Ki Lifi Libaka Le Lu Ezeza Ze Lukile?

MUNNA yo muñwi ya itutile na kile a li: “Ku lata ku teñi ku na, kono ha ni koni ku eza bunde. Kakuli ha ni ezi bunde bo ni lata; kono ni eza bumaswe bo ni sa lati.” Ki kabakalañi ha ne ku li t’ata ku munna yo kuli a eze bunde bwa na lata? Na talusize kuli: “Ni fumana mulao wa kuli ha ni lata ku eza se sinde, se si maswe ki sona se si li teñi ku na. Ni tabela Mulao wa Mulimu ka mutu wa mwahali; kono ni bona mulao usili mwa lilama za ka, o lwanisana ni mulao wa kutwisiso ya ka, mi u ni isa mwa butanga bwa mulao wa sibi, o li teñi mwa lilama za ka.”—Maroma 7:18, 19, 21-23.

Ao ki manzwi a muapositola Paulusi, a na ñozwi ibato ba lilimo ze 2,000 kwamulaho k’o, mi a talusa libaka batu ba ba si ka petahala ha ba fumana t’ata ku eza ze lukile. Ku kumalela kwa likuka ze lukile, sihulu ka nako ya litiko, ku tokwa kuli mutu a be ya tiile luli. Kacwalo lwa swanela ku buza kuli, Ki lifi libaka le lituna le lu swanela ku ezeza ze lukile?

Ha mu bone Mañolo mwa tolongosheza mafelelezo a mutu wa muzamao o lukile. Kwa Samu 37:37, 38, lu bala kuli: “U lemuhe mutu wa niti, u talime ya lukile; kakuli mafelelezo a mutu yo, ki kozo. Kono ba ba sa yi ka mulao ba ka fezwa hamoho; kwa mafelelezo, lusika lwa ba ba maswe lu ka yundiswa.” Liproverbia 2:21, 22 i lu taluseza kuli: “Ba ba eza niti ba ka yaha mwa naha, ba ba sa nyazahali ba ine ku yona. Kono ba ba maswe ba ka kauhelwa mwa lifasi, ba ba pila ka bupumi ba zwiswe mwateñi.”

Lisepiso ze hamoho ni lisepiso ze ñwi ze mwa Bibele niha li lu susueza ku ndongwama bupilo bo bu tabisa Mulimu, hasi zona luli ze tisa kuli lu eze ze lukile. Libaka le lituna le lu ezeza ze lukile li tomile fa taba ye ama libupiwa kaufela ze butali. Likande la luna le li tatama li tungunyuna taba yeo kuli ki ifi ni ku bonisa mo i lu amela.