Lipuzo ze zwa kwa Babali

Ku swaiwa ko ku bulezwi kwa Sinulo 7:3 ki kufi?

Sinulo 7:1-3 i li: ‘Na bona mangeloi a mane, a yemi kwa maneku a mane a lifasi, [“anz’a sweli ka t’ata mioya ye mine ya lifasi,” NW] kuli ku fuka kwa moya ku tokwahale mwa lifasi, ni mwa liwate, nihaiba mwa likota kaufela. Na bona lingeloi le liñwi le li kambama kwa Upa, li sweli nombolo ya Mulimu Ya-Pila; la huweleza, ka linzwi le lituna, mangeloi a mane a n’a filwe mata a ku sinya lifasi ni liwate; la li: Mu si ke mwa sinya lifasi ni liwate, nihaiba likota, ku fitela ha lu swaile batanga ba Mulimu wa luna, fa lipata za bona.’

“Ñalelwa ye tuna” i ka kalisa “mioya ye mine” ha i ka lukululwa, ili ku talusa ku sinyiwa kwa bulapeli bwa buhata ni lifasi kaufela le li maswe le. (Sinulo 7:14) “Batanga ba Mulimu wa luna” ki banyani ba Kreste ba ba tozizwe fa lifasi. (1 Pitrosi 2:9, 16) Kacwalo, bupolofita b’o bu bonisa kuli ku swaiwa kwa banyani ba Kreste ku ka be ku petahalile ñalelwa ye tuna ha i ka tumbuka. Niteñi, litimana ze ñwi za mwa Bibele li bonisa kuli ku na ni ku swaiwa kwa batoziwa kwa makalelo. Kacwalo, fokuñwi lu bulelanga ka za ku swaiwa kwa makalelo ni ku swaiwa kwa mafelelezo. Ku swaiwa kwa makalelo ku shutana cwañi ni ku swaiwa kwa mafelelezo?

Ha lu nyakisiseñi mwa n’a swaelwanga mañolo kwaikale ni libaka ha n’a swaiwanga. Sitiisiso ne si itusiswanga kwa ku swaya nkwana ya lizupa mo ne ku beiwanga mañolo. Liswayo ne li bonisanga libizo la muñ’a liñolo kamba situlo sa hae.—1 Malena 21:8; Jobo 14:17.

 Paulusi n’a talusize kuli ku toziwa ka moya o kenile ki muhato wa nga Mulimu wa ku swaya batoziwa. N’a ize: ‘Ya lu tiisa ni mina ku Kreste, Ya lu tozize, ki Mulimu; ki Yena hape ya lu swaile nombolo, ya lu file swalele ya Moya mwa lipilu za luna.’ (2 Makorinte 1:21, 22) Kacwalo, Jehova u toza Bakreste bao ka moya wa hae o kenile ilikuli a bonise kuli ki ba hae.

Kono batoziwa ba swaiwanga habeli. Ku swaiwa kwa bona kwa makalelo ku shutana ni ku swaiwa kwa bona kwa mafelelezo (1) ka mulelo wa kona ni (2) ka nako ye ku eziwa. Ku swaiwa kwa makalelo ku eziwa ka mulelo wa ku keta mutu yo munca ya ekezwa kwa palo ya Bakreste ba ba tozizwe. Ku swaiwa kwa mafelelezo kona ku ezezwa ku koñomeka kuli mutu yo ya ketilwe ni ku swaiwa u bonisize luli kuli wa sepahala. Konji ka nako yeo ya ku swaiwa kwa mafelelezo, kihona mutoziwa yo a ka swaelelwa ‘fa pata,’ ili ku mu zibahaza ka ku ikolwisisa kuli ki ‘mutanga wa Mulimu’ ya likilwe ni ya sepahala. Ku swaiwa kwa mafelelezo k’o kona ko ku bulezwi mwa kauhanyo 7 ya Sinulo.—Sinulo 7:3.

Ka za nako ya ku swaiwa kwa makalelo, muapositola Paulusi n’a ñolezi Bakreste ba ba tozizwe kuli: ‘Mu inzi ku yena isamba mu utwa Linzwi la niti, yona Evangeli ya ku piliswa kwa mina; mi hape ha mu se mu lumezi ku yena, mu swailwe nombolo ka Moya o Kenile o n’o sepisizwe batu.’ (Maefese 1:13, 14) Bibele i bonisa kuli hañata Bakreste ba kwa makalelo ne ba swaiwanga hamulaho fela wa ku utwa taba ye nde ni ku lumela ku Kreste. (Likezo 8:15-17; 10:44) Ku swaiwa k’o ne ku bonisa kuli ne ba amuhezwi ki Mulimu. Kono ne ku sa bonisi kuli Mulimu u ba amuhelelezi. Kabakalañi?

Paulusi n’a bulezi kuli Bakreste ba ba tozizwe ba swailwe “bakeñisa lizazi la ku liululwa.” (Maefese 4:30) Seo si bonisa kuli ku fitanga lilimo ze ñata ku zwa fa lizazi la ku swaiwa kwa makalelo. Batoziwa ba tokwa ku zwelapili ku sepahala ku zwa fa lizazi la ku swaiwa kwa bona ka moya o kenile ku isa kwa “lizazi la ku liululwa” kwa bona kwa mibili ya bona ya nama—fo kikuli, ku fitela lifu la bona. (Maroma 8:23; Mafilipi 1:23; 2 Pitrosi 1:10) Kacwalo, ne li kwa mafelelezo fela a bupilo bwa hae Paulusi ha n’a konile ku bulela kuli: “Ni fitile fa mafelelezo a nzila ya ka, ni bulukile tumelo; mi cwale kuwani ya bulena, ya Ku Luka, i beezwi na.” (2 Timotea 4:6-8) Hape, Jesu n’a bulelezi puteho ya Bakreste ba ba tozizwe kuli: “[Mu] sepahale ku isa kwa lifu, mi ni ka [mi] fa kuwani ya bulena ya bupilo.”—Sinulo 2:10; 17:14.

Linzwi la “kuwani” hape li bonisa kuli ku fitanga nako mwahal’a ku swaiwa kwa makalelo ni ku swaiwa kwa mafelelezo. Kabakalañi? Kwaikale, mumati wa mwa siyano ya winile n’a fiwanga kuwani. Kuwani yeo n’a sa koni ku i fiwa ka ku kena fela mwa siyano. N’a na ni ku mata ku isa kwa mafelelezo a siyano. Ka ku swana, Bakreste ba ba tozizwe ba na ni ku tundamena ku isa kwa mafelelezo a bupilo bwa bona—ili ku zwa fa ku toziwa kwa bona kwa makalelo ku isa kwa ku toziwa kwa bona kwa mafelelezo—kihona ba ka fiwa kuwani ya bupilo bwa ku sa shwa kwa lihalimu.—Mateu 10:22; Jakobo 1:12.

Bakreste ba ba tozizwe ba ba sa li teñi ili ba ba swailwe lwa pili ba ka swaiwa lili lwa mafelelezo? Ba ba sa pila fa lifasi ba ka swaiwa “fa lipata za bona” pili ñalelwa ye tuna i si ka tumbuka kale. Mioya ye mine ya ñalelwa ha i ka lukululwa, bote ba Isilaele wa kwa moya ba kabe ba swailwe ku swaelelwa, nihaike ba sikai ku bona ba ka zwelapili ku pila hasamulaho ilikuli ba feleleze bupilo bwa bona bwa fa lifasi.