Bo Munna ni Musali—Ba Lukiselizwe ku Pila Hamoho

KU ZWA fela kwa simuluho, bo munna ni musali ba na ni takazo ya ku pila hamoho. Ki Mulimu ya tahisize cwalo. Jehova na boni kuli ne ku si ka luka kuli munna wa pili, Adama, a zwelepili ku pila a nosi. Kacwalo Mulimu a mu ezeza “mulikani ya swana ni yena.”

Jehova kiha lobaza Adama mwa buloko bo butuna, mi a zwisa likupo ku yena ni ku “bupa musali ka likupo l’a zwisize ku Adama, mi a mu tisa ku Adama.” Adama na nyakalalile hahulu ha bona musali yo ya na bupile Jehova kuli mane a li: “Cwale, yena yo, ki lisapo la masapo a ka, ki nama ya nama ya ka.” Eva, ne li musali yo munde, ya petehile. Mi Adama, ni yena na petehile, mi ne li munna ya na swanela ku kutekiwa. Ne ba lukiselizwe ku pila hamoho. Bibele i li: “Kamukwaocwalo munna u ka tokolomoha ndat’ahe ni m’ahe mi u ka kumalela musal’a hae; mi ba ka ba nama i li ñwi fela.”—Genese 2:18-24.

Kono kacenu, mabasi a sweli a shandauka, banna ni basali ba sweli ba nyandisana kamba ku bonisa moya wa buitati. Moya wa lilakana o ba bonisa bo munna ni musali u tisize kuli ba si ke ba lumelelana. Zeo kaufela za lwanisana ni mulelo wa Mulimu kwa neku la banna ni basali. Munna na bupezwi kuli a pete musebezi wa butokwa fa lifasi. Musali na bupezwi ku peta kalulo ye ipitezi ili ya butokwa, ya ku tusana ni munn’a hae. Ne ba swanela ku belekisana hamoho ka kozo. Ku zwa kwa simuluho, banna ni basali ba ba saba Mulimu ba likile ku peta ka busepahali misebezi ya ba file Jehova, mi ku eza cwalo ku ba tiselize tabo ni mwangalwa. Ki ifi yona misebezi yeo mi lu kona ku i peta cwañi?

[Siswaniso se si fa likepe 3]

Bo munna ni musali ne ba bupezwi ku peta misebezi ya butokwa ye ba filwe ki Mulimu