Sikolo Se Si Luta Baituti ku Tusa Batu mwa Lifasi Kamukana

MWA liputeho za Lipaki za Jehova ze fitelela 98,000 ili ze mwa linaha ze fitelela 200, batu ba ba shutana-shutana ba sweli ku lutiwa ki Mulimu. Buka fo ku tomile lituto ze ba ituta ki Bibele, mi mulelo wa lituto zeo kikuli li ba tuse ku hula kwa moya ka ku ziba tato ya Mulimu ni ka ku ziba mwa ku i ezeza. Ba ba itutanga lituto zeo ba fumananga mipuzo ye mituna luli. Mi lituto ze ba itutanga, ba yo itutanga zona hape ni ba bañwi, ku lumelelana ni taelo ya Jesu Kreste ya ku tahisa balutiwa.—Mateu 28:19, 20.

Kwand’a lituto ze ba itutanga mwa liputeho za bona, Lipaki za Jehova ba na ni likolo ze ñata ze ipitezi. Sikolo sa Tuto ya Bukombwa ki se siñwi sa likolo zeo. Sikolo seo ne si ezizwe lwa pili ka October 1987 kwa Pittsburgh, Pennsylvania, mwa U.S.A. Sitopa sa pili ne si na ni baituti ba 24 ba ne ba ziba ku bulela Sikuwa. Ku zwa yona nako yeo, sikolo seo se si eziwa mwa lipuo ze 21 ili mwa linaha ze 43. Ka nako ye cwana, maeluda ni batanga ba bukombwa ba makwasha ba mwa linaha ze fitelela 90 ki kale ba kena sikolo seo. Baituti ha ba fezanga sikolo seo sa lisunda ze 8, ba lumelwanga ko ku na ni butokwi, kwa linaha za bona kamba za ba sili. Silimo sa 2005 si si ka fela kale, ne se ku na ni Lipaki za Jehova ba ba fitelela 22,000 ba ne ba se ba keni sikolo seo. Misebezi ye ne ba ezize mizwale bao ka ku ishuwa ilikuli ba pete za Mubuso ni kuli ba tuse ba bañwi i ba tahiselize  limbuyoti ze tuna.—Liproverbia 10:22; 1 Pitrosi 5:5.

Ku Itukiseza Ku Yo Kena Sikolo

Buñata bwa baituti ba, ba kupanga sibaka kwa misebezi ya bona kuli ba yo kena Sikolo seo sa Tuto ya Bukombwa. Ku eza cwalo ka linako ze ñwi ku t’ata. Mizwale ba babeli ba ne ba sebeza sina baluti mwa naha ya Hawaii, ne ba memilwe kuli ba yo kena sikolo seo mi ne ba na ni ku kupa sibaka kwa musebezi wa bona kuli ba ye kwa sikolo. Ka ku sepa kuli Jehova n’a ka ba tusa, bubeli bwa bona ba kupa sibaka kwa musebezi, ba talusa ni libaka ha ne ba bata ku yo kena sikolo seo ni bunde bwa sona. Bubeli bwa bona ne ba filwe sibaka sa ku yo kena sikolo.

Kono buñata bwa Lipaki ba ne ba kile ba kupa sibaka kwa misebezi ya bona kuli ba ye kwa sikolo seo ne ba bulelezwi kuli ha ne ba ka ya, ne ba ka zusiwa fa misebezi. Lipaki bao niha ne ba bulelezwi kuli misebezi ne i ka fela, ne ba iketezi ku lutiwa ki kopano ya Jehova. Mi hamulaho wa ku feza sikolo, ba bañwi ku bona ne ba kutiselizwe fa misebezi ya bona. Ka bukuswani lu kana lwa li, kuli mutu a kene sikolo seo, u swanela ku kupa sibaka kwa musebezi, ku kupa tuso ku Jehova ka tapelo, ni ku siya lika kaufela mwa mazoho a Jehova.—Samu 37:5.

‘Ba Lutilwe ki Jehova’

Lituto ze lutiwa mwahal’a lisunda ze 8 za sikolo seo ki lituto ze tungile za Bibele. Bana ba sikolo ba itutanga ka za mo ba swalisanezi batu ba Jehova ku eza tato ya hae ni ka za mo ba kona ku itusiseza hande Bibele ha ba li mwa bukombwa bwa mwa simu, ha ba li kwa mikopano ya puteho, kamba ha ba li kwa mikopano ye mituna.

