Jehova U Ka “Atulela Baketwa Ba Hae”

“Mulimu a si ke a atulela baketwa ba hae, ba ba huweleza ku Yena musihali ni busihu?”—LUKA 18:7.

1. Mu tiiswa ki bomañi, mi ki kabakalañi?

MWAHAL’A Lipaki za Jehova lifasi kaufela, ku na ni banna ni basali ba ba sebelelize Jehova ka busepahali ka lilimo-limo. Kana mwa ziba ba bañwi ba ku bona mizwale ni likaizeli bao? Esi mwendi mu hupula kaizeli yo muñwi wa musupali, ya n’a kolobelizwe kale-kale k’o kono ni ka nako ye ha shuti mikopano kwa Ndu ya Mubuso. Kamba mwendi mu hupula muzwale yo muñwi wa musupali ya zwelanga mwa simu hamoho ni puteho sunda ni sunda mi u ezize cwalo ka lilimo-limo a sa katali. Ki niti kuli ba bañata kwa mizwale ni likaizeli bao ne ba sa nahani kuli lu ka fita ni la kacenu le Armagedoni i si ka fita kale. Nihakulicwalo seo ha si si ka fokolisa sepo ya bona mwa lisepiso za Jehova kamba ku ba pelelwisa ku “tundamena ku isa kwa mafelelezo.” (Mateu 24:13) Tumelo ye tiile ye ba bonisize batanga ba Jehova ba ba sepahala bao ku si na ku li cwañi i tiisize puteho kaufela.—Samu 147:11.

2. Ki muinelo mañi o lu tomohisa pilu?

² Kono fokuñwi lu bonanga muinelo u sili. Lipaki ba bañwi ne ba itiisize mwa bukombwa ka lilimo-limo, kono hamulaho tumelo ya bona ku Jehova ne i fitile fa ku fokola, mi cwale ba tuhezi ku swalisana ni puteho ya Sikreste. Kwa lu tomohisa pilu luli ku bona kuli ba bañwi kwa balikani ba luna ba fulalezi Jehova, mi takazo ya luna ki ya kuli lu zwelepili ku tusa ‘ngu ni ngu ye latehile’ kuli i kute kwa mutapi. (Samu 119:176; Maroma 15:1) Nihakulicwalo, muinelo wo wa kuli ba bañwi ba zwelapili ku sepahala kono ba bañwi bona ba felelwa ki tumelo u zusa lipuzo. Ki nto mañi ye konisa Lipaki ba bañata ku zwelapili ku ba ni tumelo mwa lisepiso za Jehova hailif’o ba bañwi bona ba felelwa ki tumelo ya bona? Ki nto mañi y’a kona ku eza mañi ni mañi wa luna kuli a zwelepili ku kolwa kuli ‘lizazi la Jehova le lituna li sutelezi’? (Zefania 1:14) Ha lu nyakisiseñi nguli ye mwa buka ya Luka.

Temuso ku Ba Ba Pila ‘Mwan’a Mutu H’a Taha’

3. Ki bomañi sihulu ba ba kona ku tusiwa ki nguli ya mbelwa ni muatuli, mi ki kabakalañi?

³ Kwa Luka kauhanyo 18, lu fumana teñi nguli ya Jesu ya mbelwa ni muatuli. Nguli yeo ya swana ni ya munna wa mutundameti ye lu nyakisisize mwa tuto ye felile. (Luka 11:5-13) Nihakulicwalo, taba ye mwa Bibele mo ku fumaneha nguli ya mbelwa ni muatuli i supa sihulu ku ba ba pila ‘Mwan’a mutu h’a taha’ sina Mulena, ili nako ye ne kalile ka 1914.—Luka 18:8. *

