ku yemela bulapeli bwa niti ka linubu za luna ku lu tiseza tabo. (Likezo 20:35) Lu banga ni tabo yeo muta lu beya linubu za luna mwa kambokisi ka ka lukiselizwe Mali a ku Yahisa Mandu a Mubuso, ni ha lu fa linubu za musebezi wa mwa lifasi kaufela. Mi linubu zeo li tusa kwa misebezi ye miñwi ye swalisana ni ku kutazwa kwa taba ye nde ya Mubuso. Lipaki za Jehova kacenu ba swalisani mwa bulapeli bwa niti ka nzila ye nde. Haike kaufela luna lu beñi ni tabo ye fumanwa mwa ku yemela bulapeli bwa niti!

[Litaluso za kwatasi]

[Mbokisi/Siswaniso se si fa likepe 20, 21]

LINZILA ZEO BA BAÑWI BA IKETELA KU FANA KA ZONA

LINUBU ZA MUSEBEZI WA MWA LIFASI KAUFELA

Ba bañata ba beyanga kwatuko mali a ku beya mwa tumbokisi twa linubu to tu ñozwi kuli “Linubu za Musebezi wa mwa Lifasi Kaufela—Mateu 24:14.”

Ka kweli, liputeho li lumelanga mali ao kwa ofisi ya Lipaki za Jehova ya mwa naha ya zona. Linubu za mali ze fiwa ka ku itatela hape z’a kona ku lumelwa kwa Watch Tower Bible and Tract Society of Pennsylvania, Box 33459, Lusaka 10101. Macheke a lumelwa kwa keyala ye fahalimu a swanela ku lifiwa kwa “Watch Tower.” Lika za bukabali ze pangilwe fa macwe a butokwa kamba lika fela ze ñwi za butokwa ni zona za kona ku fiwa sina nubu. Liñolo le li talusa ka bukuswani kuli lika zeo ki mpo ya ka ku itatela li lukela ku tahelela ni linubu zeo.

TUKISO YA LINUBU ZA KA TUMELELANO

Mali a kona ku beiwa mwa pabalelo ya Watch Tower kuli a itusiswe mwa lifasi kaufela. Nihakulicwalo mutu ya fa nubu wa kona ku kutisezwa mali a hae haiba a’ kupa. Haiba mu bata litaba ze ñwi, shangwe mu ñolele kwa “Treasurer’s Office” (Ofisi ya Mubuluki wa Sikwama) ka ku itusisa keyala ye bonisizwe fahalimu.

MILELO YA KU FANA

Kwand’a linubu za mali ze fiwa luli, ku na ni mifelo ye miñwi ya ku tusa ka yona sebelezo ya Mubuso mwa lifasi kaufela. Yeo i kopanyeleza:

Mali a Silelezo: Watch Tower ya kona ku ñolwa kuli ite i fiwe mali a bulukezwi ku itusiswa ki ba bañwi hamulaho wa lifu la mutu kamba mali a fiwa mutu ya tuhela musebezi.

Liakaunti za kwa Panga: Mali a bulukiswa mwa panga, mapampili a mali a bulukisizwe, kamba mali a fiwa mutu ya tuhela musebezi a kona ku beiwa mwa pabalelo ya Watch Tower kamba kuli a fiwe Watch Tower fa lifu la mutu, ka ku ya ka ze i tokwa panga yeo.

Ma-Stock ni Ma-Bond: Ma-stock ni ma-bond a kona ku fiwa kwa Watch Tower sina mpo luli.

Miyaho ya ka Butu ni Ndao: Miyaho ya ka butu kamba ndao ye kona ku lekiswa ya kona ku fiwa luli sina mpo, kamba haiba ki ndu mwa pila mufi y’o, kipeto wa kona ku zwelapili ku pila mwateñi ku fitela a shwa. Mu ñolele kwa ofisi ya mutai mwa naha ya habo mina pili mu si ka ñolisa kale za ku fa muyaho kamba mubu wa mina.

Ma-Will ni ma-Trust: Tutu kamba mali a kona ku fiwa kwa Watch Tower ka ku itusisa will (pampili ye bonisa mwa batela mutu kuli libyana za hae li abelwe ha s’a shwile) ye ñozwi ka mulao, kamba Watch Tower ya kona ku kalimiwa nto ye ñwi kuli i itusise yona, ili ye bizwa trust. Trust ye fiwa kwa kopano ya bulapeli i kona ku tahisa kuli mutu a si ke a telela lika ze ñwi.

Sina ka mo i taluseza pulelo ya kuli “milelo ya ku fana,” linubu ze cwalo li tokwa hahulu kuli mufani a nahanisise hande. Kuli mu tuse batu ba ba itakaleza ku fumana tuso kwa musebezi wa Lipaki za Jehova mwa lifasi kaufela ka ku itusisa mifuta ya ku Fana, ku lukisizwe broshuwa ya mwa Sikuwa ni mwa si-Spanish ye na ni toho ya taba ye li Charitable Planning to Benefit Kingdom Service Worldwide. Broshuwa yeo ne i ñozwi kuli i fe litaba fa linzila ze ñata za mo li kona ku felwa linubu ibe cwale kamba mutu ha sa timezi. Ba bañata ha se ba balile broshuwa yeo ni ku nyaka milao ya naha ya bona kamba ku buza baelezi ba za mutelo, se ba konile ku tusa kwa musebezi wa bulapeli ni wa ku tusa batu o ba eza Lipaki za Jehova mwa lifasi kaufela ni ku hulisa lituso za bona za mutelo ha ba nze ba eza cwalo. Haiba mu bata broshuwa ye, mwa kona ku i kupa kwa Ofisi Ya Milelo ya Ku Fana.

Kuli mu utwe ze ñata, mwa kona ku buza ba Ofisi Ya Milelo ya Ku Fana, ka ku ñola kamba ka luwaile, kwa keyala ye bonisizwe kwatasi kamba mwa kona ku ñolela ofisi ya Lipaki za Jehova ya mwa naha ya mina.

Treasure’s Office

Watch Tower Bible and Tract Society of Pennsylvania

Box 33459, Lusaka 10101

Telephone: (01) 272062

[Siswaniso se si fa likepe 18]

Buikatazo bwa luna kaufela kona bo bu lu konisa ku yaha Mandu a Mubuso a mande mwa lifasi kaufela

[Siswaniso se si fa likepe 18]

Ndu ya Mubuso ye nca mwa Ghana