Muzwale yo muñwi ya kile a kena sikolo seo n’a ñolezi muituti yo muñwi ya n’a si ka kena kale sikolo seo kuli: “Ni ku bulelela niti kuli u ka yo ituta lika za butokwa ze u si ka ziba kale. U ka utwisisa luli taluso ya liñolo le li li ‘ba lutilwe ki Mulena.’ Sikolo seo mukatumbi sa kona ku bupa ni ku kenisa pilu ya mutu ilikuli a likanyise mutala wa Jesu Kreste. Ha u ka yo kena sikolo seo, u ka ituta lika ze tuna ze u si ka ziba kale.”—Isaya 54:13.

Bakutazi, Balisana, ni Baluti

Ka nako ye, mizwale ba ba felize Sikolo sa Tuto ya Bukombwa ba belekela mwa linaha ze 117. Linaha zeo li kopanyeleza libaka za Atlantic, Caribbean, ni Pacific hamoho cwalo ni linaha ze ñata mo ku fumeneha mitai ya Lipaki za Jehova. Mitai i biha kuli bunde bwa lituto ze ba itutile baituti bao bu bonahalela mwa misebezi ya bona ya ku kutaza, ya ku lisa, ni ya ku luta. Lituto ze ba itutile li ba konisa ku itusisa hande Bibele ha ba li mwa bukombwa bwa mwa simu. (2 Timotea 2:15) Hape ha ba alaba lipuzo za batu mwa simu, ba itusisanga hahulu buka ya Reasoning From the Scriptures * mi ba susuezanga ni bahasanyi ba bañwi ba Mubuso ku eza nto ye swana. Tukufalelo ya mizwale ba ba felize sikolo seo i susueza ba bañwi mi misebezi ya bona i tiisa liputeho.

Maeluda mwa puteho ba na ni tohonolo ya ku ‘lisa mutapi,’ ili ku tusa ba bañwi kwa moya. (1 Pitrosi 5:2, 3) Eluda yo muñwi n’a bulezi cwana ka za tukiso yeo: “Lwa itebuha bakeñisa kuli mutai u lumanga mizwale ba ba lutilwe hande kuli ba to lu tusa ku lisa mutapi wa Mulimu.” Mutai o muñwi o kwa Upa wa Asia ni ona ne u ize: “Mizwale ba ba felize sikolo seo ba na ni hahulu mufelañeke. Ba belekanga ka t’ata mi b’a kutekiwa mwa liputeho. Ba itebuhiwa hahulu bakeñisa buikokobezo bwa bona, sishemo sa bona, ni cisehelo ya bona. Ba itombolanga ku ya kwa liputeho ze tokwa balisana ba nze ba tabile.” (Mafilipi 2:4) Banna ba ba cwalo ba katulusanga balumeli sina bona mi ba swanelwa ku babazwa.—1 Makorinte 16:18.

Ku tuha fo, bazamaisi ba Sikolo sa Tuto ya Bukombwa ba tusanga baituti ku ekeza kwa bukwala bwa ku bulela fa nyangela. Buñata bwa mizwale ba ba felize sikolo seo ili ba ba mamela  lituto ze ne ba itutile, ba itusiswanga fa mikopano ya mipotoloho ni ya likiliti. Muokameli wa mupotoloho yo muñwi n’a bulezi kuli mizwale ba ba felize sikolo seo ba fanga “lingambolo ze nde hahulu mi ba lutanga ka ku talusa hande litaba.”—1 Timotea 4:13.

Mwa naha ye ñwi ya mwa Africa, lituto kwa mikopano ya puteho ne li kalile ku utwahala hande hahulu kabakala Sikolo sa Tuto ya Bukombwa se ne si ezizwe mwateñi ni kabakala mizwale ba ne ba lumezwi kwateñi. Maeluda ba ba zwa kwa sikolo seo ba eza misebezi ya ku kutaza, ya bulisana ni ya ku luta, mi misebezi yeo i tiisa liputeho kwa moya.—Maefese 4:8, 11, 12.

