Munna Ya Na Lata Bupilo ni Batu

BO DANIEL SYDLIK, ba ne ba sebelize ka nako ye telele mwa Sitopa Se Si Etelela sa Lipaki za Jehova, ne ba felize bupilo bwa bona bwa fa lifasi la Bubeli, la 18 April, 2006. Ne ba na ni lilimo ze 87 mi ba sebelize sina yo muñwi wa lubasi lwa Betele lwa kwa Brooklyn, mwa New York, ibata iba ka lilimo ze 60.

Muzwale Dan, ka mwa na bizezwanga ki mizwale ba ne ba twaelani hahulu ni yena, na tile fa Betele ka 1946. Pili ba si ka taha kale fa Betele, ne ba sebelize sina paina ya ipitezi kwa California mi hape ba kile ba lengiwa mwa tolongo ka nakonyana fo ne i kolotela Ndwa ya Lifasi ya Bubeli bakeñisa buikambuso bwa bona bwa Sikreste kwa litaba za lifasi. Ze ne ba ipumani ku zona ka yona nako yeo li talusizwe hande-nde mwa likande la bupilo bwa bona le ne li ñozwi mwa The Watchtower ya June 1, 1985, le li na ni toho ya taba ye li: “How Priceless Your Friendship, O God!”

Muzwale na zibahala ka ku ba mutu ya ikokobeza, ni ya silikani. Ha ne ba zamaisanga liñolo la zazi kwa lubasi lwa Betele, moya wa bona o munde ni lilato la bona la ku lata bupilo ne li boniswanga ka manzwi a ne ba kalisanga ka ona kamita, a’ li: “Ki hande kuli lwa pila kuli lu sebeleze Mulimu wa niti ni ya pila.” Ha ne ba bulelanga kwa nyangela, ne ba susuezanga ba bañwi kuli ba bonise ona moya o swana wo, ba kile ba fa lingambolo ze na ni litoho za litaba ze cwale ka: “Ba Na ni Tabo Batu Bao Jehova A Li Mulimu wa Bona,” “Ku Bonisa Tabo ya Jehova,” “Mu Zwisezepili Mata A Moya wa Mulimu,” ni “Ze Nde Li Kwapili.”

Ka 1970, Muzwale Sydlik a nyala bo Marina Hodson, ba ne ba zwa kwa England. Bo Sydlik ne ba talusanga kuli ba ku bona bao ne ba li “tuso ye ne zwa ku Mulimu.” Ba sebelelize Jehova hamoho ka lilimo ze 35.

Ka lilimo za n’a li fa Betele, Muzwale Sydlik u sebelize mwa makolo a shutana-shutana, a kopanyeleza mwa lihatisezo (printery) ni Likolo la Buñoli (Writing Department). Hape ne ba sebelize mwa ndu ya moya ya Watchtower ya WBBR. Cwale ka November 1974, ba ketiwa ku ba mwa Sitopa Se Si Etelela mi hamulaho ba sebeleza cwalo ni mwa katengo ka Basebelezi ni katengo ka Buñoli.

Ka lilimo ze fitelela 30, musebelezo wa Muzwale Sydlik mwa Katengo ka Basebelezi ne u boniswa ka lilato la hae le lituna la ku lata batu. Ne ba susuelize ba bañata ka linzwi la bona le li tuuma, hañata ne ba bonisanga butokwa bwa tohonolo ye tuna ye lu na ni yona ya ku sebeleza Jehova. Ka nako kaufela ne ba koñomekanga kuli tabo sakata ha i si ka itinga fa lika za kwa mubili kono i itingile fa silikani sa luna ni Jehova ni mo lu ngela bupilo.

Nihaike kuli Muzwale Sydlik u liliwa meto telee ki lubasi lwa Betele, kono mutala wa hae sina mutu ya na lata hahulu bupilo ni batu u ka zwelapili ku tusa bote fa Betele. Luna ni sepo ya kuli u kopanyelizwe kwa batu ba ba bulezwi kwa Sinulo 14:13 kuli: “Ba na ni mbuyoti bafu ba ba shwela ku Mulena, ku zwa cwale; e, ku bulela Moya, kakuli ba y’o pumula kwa misebezi ya bona; kakuli misebezi ya bona ya ba latelela.”