Musupali Ya Na ni Mulelo mwa Bupilo

BO ELIN ki ba bañwi ba basupali ba 60 ba ne ba li fa mukoloko wa cwanoñu fa wa basupali ba ba kwanisize lilimo ze 105 kamba mane ku fitelela mwa naha Sweden. Bo Elin bona ba kwanisize lilimo ze 105. Niha ba pila mwa ndu mo ku babalelwa basupali, ba sa kona ku zwelapili ku sebeza sina Paki ya Jehova ye tukufalezwi, ili musebezi o ne ba kalile lilimo ze fitelela 60 kwamulaho k’o.

Ha ba kutaza ku ba bañwi, bo Elin ba likanyisanga mutala wa na tomile muapositola Paulusi muta na tamezwi mwa ndu. Paulusi na kutalize kwa batu ba ne ba mu potelanga kaufela. (Likezo 28:16, 30, 31) Bo Elin ni bona ba ezanga cwalo ka ku itusisa kolo kaufela ye fumaneha kwa ku ambola taba ye nde ye mwa Bibele kwa babeleki ba mwa ndu ya basupali yeo, ba ba cwale ka bakenisi, madokota ba meno, bakabisi ba milili, manasi, ni ba bañwi bo ba kopananga ni bona. Fokuñwi balumeli ka bona ba ba mwa puteho ye swana ni bona ba memanga baituti ba bona ba Bibele ku yo potela bo Elin ilikuli ba yo anya kwa zibo ya bona ni ku ituta se siñwi ku ze ba ipumani ku zona.

Ba ba mwa puteho ya bo Elin ba itebuhanga moya wa bona wa tabo ni ku bata ku ziba lika kwa bona. Paki ka bona u bulela kuli: “Bo Elin ba na ni buikoneli bo bu komokisa bwa ku ziba ze sweli ku ezahala mwa puteho. Ba ziba mabizo kaufela a banana ni bote ba ba sa zo tutela mwa puteho.” Hape bo Elin ba zibahala hahulu ka kamuhelo ya bona, lishea la bona, ni ku sa bilaela za bupilo.

Bo Elin ba tusiwa kiñi kuli ba zwelepili ku ba ni tabo ni ku isa mamelelo kwa mulelo wa bupilo? Ba balanga Liñolo zazi ni zazi ku zwelela mwa bukanyana ya Ku Tatuba Mañolo ka Zazi ni Zazi, ye hatisizwe ki Lipaki za Jehova. Ka ku itusisa mangilasi a ku balisa, ba balanga ni kalulo ya Bibele zazi ni zazi. Bo Elin ba itukisezanga mikopano ya ka sunda ni sunda ya Lipaki za Jehova, mi niha ba sa koni ku zamaya kuli ba yo fumaneha kwa mikopano yeo, mizwale ba kopisanga tukiso ya mikopano ni ku ba iseza kuli ba yo teeleza hasamulaho. Ku balanga Bibele ni lihatiso ze tomile fa Bibele kamita ni ku sa tuhela mikopano ya Sikreste kwa kona ku lu tusa ku pila bupilo bo bunde bo bu na ni mulelo ku si na taba ni fo lu kuma.—Samu 1:2; Maheberu 10:24, 25.