Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Kiñi se si kona ku mi tusa muta yo muñwi mwa lubasi lwa mina a fulalela Jehova?

Mu ikahe isali mina ni ku yaha bafi kamba bafi ba ba sa zwelapili ku sepahala mwa lubasi lwa henu. Mu tukufalelwe misebezi ya kwa moya. Mu ifane ku tusa ba bañwi. Mu si felelwi ki sepo ya kuli wahenu u ka kuta. Mu tokolomohe ku ipa mulatu. Mu amuhele tukiso ya Mulimu ya kalimelo, mi mu bulele maikuto a mina kwa balikani.—9/1, makepe 18-21.

• Ki lifi lisupo ze peli za mwa Mañolo ze lu tusa ku bona kuli lu pila mwa “mazazi a maungulelo”?

Bibele ne i polofitile za likezahalo ze ne ka ezahala mwa nako ya “ku fela kwa lifasi.” (Mateu 24:3, 7, 8; Luka 21:11) Hape i talusa za licinceho ze ama mikwa ni likezo za batu ba mwa “mazazi a maungulelo.” (2 Timotea 3:1-5) Mi mane taba ye nde ya mubuso ne i ka kutazwa ka nako ye swana yeo.—9/15, makepe 4-6.

• Puteho i tokwa ku ezañi haiba Mukreste ya na matisa mota a ba mwa kozi ya fa mukwakwa ye bulaisisa batu ba bañwi?

Maeluda ba ba batisisa taba yeo ba kana ba lemuha kuli mumatisi wa mota ha na mulatu wa ku sulula mali bakeñisa kuli ne ku si na mwa na ka ezeza kuli a kone ku pima kozi yeo ye tahisize lifu. Kono haiba ku fumaneha kuli mutu yo u na ni mulatu wa ku sulula mali mi a bonisa kuli u bakile, u ka fiwa kelezo ye swanela ya mwa Mañolo mi ha na ku ba ni buikalabelo mwa puteho.—9/15, likepe 30.

• Ki kabakalañi zwelopili ye ezwa ku za sayansi ha i sa koni ku tusa batu ku pila ku ya ku ile?

Ku na ni basayansi ba ba sweli ku bata mukwa wa ku shangela ka ona butelele bwa bupilo bwa batu inge cwalo ku ezisa kuli liselusi za mubili li si ke za lisela ku ikabanga kamba ku itusisa liselusi za mutu za sihozo kuli ba bupe fateñi lilama za mubili ze swana luli ni lilama za mubili wa hae. Kono Bibele i bonisa kuli sitabelo sa Jesu sa tiululo ki yona fela nzila i nosi yeo batu ba kona ku fumana ka yona bupilo bo bu sa feli.—10/1, makepe 3-5.

•Kana mutapelo wa sizo sa Majuda ne u supa kwa kolobezo ya Bakreste?

Batili. Majuda ne ba na ni mukwa wa ku ikenisa ka ona ka sizo, ili mukwa o ne u sa tokwahali mwa kolobezo ya Joani. Ku ikenisa ko ne ku tokwahala mwa Mulao wa Mushe ne ku ezwanga hañata-ñata, kono kolobezo ye ba kolobezwa ka yona Bakreste i ezwanga fela hañwi.—10/15, makepe 12-13.

• Sikolo sa Tuto ya Bukombwa ki nto mañi?

Ki sikolo sa lisunda ze 8 se si lukiselizwe maeluda ba makwasha mwa puteho ni batanga ba bukombwa ba ba li makwasha ili ba ba kona ku lumwa ku yo sebeleza mwa libaka mo ku na ni butokwi. Ba kana ba lumelwa ku yo sebeleza mwa puteho ye ne ba zwa ku yona, kamba ko kuñwi fela mwa naha ya habo bona, kamba mane ku lumelwa kwa naha i sili.—11/15, makepe 10-11.

• Antikreste ya bulezwi kwa 1 Joani 2:18; 4:3 ki nto mañi kamba u talusa bomañi?

Linzwi la antikreste li talusa bote ba ba hanyeza Kreste kamba ba ba puma batu kuli ki bona Kreste kamba kuli ki bayemeli ba hae. Manzwi a Jesu ni Joani a bonisa kuli antikreste ki sikwata sa batu ba bañata ba ba hasanya lituto za buhata za bulapeli ni ku hanyeza Mubuso wa Mulimu.—12/1, makepe 4-6.