4. Jesu n’a buleziñi pili a si ka kandeka kale nguli ye kwa Luka kauhanyo 18?

⁴ Pili a si ka kandeka kale nguli ya hae, Jesu n’a bulezi kuli ku taha kwa hae sina Mulena ne ku ka bonahala kai ni kai “sina lumonyi lwa pula ha lu monyeha, lu monyeha ku kala kwa neku le liñwi la lihalimu ku y’o fita ku le  liñwi.” (Luka 17:24; 21:10, 29-33) Nihakulicwalo, buñata bwa batu ba ba pila mwa “nako ya maungulo” ne ba si ke ba isa pilu kwa lisupo zeo ze iponahalela hande. (Daniele 12:4) Kabakalañi? Ka libaka le li swana ni le ne ba si ka utwela temuso ya Jehova batu ba mwa miteñi ya Nuwe ni ya Lota. Mwa miteñi yeo, batu ‘ne ba ca, ne ba nwa, ne ba leka, ne ba lekisa, ne ba cala likota, ne ba yaha mandu, mane la fita lizazi le ne ba yundisizwe.’ (Luka 17:26-29) Ne ba shwile bakeñisa kuli ne ba patehile hahulu ku eza misebezi ya bona ku fita ku isa pilu kwa ku eza tato ya Mulimu. (Mateu 24:39) Kacenu, batu ba patehile hahulu ni lika za bona mi ha ba boni kuli mafelelezo a lifasi le, le li maswe a fakaufi.—Luka 17:30.

5. (a) Jesu na file temuso ya hae ku bomañi, mi ki kabakalañi? (b) Ki kabakalañi ba bañwi ha ba felezwi ki tumelo ya bona?

⁵ Kacwalo, kwa iponelwa hande kuli Jesu n’a iyakatwa kuli mwendi balateleli ba hae ni bona ne ba ka yaululwa ki lifasi la Satani ni ku ‘kutela kwa lika ze ne ba siile kwamulaho.’ (Luka 17:22, 31) Mi seo luli ki sona se si ezahezi kwa Bakreste ba bañwi. Ka lilimo-limo, Bakreste bao ne ba libelezi lizazi leo Jehova n’a ka timeza lifasi le li maswe le. Kono bakeñisa kuli Armagedoni ha i si ka taha ka nako ye ne ba libelela, ba fitile fa ku zwafa. Ba tuhezi ku kolwa kuli lizazi la Jehova la katulo li fa ngo ni mulomo. Ba fokozi hahulu mwa bukombwa ni ku ipatehisa hahulu mwa misebezi ya bona mi ha ba sa na nako ya ku eza lika za kwa moya. (Luka 8:11, 13, 14) Mafelelezo ba ‘kutezi kwa lika ze ne ba siile kwamulaho.’ Ki bumai kwa butuna!

Butokwa bwa “Ku Lapela Kamita”

6-8. (a) Mu kandeke nguli ya mbelwa ni muatuli. (b) Jesu n’a talusize cwañi nguli yeo?

⁶ Lu kona ku ezañi he kuli lu zwelepili ku ba ni sepo ye tiile ya kuli lisepiso za Jehova li ka talelezwa luli? (Maheberu 3:14) Jesu n’a alabile puzo yeo hamulaho fela wa ku lemusa balutiwa ba hae kuli ba si ke ba kutela kwa lifasi le li maswe la Satani.

⁷ Luka u biha kuli Jesu “a ba bulelela nguli ya kuli ba swanezi ku lapela kamita, mi ba si ke ba zwafa.” Jesu n’a ize: “Ne ku na ni muatuli mwa munzi o muñwi ya n’a sa sabi Mulimu, a sa kuteki mutu. Hape mwa munzi wo, ne ku na ni musali ya shwezwi ki munn’a hae, ya n’a tahanga ku yena inz’a li: U ni atulele ku ya ni zekisa. A hana nako ye telele. Kih’a ipulelisa, a li: Niha ni sa sabi Mulimu, ni sa kuteki mutu, kakuli musali yo wa ni toliya, ni ka mu atulela, kuli a si ke a ni telanga ku t’o ni kataza.”

⁸ Ha s’a kandekile nguli yeo, Jesu a li: “Mu utwe s’a bulela muatuli ya si na niti. Mi Mulimu a si ke a atulela baketwa ba hae, ba ba  huweleza ku Yena musihali ni busihu, nih’a sa liyehile kwa ku ba utwela butuku? Na mi bulelela kuli u ka akufela ku ba atulela. Nihakulicwalo, Mwan’a mutu h’a ka taha, kikuli u ka fumana tumelo i li teñi mwa lifasi?”—Luka 18:1-8.

