Mwa Kona ku Tiyela Matata

MWAHAL’A linako ze t’ata ze, batu ba bañata ba sweli ku tiyela matata a matuna. Kono nto ye tusa Bakreste ku tiyela matata ao ki ku lata Mulimu ni ku pila ka likuka za hae. Ka nzila ifi? Kalabo lu kona ku i fumana mwa nguli ya n’a kandekile Jesu Kreste. N’a bapanyize balutiwa ba hae ba ba ipeya ku utwa ku “munna ya na ni ngana, ya yahile ndu ya hae fa licwe.” Jesu n’a ize: “Pula ya nela, mikokolombwa ya yepeha, ni ñuli ya shelumukela ndu yeo; mi ha i si ka wa, kakuli n’e tomilwe fa licwe.”—Mateu 7:24, 25.

Mu lemuhe kuli munna wa mwa nguli yeo niha na ni ngana, u sa talimana ni butata—bo bu cwale ka pula ye nela ni ñuli. Kacwalo, Jesu n’a si ka bonisa kuli balutiwa ba hae ne ba ka banduka matata kaufela ni ku ikola bupilo bwa kozo nako kaufela. (Samu 34:19; Jakobo 4:13-15) Kono n’a bulezi kuli batanga ba Mulimu ba ba sepahala ba kona ku itukiseza ku talimana ni makayamana a cwalo ni ku a tiyela.

Jesu n’a kalisize nguli ya hae cwana: ‘Mutu kaufela ya utwa manzwi a ka ao, mi a ya ka ona, ni ka mu likanyisa ni munna ya na ni ngana, ya yahile ndu ya hae fa licwe.’ Jesu fo n’a sa buleli ka za ku yaha mandu luli, kono n’a bulela ka za mwa ku pilela sina Mukreste. Ba ba mamela manzwi a Kreste ba banga ni kutwisiso ye tungile mi ba ezanga likatulo ze nde. Ba pila bupilo bwa bona ka ku latelela lituto za Kreste ze tiile inge licwe. Mane, licwe leo la swanisezo ha li fumanehi fahalimu. Munna wa mwa swanisezo yeo n’a na ni ku ‘yepa hahulu’ kuli a li fumane. (Luka 6:48) Ka nzila ye swana, balutiwa ba Jesu ba zwelapili ku ikataza hahulu ku ba ni mikwa ye inelela ili ye ba suteleza hahulu ku Mulimu.—Mateu 5:5-7; 6:33.

Ku ezahalangañi muta balateleli ba Jesu ba talimana ni matata a matuna a’ lika ku tiya kwa bona? Ku latelela kwa bona lituto za Kreste ni ku ba ni mikwa ya Sikreste ku ba tusanga ku tiya ha ba talimana ni matata ao, mi sa butokwa ni ku fita kikuli ku eza cwalo ku ka ba tusa ku tiya mwahal’a ndwa ya Armagedoni, ye fa ngo ni mulomo. (Mateu 5:10-12; Sinulo 16:15, 16) Kaniti, batu ba bañata ba sweli ku tiyela litiko ze tuna ka ku latelela lituto za Kreste. Ni mina mwa kona ku eza cwalo.—1 Pitrosi 2:21-23.