Mu Lute Bana ba Mina Ku Alaba kwa Mikopano

BO PERLA ba kwa Mexico ba hupula kuli ha ne ba sa li fela kasizana, bom’a bona ne ba ba tusize ku itukisezanga likalabo ze kuswani za Tuto ya Tora ya ku Libelela. Kacenu le bo Perla se ba na ni mwan’a mushimani wa lilimo liketalizoho. Ba tusa cwañi mwan’a bona yo? Ba li: “Ni na ni ku itukiseza pili. Ha ni itukisezanga, ni batanga ku fumana paragilafu ya ka kona ku utwisisa mwanake, ya ka kona ku talusa ka manzwi a hae tota. Kihona cwale lu ka inela paragilafu yeo ya bizanga kuli ‘paragilafu ya ka.’ Ni mu kupanga ku talusa paragilafu yeo ka ku itusisa mitala ya lika za iponela ka zazi ni zazi. Kihona cwale lu ka kuta-kutela ku lundulula kalabo yeo. U swalanga nto ye likana ni maikrofoni kwa butuna ilikuli a zibe mwa ku yo swalela maikrofoni ha ka yo alaba. Ni ya tabile luli kakuli ha ku na mukopano o kona ku fela cwalo mwanake a sa alabi kamba ku yemisa lizoho. Hañata u yelanga muzamaisi pili mukopano u si ka kalisa kale ni ku yo mu taluseza paragilafu ya hae ya ketile.”

Bo Jens, maeluda mwa sikwata sa puo ya Sihindi, ba na ni bana ba babeli ba micaha, wa lilimo ze peli ni muhulwan’a hae wa lilimo z’e ne. Bo Jens ni ba ku bona ha ba itukiseza mukopano ni bana ba bona, ba itusisanga muezezo o ne ba itutile bo Jens kwa bashemi ba bona. Bo Jens ba li: “Lu ketanga likalulo ze ba ka kona ku utwisisa banana. Kihona cwale lu ka lika ku ba shashululela taba ye ambolwa kuli ki ifi kamba lisupo za yona ze tuna, ha lu felize ku eza cwalo kihona lu ka ba buza lipuzo ze ba ka yo kona ku alaba kwa mukopano wo. Hañata lu ikomokelanga fela ku utwa likalabo ze ba fanga ka manzwi a bona luli. Mutalusezo wa bona wa lisupo u bonisanga ze ba utwisisa luli. Kabakaleo likalabo za bona li lumbekanga Jehova luli mi ki poniso ya tumelo ya bona ku yena.”