“U Ni Atulele”

9. Ki sisupo mañi se si mwa nguli ya mbelwa ni muatuli?

⁹ Sisupo se situna sa nguli ya Jesu sa ikutwalela hande. Ne si bulezwi ki yena mbelwa ni muatuli ka sibili ku beya cwalo ni Jesu. Mbelwa n’a ikupezi kuli: “U ni atulele.” Muatuli n’a ize: “Ni ka mu atulela.” Jesu n’a buzize kuli: “Mulimu a si ke a atulela baketwa ba hae?” Jesu hape n’a talusize kuli Jehova “u ka akufela ku ba atulela.” (Luka 18:3, 5, 7, 8) Kanti Mulimu u ka “atulela” lili baketwa ba hae?

10. (a) Batu ba Mulimu ne ba atulezwi lili mwa miteñi ya baapositola? (b) Batanga ba Mulimu kacenu ba ka atulelwa lili mi ikaba ka nzila ifi?

¹⁰ ‘Mazazi a ku kutiseza batu bubi bwa bona’ ha ne a fitile ka 70 C.E., Jerusalema ni tempele ya yona ne li sinyizwe. (Luka 21:22) Mwa miteñi ya cwale, batu ba Jehova ba ka shemubiwa ka ‘lizazi la Mulimu le lituna.’ (Zefania 1:14; Mateu 24:21) Ka lona lizazi leo, Jehova u ka ‘kutiseza ñalelwa ku ba ba kaleliswa’ batu ba hae, Jesu Kreste ha ka ‘nata ka koto ba ba sa zibi Mulimu, ni ba ba sa ipeyi kwatas’a Evangeli ya Mulena Jesu.’—2 Matesalonika 1:6-8; Maroma 12:19.

11. Jehova u ka ‘akufa ku atulela baketwa ba hae’ ka nzila ifi?

¹¹ Kono cwale manzwi a Jesu a kuli Jehova u ka ‘akufela ku atulela baketwa ba hae’ a talusañi? Linzwi la Mulimu li bonisa kuli “nih’a sa liyehile kwa ku ba utwela butuku,” Jehova ha na ku liyeha ku atula haiba nako ya hae ki kale i fita. (Luka 18:7, 8; 2 Pitrosi 3:9, 10) Mwa miteñi ya Nuwe, Munda ha ne u tile, ba ba maswe ne ba yundisizwe ku si na tiyeho. Mi mwa miteñi ya Lota, lihalimu ha ne li nelisize mulilo, ba ba maswe ne ba tanyezwi fa lifasi. Jesu n’a ize: “Ku ka ba cwalo ni mwa lizazi l’a ka bonahala Mwan’a mutu.” (Luka 17:27-30) Ni ka lona lizazi leo, ba ba maswe “ba ka tulukelwa ki sinyehelo.” (1 Matesalonika 5:2, 3) Kacwalo, lu swanela ku kolwa kuli Jehova h’a na ku liyehisa katulo ya lifasi la Satani nihaiba ka lizazi fela li li liñwi.

‘U Ka Ba Atulela’

12, 13. (a) Nguli ya Jesu ya mbelwa ni muatuli i lu lutañi? (b) Ki nto mañi ye lu kolwisa kuli Jehova u ka teeleza litapelo za luna ni ku lu shemuba?

¹² Nguli ya Jesu ya mbelwa ni muatuli i koñomeka litaba ze ñwi hape za butokwa. Jesu n’a talusize nguli yeo a li: “Mu utwe s’a bulela muatuli ya si na niti. Mi Mulimu a si ke a atulela baketwa ba hae?” F’o Jesu n’a sa bapanyi Jehova ku muatuli inge kuli n’a bonisa kuli Mulimu ni yena u ka eza balumeli ka nzila ye swana. Kono n’a luta balateleli ba hae mw’a inezi Jehova ka ku bonisa kuli muatuli wa fa lifasi wa shutana ni Mulimu. Ba shutana cwañi?

¹³ Muatuli wa mwa nguli ya Jesu n’a “si na niti” kono “Mulimu ki muatuli ya na ni niti.” (Samu 7:11; 33:5) Muatuli n’a si na taba ni ye kana ni mbelwa, kono Jehova yena u iyakatwa mañi ni mañi. (2 Makolonika 6:29, 30) Muatuli n’a sa lati ku tusa mbelwa yani, kono Jehova yena hasi mwa tabelela ku tusa ba ba mu sebeleza. (Isaya 30:18, 19) Tuto ye lu ituta fa ki ifi? Haiba muatuli ya si na niti yani n’a teelelize ku mbelwa ni ku mu atulela, kana Jehova h’a na ku teeleza kwa litapelo za batu ba hae ni ku ba shemuba?—Liproverbia 15:29.

