Kana Muatuli wa Kona ku Elezwa?

SLADJANA, yo muñwi wa Lipaki za Jehova mwa Croatia, n’a bizizwe kwa kuta kwa taba ye ñwi ya za mali. A taha ka ku itahanela fapil’a muatuli. Kono ye ne ba zekisana ni yena n’a liyehile. Sladjana na nyolezwi hahulu ku fa bupaki, kacwalo batu kaufela ha ne ba sa libelela, a ba ni bundume bwa ku fa bupaki ku muatuli.

Sladjana a buza kuli: “Muñ’a ka, kana mwa ziba kuli hañi-hañi ha ku na ku ba ni baatuli ni likuta fa lifasi?” F’o, n’a talusa baatuli be lu ziba mwa miteñi ye.

Ka ku makala, muatuli a mu talima fela, a sa buleli se siñwi. Ka yona nako yeo mutu ye ne ba zekisana ni yena a fita, mi muzeko wa kalisa. Hamulaho wa puhisano Sladjana ha n’a yemi ku yo nyatela pampili ye ñwi, muatuli a inama ni ku mu buza ka ku shobota kuli: “Kana wa kolwa luli taba ye u sa zo ni bulelela, ya kuli hañi-hañi ha ku na ku ba ni baatuli ni likuta fa lifasi?”

Sladjana a alaba kuli “Eni, Muñ’a ka. N’a kolwa luli!”

Muatuli a buza kuli: “Ki bupaki mañi bo bu bonisa cwalo?”

Sladjana a alaba kuli: “Bu kona ku fumanwa mwa Bibele.”

Muatuli a talusa kuli n’a bata ku ipalela bupaki bo bu cwalo, kono n’a si na Bibele. Kacwalo Sladjana a sepisa kuli u ka mu fa Bibele. Lipaki ba potela muatuli yo, ba mu fa Bibele, mi ba mu susueza ku no b’anga ni tuto ya Bibele ya ka viki ni viki. Muatuli a lumela mi kapili-pili a ba yo muñwi wa Lipaki za Jehova.

Ka ku polofita, Samu 2:10 i bulela kuli: “Mina malena mu talife; ni mina baatuli ba lifasi mu utwe ku elezwa.” Kwa tabisa luli batu ba ba cwalo ha ba amuhela ka buikokobezo ketelelo ya Jehova ye lilato!

[Siswaniso se si fa likepe 32]

Sladjana ni muatuli