I Baliwa ka Bunolo, Kono Kana I Nepahazi?

KA SEPTEMBER 2005, keleke ya Church of England ka mafulofulo ya nyatela ku zwisiwa kwa Bibele ye bizwa The 100-Minute Bible. Bakeñisa kuli i lukiselizwe ku baliwa mwa mizuzu ye 100, toloko ye nca ye i kusufaza Mañolo a Siheberu ku a eza likalulo ze 17 ze ñozwi fa makepe a 17 ni ku kusufaza Mañolo a Sigerike ku a eza likalulo ze 33 ze ñozwi fa makepe a 33. Kacwalo sina mwa na bulelezi muñoli yo muñwi, toloko ye i tusa litaba kaufela “ze busula.” Ki niti kuli i baliwa ka bunolo, kono kana i nepahezi?

Kwand’a ku tusa libizo la Mulimu, lona la Jehova, ku na ni likalulo ze ñwi ze fetuzwi ze ka lemuhiwa ki baituti ba batuna ba Bibele. (Isaya 12:2) Ka mutala, kalulo ya pili ya toloko ye i talusa kuli Mulimu “na bupile lihalimu ni lifasi mwa mazazi a 6.” Kono Genese 1:1 yona i bulela fela kuli: “Kwa simuluho Mulimu n’a ezize Lihalimu ni Lifasi.” Mi hamulaho wa fo, taba ya kwa makalelo yeo i zwelapili ku talusa likezahalo ze ñwi za pupo za fa lifasi, ze ne tandile mazazi a pupo a silezi, kamba nako ye telele. Ku tuha fo, Genese 2:4 i kopanya hamoho nako kaufela ya pupo, ka ku i biza ‘nako y’a eza Muñ’a Bupilo Mulimu lifasi ni lihalimu.’

Toloko ya The 100-Minute Bible i talusa kuli Jobo munna ya sepahala, na taselizwe ki “yo muñwi wa batanga ba [Mulimu], Satani, . . . ili yo musebezi wa hae ne li wa ku tama batu litaba.” Kana mwa bona ku shutana ko ku li teñi fa? Libizo la “Satani” li talusa “Muhanyezi.” Ku fita ku ba mutang’a Mulimu, Satani mane ki sila se situna sa Mulimu mi ki yena muñi ka sibili ya na itatezi ku tama batu litaba.—Sinulo 12:7-10.

Kalulo ya Mañolo a Sigerike a Sikreste a mwa toloko ya The 100-Minute Bible yona i lweziñi? Mwa nguli ya lingu ni lipuli, toloko ye nca ye i bulela kuli Jesu na shemubile ba ne ba tusize “mutu kaufela, ku si na taba kuli ki mutu ya cwañi,” hailifo Jesu yena na bulezi kuli u fuyaula ba ba ezeza ze nde balateleli ba hae ba ba mu likanyisa, bona “banyani” ba hae. (Mateu 25:40) Manzwi a kusufalizwe a Sinulo a taluseza babali ba yona kuli “Roma, yena Babilona yo mutuna, u ka shandaulwa.” Kono baituti ba Bibele ba ziba kuli ha ku na mwa mañolo a kwa makalelo ko ku talusizwe cwalo ka za “Babilona yo mutuna.”—Sinulo 17:15–18:24.

Ba ba bata ku ziba Mubupi wa luna ni ku utwisisa mulelo wa hae, ba swanela fela ku bala Bibele mukatumbi. Ki niti kuli ku bala Bibele ku ka tanda nako ye fitelela mizuzu ye 100, kono ku eza cwalo ku tisa mipuzo ya butokwa hahulu-hulu. (Joani 17:3) Haike mu bale Bibele kaufel’a yona mi mu ka ipumanela mipuzo.—2 Timotea 3:16, 17.