14. Ki kabakalañi ha lu sa swaneli ku kakanya kuli lizazi la Mulimu la katulo la taha?

¹⁴ Kacwalo, ba ba sa kolwi kuli lizazi la Jehova la katulo li fitile ba bushize hahulu. Kabakalañi? Kakuli ka ku felelwa ki sepo ya  bona ya kuli ‘lizazi la Mulimu le lituna’ li atumezi, ba bonisize kuli ha ba kolwi kuli Jehova wa kona ku sepiwa kuli u ka taleleza lisepiso za hae. Kono ki mañi luli ya swanela ku kakanya Mulimu? (Jobo 9:12) Puzo ya butokwa ya swanela ku ipuza mañi ni mañi ki ya kuli, Kana ni ka zwelapili ku sepahala? Mi yeo luli ki yona taba ya n’a koñomekile Jesu ha n’a felize nguli ya hae ya mbelwa ni muatuli.

“Kikuli U Ka Fumana Tumelo Yeo I Li Teñi mwa Lifasi?”

15. (a) Jesu n’a buzize puzo mañi, mi ki kabakalañi? (b) Lu swanela ku ipuza puzo mañi?

¹⁵ Jesu n’a buzize puzo ye nganga moya ye li: “Mwan’a mutu h’a ka taha, kikuli u ka fumana tumelo yeo i li teñi mwa lifasi?” (Luka 18:8, NW, litaluso za kwatasi) Pulelo ya kuli “tumelo yeo” i bonisa kuli Jesu n’a sa amboli za tumelo kaufela, kono n’a bulela za tumelo yani ya n’a na ni yona musali wa mbelwa. Jesu n’a si ka alaba puzo yeo. N’a i buzelize ku tusa balutiwa ba hae ku tatuba tumelo ya bona beñi. Kana tumelo ya bona ne i fokola mi ne ba tuha ba kutela kwa lika ze ne ba siile kwamulaho? Kamba kana ne ba na ni tumelo ye swana ni ya mbelwa yani? Kacenu, lu lukela ku no ipuzanga ni luna kuli, ‘“Mwan’a mutu” u bona tumelo ye cwañi mwa pilu ya ka?’

16. Mbelwa wa mwa nguli n’a na ni tumelo ye cwañi?

¹⁶ Kuli lu kone ku to atulelwa ki Jehova, lu tokwa ku latelela mutala wa mbelwa yani. N’a na ni tumelo ye cwañi? Tumelo ya hae n’a i bonisize ka ku tundamena ku “tahanga ku [muatuli] inz’a li: U ni atulele.” Mbelwa yani n’a tundamezi ku kupa kuli a kone ku atulelwa ki munna yani ya n’a si na niti. Ka nzila ye swana, batanga ba Mulimu kacenu ba swanela ku ba ni sepo ye tiile ya kuli ba ka shemubiwa ki Jehova, niha ka bonahala ku liyeha hahulu ku fita mo ne ba nahanela. Mi ba swanela ku bonisa sepo ya bona mwa lisepiso za Mulimu ka ku tundamena ku lapela—ee ka ku “huweleza ku Yena musihali ni busihu.” (Luka 18:7) Mane Mukreste ha n’a ka tuhela ku kupa kuli a shemubiwe ki Mulimu, n’a ka bonisa kuli u felezwi ki sepo ya hae ya kuli Jehova u ka lamulela batanga ba hae.

17. Ki kabakalañi ha lu swanela ku tundamena ku lapela ni ku kolwa kuli lu ka shemubiwa mwa lizazi la Jehova la katulo le li taha luli?