Ku Okamela Hande Liputeho

Mwa libaka ze ñata ku tokwahala hahulu maeluda ni batanga ba bukombwa. Kambe kuli kwa liputeho ze ñwi ne ku si ka lumelwa ba ba felize Sikolo sa Tuto ya Bukombwa ne ku si ke kwa ba ni maeluda. Mi kona libaka buñata bwa ba ba keni sikolo seo ha ba lumelwanga ku yo sebeleza ko ku na ni butokwi.

Mitai ye miñata i talusa kuli mizwale b’a “ba ziba hande mo i belekela kopano,” “ba nga buikalabelo bwa bona ka butuna,” “ba tusa ba bañwi ku utwisisa kopano ya Jehova ni ku i kuteka,” mi “ba tiisa liputeho kwa moya.” Zeo kaufela za konahala bakeñisa kuli mizwale ba ba felize sikolo seo ba latelela ze ñozwi mwa Linzwi la Mulimu mi ha ba itingangi fa butali bwa bona beñi kamba ku ipona kuli ba talifile. (Liproverbia 3:5-7) Mizwale bao ba banga limpo za kwa moya kwa liputeho ze ba sebelezanga.

Ku Belekela kwa Kalulo ya Simu Ye kwahule

Ba ba ketiwanga ku ba mapaina ba ba ipitezi hamulaho wa sikolo seo, ba yo tusanga likwata ze kwahule kuli li be liputeho. Eluda ya kwa sibaka se si kwahule mwa naha ya Guatemala n’a itebuhile mizwale bao ka ku bulela kuli: “Ka lilimo ze 20, ne ni nze ni bilaela ka mo ne ni ka babalelela sibaka se situna se. Ne ni lapelanga kamita ka za teñi. Mizwale ba ba keni Sikolo sa Tuto ya Bukombwa ba lutilwe ku bulela hande, hape ba lutilwe ni litaba za kopano, mi n’a itebuha ku bona kuli kalulo ya simu se i tokomelwa hande.”

Mizwale bao b’a ziba mwa ku belekela hande mwa libaka ze tokwa kuli ba zamaye misipili ye mitelele fa malundu ilikuli ba fite kwa minzi ye kwahule. Ha ba fitile kwa minzi yeo, ba akufelanga ku toma likwata ni ku li onga-onga ku si na taba ni kuli ba bañwi ne ba palezwi ku eza cwalo. Ka mutala, eluda wa mwa naha ya Niger n’a kupile kuli a tusiwe ki mizwale ba ba felize sikolo seo bakeñisa kuli n’a ikutwa kuli bona ne ba ka eza musebezi o mutuna mwa sibaka sa n’a pila. Mwa minzi ye kwahule hahulu, kwa kona ku ba bunolo kuli muzwale wa likwasha a sebeze sina paina ya ipitezi kamba sina muokameli wa mupotoloho. Sina muapositola Paulusi, mizwale bao ba kopana ni ‘likozi mwa linuka, masholi, likozi mwa mahalaupa,’ ni makulanu, mi hape ba na ni ku iseza mamelelo liputeho ze ba sebeleza.—2 Makorinte 11:26-28.

Ku Tusa Mikulwani

Mañolo a susueza mikulwani ku hupula Mubupi wa bona. (Muekelesia 12:1) Mizwale ba ba felize Sikolo sa Tuto ya Bukombwa ili ba ba sebeza ka t’ata ki mitala ye minde kwa mikulwani ba Sikreste. Mizwale ba babeli ba ba felize sikolo seo ha ne ba tile fa puteho ye ñwi mwa naha ya United States, nako mukatumbi ye ne ba tandanga bahasanyi ba fa puteho yeo mwa bukombwa ne i minahanyizwe habeli. Hape palo ya mapaina ba kamita, kamba ya bashaeli ba kamita ba Mubuso, ne i ekezehile ku zwa fa 2 ku ya fa 11. Ku ezahezi honacwalo luli ni mwa liputeho ze ñata.

Ba ba felize sikolo seo ba susuezanga ni mizwale ba mikulwani kuli ba kene Sikolo sa Tuto ya Bukombwa. Mi ku eza cwalo ku susuelize mizwale ba bañwi ba ba si ka ba kale batanga ba bukombwa kuli ba be batanga ba bukombwa. Mutai wa kwa Netherlands u biza mizwale ba ba felize Sikolo sa Tuto ya Bukombwa kuli ki “mitala ya niti ye swanelwa ku likanyiswa ki  mizwale ba mikulwani ba ba bata ku ziba za ku eza mwa bupilo.”

