Lipuzo Ze Zwa kwa Babali

Mubuleli na talusañi ha na ize “kwa banna ba ba eza lule ni fumani munna a li muñwi” kono kwa “basali kaufela ha ni si ka fumana musali a li muñwi”?—Muekelesia 7:28.

Kuli lu utwisise hande manzwi a tahile ka moya wa Mulimu ao, pili lu swanela ku utwisisa mwa ngela basali Mulimu. Bibele i talusa Ruti mukwenyan’a Naomi ya na li mumba kuli ki “musali ya na ni mikwa ye minde.” (Ruti 3:11) Ka ku ya ka Liproverbia 31:10, musali yo munde “ki wa butokwa hahulu ku fita lipelela.” Cwale kanti Mulena Salumoni wa Isilaele wa kwaikale na talusañi ha na bulezi kuli: “Kwa banna ba ba eza lule ni fumani munna a li muñwi; kono kwa basali kaufela ha ni si ka fumana musali a li muñwi”?

Taba kaufela mo li fumaneha liñolo leo i bonisa kuli mwa miteñi ya Salumoni, basali ba bañwi ne ba si na mizamao ye minde. (Muekelesia 7:26) Ku bonahala kuli nto ye tuna ye ne tisize cwalo ki kukuezo ya basali ba bazwahule ba ne ba lapela Baale. Mane nihaiba yena Mulena Salumoni na hapilwe ki kukuezo ya basali ba hae ba bazwahule. Bibele i bonisa kuli Salumoni na bile ni ‘bafumahali ba ba eza mianda ye 7; a nga ni liendi ze eza mianda ye milalu; basali ba hae bao ba keluseza pilu ya Salumoni’ kwa ku lapela milimu ya buhata. (1 Malena 11:1-4) Mizamao ya banna ni yona ne li ye maswe kakuli kwa banna ba ba eza lule ne ku kona fela ku fumaneha a li muñwi ya lukile. Mi Salumoni na unguzi ka ku bulela kuli: “Se ni lemuhile fela ki se: Mulimu u ezize mutu kuli ibe ya lukile; kono batu ba batile miitatulo ye miñata.” (Muekelesia 7:29) Linzwi la kuli mutu kamba batu le li itusisizwe mwa timana ye ha li talusi fela banna kono li talusa batu kaufela ibe banna kamba basali. Kacwalo manzwi a’ kwa Muekelesia 7:28 a swanela ku ngiwa kuli na ama kwa mizamao ya batu ba ne ba pila mwa miteñi ya Salumoni.

Kono hape timana ye ya kona ku ba ni taluso i sili. I kona ku ba ni taluso ya bupolofita, kakuli kwa li ku simwa ha ku si ka fumaneha kale musali ya ipeile ku Jehova ka ku tala. Kono ku kile kwa ba ni munna ya na ipeile ku Jehova ka ku tala, yena Jesu Kreste.—Maroma 5:15-17.

[Siswaniso se si fa likepe 31]

“Kwa banna ba ba eza lule ni fumani munna a li muñwi”