¹⁷ Ku nyakisisa lishutano ze mwahal’a mbelwa yani ni luna ku ka lu tusa ku lapelanga ka ku tundamena. Ha mu nyakisise lishutano zeo. Mbelwa yani n’a tundamezi ku yanga ku muatuli niha ne ku si na ya n’a mu susuezanga ku eza cwalo, kono luna Linzwi la Mulimu li lu susueza kuli lu “tundamene mwa ku lapela.” (Maroma 12:12) Mbelwa yani n’a si na sepo ya kuli muatuli n’a ka mu atulela, kono luna Jehova u lu sepisize kuli u ka lu shemuba luli. Ka mupolofita wa hae, Jehova n’a ize: “[Pono] ha i ka liyeha, u i talimele, kakuli i ka bonahala; mi ha i na ku liyeha.” (Habakuki 2:3; Samu 97:10) Mbelwa yani n’a si na mutu wa ku mu kupela ku muatuli. Kono luna lu na ni mutusi ya m’ata, yena Jesu ya ‘inzi kwa lizoho la bulyo la Mulimu,  ku lu lapelela.’ (Maroma 8:34; Maheberu 7:25) Kacwalo, haiba mbelwa yani ku si na taba kuli n’a li mwa muinelo o t’ata cwañi, n’a tundamezi ku tahanga ku muatuli kuli a mu atulele, kana ha lu swaneli ku kolwa ka ku tala kuli lu ka shemubiwa mwa lizazi la Jehova la katulo le li taha luli?

18. Tapelo i kona ku tiisa cwañi tumelo ya luna ni ku lu tusa ku t’o shemubiwa ki Mulimu?

¹⁸ Nguli ya mbelwa i lu lutile kuli ku na ni swalisano mwahal’a tapelo ni tumelo ni kuli ku tundamena ku lapela ku ka tiisa tumelo ya luna. Kono f’o ha ku talusi kuli ku bonisa fela kuli lu balapeli ba batuna ku ka lu tibela ku felelwa ki tumelo ya luna. (Mateu 6:7, 8) Ha lu lapela ka libaka la kuli lu lemuhile kuli lu itingile ku Mulimu, fohe tapelo ya luna i ka lu suteleza ku Mulimu mi i ka tiisa tumelo ya luna. Mi bakeñisa kuli tumelo ya tokwahala kuli lu kone ku punyuha, ki lona libaka he Jesu ha n’a susuelize balutiwa ba hae kuli “ba swanezi ku lapela kamita, mi ba si ke ba zwafa.” (Luka 18:1; 2 Matesalonika 3:13) Ki niti kuli ku taha kwa ‘lizazi la Mulimu le lituna’ ha ku si ka itinga fa litapelo za luna—lizazi leo li ka taha ibe kuli lwa li lapelela kuli li tahe kamba kutokwa. Kono kuli lu to shemubiwa ni ku to punyuha ndwa ya Mulimu, ha ku na mo kuñwi kwand’a ku ba ni tumelo ni ku ipuluka ni ku tundamena ku lapela.

19. Lu kona ku bonisa cwañi kuli lu na ni sepo ye tiile ya kuli Mulimu ‘u ka atulela baketwa ba hae’?

¹⁹ Sina ka mo se lu bonezi, Jesu n’a buzize kuli: “Mwan’a mutu h’a ka taha, kikuli u ka fumana tumelo yeo i li teñi mwa lifasi?” Ki ifi kalabo kwa puzo yeo ye nganga moya? Kwa wetulusa hakalo ku ziba kuli bolule-lule ba batanga ba Jehova ba ba sepahala lifasi ko li ya ko li kuwa ba sweli ku bonisa ka litapelo za bona, ka pilu-telele ya bona, ni ka tundamo ya bona kuli ba na ni tumelo ye cwalo luli! Kacwalo, puzo ya Jesu lu kona ku i alaba kuli, ee, tumelo i teñi kacenu mwa lifasi! Mi ku si na taba ni matata e lu tahelwa mwa lifasi la Satani le, lu na ni sepo ye tiile ya kuli Mulimu ‘u ka atulela baketwa ba hae.’

[Litaluso za kwatasi]

Kana Mwa Hupula?

• Ki kabakalañi Bakreste ba bañwi ha ba felezwi ki tumelo ya bona?

• Ki kabakalañi ha lu swanela ku kolwa kuli lu ka shemubiwa mwa lizazi la Jehova la katulo le li taha?

• Ki kabakalañi ha lu swanela ku tundamena ku lapela?

• Ku tundamena ku lapela ku ka lu tibela cwañi ku felelwa ki tumelo ya luna?

[Lipuzo za Tuto]

[Siswaniso se si fa likepe 26]

Nguli ya mbelwa ni muatuli i lu luta tuto mañi?

[Maswaniso a fa likepe 29]

Bolule-lule kacenu ba na ni sepo ye tiile ya kuli Mulimu ‘u ka atulela baketwa ba hae’