Ku Sebeleza Liputeho za Lipuo Li Sili

Mwa linaha ze ñata, bahasanyi ba ikataza hahulu ku kutaza taba ye nde ka ku itusisa lipuo za batu bo ba kutaza ku bona. Hañata mizwale ba ba felize Sikolo sa Tuto ya Bukombwa ba itutanga lipuo ze ñwi ni ku yo sebeleza mwa libaka mo ku pila batu ba ba zwa kwa linaha li sili. Ka mutala, mwa naha ya Belgium, ku tokwahala bahasanyi ba Mubuso ba ba ziba lipuo ze bulelwa kwa naha ya Albania, Persia, ni Russia.

Liputeho ni likwata ze bulela lipuo li sili mwa linaha za Britain, Germany, Italy, Mexico, United States, ni mwa linaha ze ñwi, li tusiwa hahulu ki baokameli ba maeto, maeluda, ni batanga ba bukombwa ba ba felize Sikolo sa Tuto ya Bukombwa. Mutai wa naha ya Korea u talusa kuli “mizwale ba ba felize sikolo seo ba ba fitelela 200, ba tusa hahulu liputeho ni likwata ze bulela lipuo li sili.”

Ku Ikokobeza mwa Misebezi Ye Miñwi

Musebezi wa ba ba felize Sikolo sa Tuto ya Bukombwa haki ku sebeleza fela liputeho ni likwata ze itusisa lipuo li sili, kono hape ba sebezanga sina maeluda, batanga ba bukombwa, ni baokameli ba maeto. Ba bañwi ba yo sebelezanga kwa linaha ze ñwi, mwendi ku yo sebeleza mwa Likolo la Sebelezo le li na ni butokwi fa mutai. Fokuñwi ba ba na ni zibo ya ku yaha ba fiwanga musebezi wa ku yaha Mandu a Mubuso.

Ku sa tokwahala baokameli ba maeto ba ba ñata bakeñisa kuli palo ya liputeho ni ya mipotoloho mwa lifasi i sweli ya ekezeha. Mi kuli baokameli bao ba fumanwe, ku ketiwanga mizwale ba ba felize Sikolo sa Tuto ya Bukombwa kuli ba lutiwe musebezi wa maeto ka lisunda ze 10 mi hasamulaho mizwale bao ba sebezanga sina baokameli ba maeto ba ku tusa kamba ba kamita. Mizwale ba ba bat’o eza 1,300 ba ba felize sikolo seo ba sebeza sina baokameli ba maeto mwa linaha ze 97. Mwa naha ye ñwi ya Africa, 55 pesenti ya baokameli ba maeto ba felize Sikolo sa Tuto ya Bukombwa. Mi mwa naha ye ñwi ya Africa, 70 pesenti ya baokameli ba maeto ba felize Sikolo sa Tuto ya Bukombwa.

Buñata bwa ba ba felize sikolo seo kwa Australia, Canada, Europe, United States, ni kwa Upa wa Asia, ba lumezwi kwa linaha ze ñwi ze na ni hahulu butokwi. Mi ku eza cwalo ku tahisize kuli sikolo seo si tuse lifasi kamukana.

Ka Mwan’a hae, Jesu Kreste, Jehova u tahisize kuli ku be ni bakutazi, balisana, baluti, ni ba bañwi ba ba beya za Mubuso mwa sibaka sa pili mwa mazazi a maungulo a. Kana ku sa na ni sepo ya kuli palo ya batu ba Mulimu i ka ekezeha? Honacwalo fela! Kona libaka ha ku sa tokwahala hahulu kuli mizwale ba ba ineezi ba fite fa ku fiwa buikalabelo. (Isaya 60:22; 1 Timotea 3:1, 13) Sikolo sa Tuto ya Bukombwa si konisa maeluda ni batanga ba bukombwa ku eza ze ñata mwa bukombwa, mi si tahiseza bona ni ba bañwi mwa lifasi kamukana mupuzo o mutuna.

[Litaluso za kwatasi]

[Maswaniso a fa likepe 10]

Sikolo sa Tuto ya Bukombwa si beya za Mubuso mwa sibaka sa pili lifasi lamukana

[Maswaniso a fa likepe 13]

Kana mwa lata ku kena Sikolo sa Tuto ya Bukombwa kuli mu tuse ba bañwi?